إختفت أكتر من 10 سنين،وأول ظهور لها كان فى برنامج كلام الناس مع ياسمين عز ويمكن هذا الحسنة الوحيدة للبرنامج إنه يلقى الضوء على نجوم اختفوا من على الساحة الفنية،وهو فرصة يعيدوا أكتشافهم من شركات الإنتاج والمخرجين.
ومن هنا بدأت الفنانة وفاء مكى تظهر للجمهور تانى،وتتواجد فى البرامج وعلى كل السوشيال ميديا،علشان نفسها ترجع تمثل تانى ،لكن حصل اللى ممكن يكون متوقع لناس وممكن يكون مش متوقع خالص معقول حصل معاها كده؟
تفاصيل كتير عن المعاناة اللى مرت بها وفاء مكى ،إنت متخيل وصل بها الحال لإيه؟
أنا وفاء مكى بتاع ذئاب الجبل،بتاع الراية البيضا،بتاع لحم رخيض،أنا اللى قدرت أغير قوانين من خلال الفن.. دى كانت محاولة من وفاء إنها تفكر الناس بنفسها إنها معملتش أعمال أى كلام بالعكس كل أعمالها هادفة وراقية.
وفاء إستغلت كل السوشيال ميديا والإعلام الساعات اللى فاتت فى إستغاثتها دى وإن حد يساعدها،وعملت كده بعد ما كل الابواب أتقفلت قدامها والحالى ضاقت عليها .
ظهرت فى فيديو لها على حسابها الشخصى تيك توك بتستغيث بالرئيس عبد الفتاح السيسي وقالت نداء واستغاثة للرئيس السيد عبد الفتاح السيسي، يا فندم انا عملت أكتر من 86 بطولة عمل، وحبيت أرجع شغلي تاني وطرقت كل الأبواب لكن لا حياة لمن تنادي .
أنا اتخرب بيتى وبقيت مديونة للنقابة والبنوك، أخدت قرض ب31 ألف جنية لمدة سبعة سنين،و سددت منها سنتين إزاى حالى بقى كده؟، ومحدش يقولى أن السوق عرض وطلب فى مؤامرة ضد الفن الأصيل،وبصرف على أمى المريضة بالكانسر وإبنى اليتيم ،ومعنديش شغلانة تانية نفسي أشتغل أنا مش لاقية أكل.
قالت كمان إن الدراما كلها مليانة وجوه جديدة محدش عارفها وبيدوهم بطولات مطلقة، أنا تعبت ومعنديش مصدر تاني ولا شغلانة تانية.
مفيش حد من الفنانين بيكلمني ولا حتى النقيب أشرف زكي، مفيش حد بيرد عليا منهم، أنا مديونة للكل عليا فلوس فوق الـ 500 ألف جنية، ساعدوني عايزة أرجع أشتغل شغلانتي تانى.
ولو كلموني هيقولولي على دور صغير وهيرجعوا يقولوا هي رفضت ، ما أنا رفضت عشان الدور مش كويس، أنا هحكم الناس أنتوا ترضوهالى أمثل دور صغير،بعد تاريخي الفني الكبير؟
هو يا فنانة مش أحسن من مفيش؟وأهو تكون خطوة جديدة بعد غياب 10 سنين،ماهو مش كل فنان هيغيب ويرجع عايز بطولة مسلسل،ولا إنتو أيه رأيكوا؟ الغريب إن أتعرض عليها دور فى فيلم محمد رمضان الجديد على الزيرو ولكنها رفضت تفتكروا ليه؟
وفاء مكي قالت فى حوارها فى برنامج كلام الناس إن أجر الفيلم معجبهاش علشان كده رفضت ،وإن كل شئ نصيب .أنا عملت اسم، ومحتاجة أشتغل علشان عايزة فلوس أنا مش لسه حد هيكتشفني كوفاء مكي.
كمان قالت عن سبب رفضها العمل مع محمد رمضان فيها إيه لما أرفض أشتغل مع محمد رمضان هو مين؟
العمل مش مناسب تاريخى الفنى عايزني أرجع تافهة وهايفة؟ أنا مش جاية من على السلم وأعمالي تشهد لي، ولازم أرجع بتاريخي ومحدش يرمي لي دور أي كلام.
كتير قالوا إن القضية بتاعتها القديمة هى السبب ،لكن وفاء ردت وقالت أنا قضيتي بقالها 30 سنة وفنانين كتير من غير شغل يا ترى كان لهم قضية بردو؟ أنا طلعت اشتغلت بعد قضيتي بالـ 5 أعمال،الناس اللي بتتكلم على قضية بقالها سنين دول مش لاقيين حاجة يقولوها دا فيه فنانين خرجوا من قضايا مخلة واشتغلوا عادي، هو فيه أكتر من كده؟
طبعا قضيتها دى كانت سنة 2001 وساعتها هزت الرأى العام ،وتم الحكم عليها لمدة 10 سنين بتهمة الإعتداء على شغالات عندها فى البيت.
طبعا أخر أعمال لوفاء مكى بعد خروجها من السجن كان مسلسل الكابوس مع غادة عبد الرازق ،ومن ساعتها بتعانى المعاناة اللى حكتها كده،الحقيقة إن وفاء مكى زيها زى نجوم كتير إتنسوا فى زحمة الوجوه الجديدة فهل ممكن يكون للنقابة دور فى إنقاذهم مش على المستوى المادى بس لكن كمان على المستوى النفسي،شوف كان فنان ومشهور وفجأة مبقاش له وجود. ولا ده التطور الطبيعى للفنان؟
