مازالت دولارات محمد رمضان تثير الجدل على مواقع التواصل الاجتماعي ، حتى بعد ما قام بحذف الصور ، لكن بعدما شاهدناه جميعا وهو كان لا يخشى الحسد، وخاصة أن هذه الدولارات جاءت في وقت أزمة والدولار يترفع سعره في كل يوم.
فهل بقى يقدر نمبر وان ينقذنا بشوية الدولارات دي .في الوقت اللي الدولار بيرتفع بارقام كبيرة جدا ، ومبقاش في دولارات في البلد ، إلا ان محمد رمضان حب ياخد اللقطة، ويورينا هو كسب اد ايه من حفلاته في امريكا ، وحاطط الرزم جنبه عادي ولا كأنها كيس لب مثلا.
العملة رقم واحد في العالم دلوقتي واللي قايم عليها اقتصادنا بالنسبة لمحمد رمضان شوية رزم سهل يكسبهم في حفلتين تلاتة برا مصر ، طبيعي ياخد اجره بالدولار ، متخيل شوية الرزم دول عامل كام بالمصري.
الهجوم على محمد رمضان كان كبير بسبب صورة الدولارات ،، غلط غلطة يمكن مش مقصودة ،بس البلد بتعاني من ازمة وعندنا مشكلة في الدولار ومبقاش موجود ، وهو رايح يحطلنا دولاراته على الكرسي كدا بسهولة ، وبكدة بقى هو الجامد اللي بيعرف يدخل دولارات للبلد وهيحل مشكلة الاقتصاد.
الجمهور انتقد رمضان وخدوا الموضوع على محمل الجد مش مجرد صورة نشرها بيتباهي فيها بدلاوراته ، لكن الناس قالتله انك بقى تقدر تساعد في حل ازمة الدولارفي مصر بما انك جامد كدا وسهل تجيب الرزم دي ..
لميس الحديدي مسكت محمد رمضان غسيل ومكوة بسبب الدولارت دي ، وقالتله بكل جرأة : انت عارف ان البلد فيها ازمة دولار ، انت بتشحت علينا ولا بتقول للبلد والحكومة ان انت اللي بتجيب الدولارات .. انت بتعايرنا مثلا ؟
وبطريقة السم في العسل، قالت لميس لرمضان : بتتباهي بالدولارات اللي إداك يدينا يا سيدي؟! ربنا هيفتح على البلد وميبقاش فيها أزمة، لكن ازاي دخلت بالدولارات دي في المطار ؟
رمضان زنق نفسه في حتة وحشة لما داس على الجرح ، والناس قالتله انت بتعايرنا بدولاراتك ، ومسح الصور من عنده على انستجرام ، وكمان عمل لقطة حلوة بعد ما وافق يتبرع للمستشفيات اللي محتاجة اجهزة.
رغم انه غلط انه استفز الناس بفلوسه بالشكل ده إلا انه حب يلحق نفسه بسرعة ، بعد ما الدكتور جمال شعبان عميد معهد القلب السابق ، كتبله بوست مخصوص على فيسبوك وطلب منه يتبرع بالدولارت دي لمستشفيات مفهاش امكانيات وانه ياخد ثواب بيها بدل ما يتنطط بيها على الخلق.
وفعلاً محمد رمضان استجاب للدكتور جمال ، وكتبله تعليق عنده على الصفحة وطلب منه يديله ارقام المستشفيات المحتاجة لاجهزة وكمان طلب رقمه الشخصي، وتواصلوا مع بعض عشان رمضان يتبرع بفلوس للمرضى والمستشفيات ، يمكن الحركة دي تشفعله صورة الدولارات اللي زعلت الناس منه.
المشكلة ان رمضان عنده احداث رهيب بعد ما ربنا فتح عليه وبقى من اغنى النجوم في مصر ، لدرجة انه من حوالي سنة نشر فيديو وهو بيرمي الدولارات في البسين بشكل استفز الجمهور جدا ، مش عارفين ايه حكايته مع الدولارات واحنا مش لقينها
تعالى اقولك مفاجآة كمان .. محمد رمضان عمل ثروة كبيرة جدا في اخر 3 سنين ، تقريبا حوالي 155 مليون جنيه من 3 مسلسلات بس.. ايوة هقولك اصبر ..
رمضان خد 65 مليون جنيه في مسلسل جعفر العمدة ، اما مسلسل المشوار بتاع رمضان اللي فات خد 45 مليون جنيه ، ونفس الرقم في مسلسل موسى السنة اللي قبل اللي فاتت ، يعني المجموع 155 مليون جنيه في 3 مسلسلات بس من غير ولا اي حفلة ولا اعلان .. متخيل الرقم ؟
عارفين شوية الرزم اللي ظهرت في الصورة مع رمضان دول تقريبا عاملين حوالي مليون دولار يعني 30 مليون جنيه مصري .. وهو حاططهم جنبوا قال يعني مش مهتم .. ربنا يزيدك يا نجم بس كفاية منظرة علينا.
