تعرفت عليه سنة 2013 ولم تتزوج غير سنة 2020..ظلوا 3 سنين وبعدها انفصلوا، هذه باختصار قصة زواج غادة عبدالرازق من مدير التصوير هيثم زينتا.
واللي محدش يعرفه بقى إن الموضوع كان متوقع وليه مقدمات سبقت القرار.. إيه اللي حصل في الانفصال ده وكواليسه ويا ترى غادة عملت إيه بعد ما خدت القرار بالانفصال.. وتفتكروا دي الجوازة رقم كام في حياة الفنانة اللي وصلت دلوقتي 52 سنة وناوية تكرر الجواز تاني ولا كفاية كده رحالة في حياتها؟
غادة عبدالرازق نجمة بتحب يكون في راجل في حياتها واللي يلاحظ يلاقي دايمًا في حياتها راجل وأهو زي المثل ما بيقول ضل راجل ولا ضل حيطة.. الغريبة إن رغم إن في جوازات كتير في حياة غادة هقولكم على عددها لكن مخلفتش غير بنتها الوحيدة روتانا ودلوقتي غادة جدة ورغم كده تشوفها تلاقيها محافظة على جمالها ورشاقتها ولسه أنثى مرغوبة للرجالة.. لكن في كواليس كتيرة في جوازتها من هيثم زينتا وتعرفها عليه وانفصالها عنه لازم الجمهور يكون عارفها عنها.
طولها مساعدها
تقريبًا كده غادة عبدالرازق بالنسبة لرجالة كتير تعتبر أنثى مرغوبة ويمكن عشان طولها الفارع وجسمها المشدود بيعتبروا عامل مساعد في إنها تكون الأجمل في عيون رجالة كتير ومش فارق بقى سنها كام ولا إيه المهم يكون في عوامل تانية تخليها لسه قادرة على إنها تجذب اللي قدامها وده اللي مخليها علطول في ضل راجل وكمان غادة بتعرف تعيش حياتها كويس وليها وجهة نظر تخليها تعرف تختار وأكيد عندها خبرة كافية في حياتها.. لكن رغم كل الرجالة والجوازات بس هي اعترفت إنها شخصية متسرعة بنسبة 90% وبتاخد قرارات مش عقلانية.
جوازة مفاجأة
كلنا كنا متعايشين عادي على إن غادة عبدالرازق فنانة بتقدم كل سنة مسلسل وإنها عملت بُوم من مسلسل حكاية حياة وبعدها ريحت شويتين تلاتة كده لكن ده ميمنعش إنها لسه على الساحة ومسلسل في التاني حصل التعارف والجواز من هيثم زينتا.
هما أصلًا يعرفوا بعض من سنة 2013 وقت عرض حكاية حياة بس الغريبة بقى إنهم انفصلوا سنة كاملة عن بعض مش بيتكلموا ولا يعرفوا حاجة عن بعض لحد ما رجعوا يتكلموا تاني وفي أواخر أبريل سنة 2020 اتجوزوا رسمي وده بعد ما كان مدير تصوير في مسلسلها سلطانة المعز.
وقتها مواقع كتبت تفاصيل الجوازة دي منهم موقع اليوم السابع وإرم نيوز اللي كشف تفاصيل إن هيثم قدم شبكة لغادة عبدالرازق في كواليس التصوير واتجوزوا ومخرج المسلسل محمد بكير كان شاهد على عقد الجواز.
وبعد كده اتقال إن الفرح اللي كان في المسلسل والجمهور شافه في مشاهد جوه المسلسل كان في فرح على الضيق كده عمله هيثم لغادة.. لكن في الحقيقة مشوفناش هيثم وغادة عملوا فرح ولبست الفستان الأبيض وواضح إنها خططت تروح شهر عسل واكتفت بكده وده اللي شوفناه في الجوازة دي.
معندهاش حل وسط
غادة عبدالرازق من أساسيات حياتها إنها معندهاش حل وسط في حاجة يعني يا ابيض يا اسود زي ما بيقولوا.. وده يمكن كان مأثر على حياتها الشخصية كمان يعني تتجوز وتنفصل بتاخد قرار واحد مفيش تردد.. وده اللي حصل في انفصالها عن هيثم زينتا اللي كان من متوقع.
وحسب موقع صدى البلد غادة انفصلت رسمي وكان في مقدمات لحاجة زي كده من كام يوم لما انتشر شائعة عن انفصالهم وكان في خلاف وقتها لكن الموضوع عدى لحد ما شوفنا خبر الانفصال.. دلوقتي هي خدت قرار يأكد الانفصال وشوفناها لغت متابعة هيثم زينتا على إنستجرام وحذفت صورهم مع بعض.
مبعدش يا جيمي
تقريبًا غادة عبدالرازق واخدة إيفيه الفنانة بدرية طلبة مبعدش يا جيمي في جوازاتها كلها يعني وهي في حلقة في برنامج تلفزيوني اسمه عايشة شو قالت غادة عبدالرازق إنها كانت متجوزة 4 مرات قبل مسلسل زهرة وأزواجها الخمسة وبعدها قالت إنها كملت في جوازاتها لحد ما وصلت 10 أو 11 مرة وطبعًا ندمت على بعض الجوازات دي والتصرفات وحاجات كتير في حياتها.. وكده يبقى هيثم زينت رقم 11 أو 12 في جوازات غادة عبدالرازق.
عشان وقتها مكانتش لسه اتجوزته وقالت لو لقيت حد يحب غادة الإنسانة ويحترمها مش غادة الفنانة هتتجوزه.. وبعد البرنامج ده بجوالي سنة اتجوزت هيثم.. وقتها كانت عايشة لبنتها روتانا اللي خلفتها من اول جوازة ليها وهي عندها 17 سنة وكمان كانت مهتمة بأحفادها كمان.. وكده ممكن غادة ترجع تعيش حياتها لبنتها أحفادها لحد ما نشوف هتقرر تاخد الجوازة الـ12 ولا الـ13 ولا إيه؟.
