من يرى جمهور أصالة نصري منذ كأيام وماكان يفعله لدرجة إنها كانت هتخسرهم لا يراهم الآن وهم يحتفلوا بعيد ميلادها الـ54 والحياة حلوة.
بس ده يرجع إن أصالة نصري كانت ناصحة وقدرت تعالج الموقف ولسانها اللي مكانش حصانها بقى هو حصانها وخدت فرصة تانية وحفلة في التانية الكل هينسى اللي حصل ويشربوا بيبسي كمان، وفي الفيديو اللي معانا ده هنقولكم إزاي أصالة كانت هتخسر جمهورها وإيه اللي بيعملوه معاها دلوقتي، ده غير إنها طلعت أذكى من فنانين كتير عانوا من نفس الأزمة بس مقدروش يعدوا منها والجمهور انتصر عليهم.
أصل الحكاية
كان في حالة غضب كبيرة على السوشال أول ما تم الإعلان عن إحياء الفنانة السورية أصالة نصري حفل غنائي في متحف الحضارة المصرية، وطالبوا المسؤولين بالإلغاء، وده على خلفية تصريحات أصالة وإنكارها فضل مصر عليها في مشوارها الفني، لأن أصل الحكاية راجعة لكام شهر فاتوا لما أصالة صرحت بتقول: “تاريخي كله الفضل فيه للمملكة العربية السعودية، والتي سأظل مدينة لها العمر كله”، وده كان تعليق ليها في حفل أحيته في السعودية، وده اللي أثار غضب المصريين عشان أصالة تعمدت إنكار فضل مصر عليها.
ورطة متحف الحضارة
وكان متحف الحضارة اتورط وقتها في حفل أصالة لما الفنانة السورية نشرت بوستر الحفل على حسابها في “تويتر” وقالت: “أهلي وحبايبي بمصر العظيمة كل سنة وانتوا بألف خير.. استنوني بحفلة كتير بتعني لي بمتحف الحضارات يوم 5 مايو نسترجع ذكرياتنا نستمتع بالجديد سوا رح نأسس ذكرى لليلة غير كل الليالي”.
وكانت المفاجأة لما المتحف القومي للحضارة المصرية أعلن على صفحته الرسمية إن حفلة أصالة مش مقامة في المتحف ولا حتى ساحته إنما هتتنظم في بحيرة عين الصيرة والمتحف وإدارته ملهمش أي دخل بالموضوع وده عكس الكلام اللي أعلنته أصالة علي حسابها في تويتر.
طلعت أذكى اخواتها
في فنانين كتير طلب الجمهور إلغاء حفلاتهم في مصر، زي الفنانة اللبنانية ميريام فارس اللي وقعت في تصريح مثير للجدل، وكمان الفنان المغربي سعد لمجرد وغيرهم كتير، لكن إيه المفاجأة إن أصالة طلعت أذكى اخواتها ومتأثرتش باللي بيحصل في السوشال ميديا وشغل الهاشتاجات والكلام ده، واتفاعلت مع جمهورها على تويتر وقالت: “إن شاءا لله حتكون أجمل حفلة لأنها مليانة حب ونوايا طيبة والأغاني حلوة رح تحكي قصّة عشّاق فيها اتربوا وصاروا منها وكبروا فيها #مصر”.
وجوه الحفلة كمان أصالة مش بس انتشرت لنفسها وعملت الحفل لأ ده كمان صالحت الجمهور وهوب قدمت عربون محبة وطبعاً مفيش أحسن من فعل الخير واتبرعت بأجرها لمستشفى أهل مصر وكمان 57357 وجزء كمان للاجئين السوريين اللي عايشين في مصر، ومنسيتش ابنها خالد اللي كان بينظم الحفلة دي وسابت مبلغ بردوا عشان يكمل بيه مشواره في تنظيم الحفلات، وقالت أصالة كلمتين يدوبوا الجليد ويرجعوا المئة لمجاريها تاني إن مفيش حد مش بيحب الهوا والحياة والمية مفيش حد يقدر ينكر فضل مصر عليه، دي شخصية ناصحة امتصت غضب الجمهور اللي النهاردة بيحتفل بعيد ميلاد أصالة وكلمات الغزل مسيطرة على السوشال ميديا.
سعد لمجرد عانى 3 مرات
والفنان سعد لمجرد عانى 3 مرات بخصوص حفلاته في مصر وكانت آخر مرة من كام شهر لما عدد كبير من رواد التواصل الاجتماعي في مصر عملوا هاشتاج “مش عايزين سعد لمجرد في مصر” وده بعد ما أعلن عن حفل صغير ليه في أحد أماكن السهر في مدينة شرم الشيخ، ودي كانت المرة التالثتة اللي يتلغي فيها حفل سعد عشان اتهامه في قضايا هتك عرض.
كيفين مش مرحب به
والفنان الأمريكي كيفين هارت، كان في مرحب بيه في مصر بعد ما أعلن عن تقديمه عرض كوميدي في استاد القاهرة يوم 21 فبراير 2023 واتعملت حملة في مواقع التواصل للمطالبة بإلغائه، وده بسبب دعمه مزاعم حركة “الأفرو سنتريك”، اللي بتدعي إن الحضارة الفرعونية، ملك للأفارقة، وإن المصريين عرب غزاة.
ميريام فارس صدمت الجمهور
ومن فترة كده كان في موجة غضب كبيرة ضد ميريام فارس بسبب تصريح صادم ليها لما قالت في مؤتمر صحفي وهي بتشارك في فعاليات مهرجان “موازين” بالمغرب، إنها مش بتعمل حفلات في مصر الأيام دي عشان هي تقيلة على مصر يعني من الآخر مش هيقدروا يدفعولي فلوس تقدر قيمتي، المهم من بعدها أي كلام عن حفل ليها في مصر مبيكملش بسبب التصريح ده واللي هيفضل متعلق في الأذهان، ده حتى الإعلان اللي عملته في مصر بعد التصريح ده الناس رفضته وهاجموا المسؤولين اللي اختاروها للإعلان.
