خلال الساعات الماضية انتشرت صورة للفنان سامو زين في اتيليه ويرتدي فستان، مما أثار ضجة وغضب على مواقع التواصل الاجتماعي، ولكن المفاجأة أن سامو زين ليس الأول فقد سبقه العديد من الفنانيين في لبس ملابس نسائية سنتعرف عليهم من خلال التقرير التالي:
فين ساموزين بتاع الورد الأحمر وعايز إيه منى إبعد بقى عنى ؟إحنا اللى نبعد بردوا يا فنان؟حد يعمل اللى إنت عملته ده؟ مش كده يعنى؟ تلبس ألوان غريبة ماشى، مطرقعة ميضرش، مشجر وماله نقول سيبوه يتبسط بالألوان الحلوة لكن فستان فستان يا فنان ؟وفين فى أتيليه فساتين للسيدات؟
لالا يا سامو لا طول عمرك بتتصدر التريند علشان قضايا زى قضية التهرب الضريبى كده حتى هو قال مبحبش أشارك جمهورى تفاضيل القضية علشان مزعجهمش يا زين ما عملت والله يا فنان كفاية علينا أخبار البراند بتاعك اللى هتعمله إستنوا يكونش الفستان اللى لبسه ده له علاقة بالبراند اللى هيأسسه؟
المهم يعنى إن ساموزين نشر صورته بالفستان على حسابه الشخصى إنستجرام من هنا والدنيا قامت عليه مقعدتش والكومنتات كانت زى إه المنظر ده؟ الغريبة إن ساموزين كان بيرد ويقوله إلبس نضارة وإنتو فاضيين وبلاش أنا .
تفتكروا ليه سامو زين يلبس فستان؟والغريبة إنه شايف إن ده عادى وزى ما يكون بيقول ليه حصرتوا الفساتين للستات بس الحقيقة إن مش ساوزين بس اللى أثار الجدل بإطلالته بملابس غريبة أو مش مناسبة للرجالة عندك محمد رمضان بااااس حدث ولا حرج إيشى ألوان إيه وشيفونات متعدش وستانات مقولكش لا ده بالذات فى حته لوحده يعنى .
من كام يوم كده نشر محمد رمضان إستوري على حسابه الشخصى لابس قميص شيفون وجاكت وبنطلون جينز مقطع ، وحقيقى رمضان مش محتاج يبقى تريند لإنه ثقة فى الله هو ملك التريند وكل التريندات برة وجوه . إنت بتتكلم فى إيه؟
ده غير بقى السلاسل الدهب وخواتم الأسد مقولكش والنضارة علشان اللوك يكمل ، رمضان عايز حلقة لوحده. ياترى إيه حبه للستانات والشيفونات ؟
فاكرين حفلته اللى كان لابس فيها قميص شيفون شفاف ولا جاكت جينز مليان سلاسل؟ ده أكيد السلاسل دهب طبعا اللى خلى صابونته من الدهب جت على دى؟ لا وكمان فى حفلته الأخيرة ظهر ومغطى راسه لا مش للدرجادى بقى هو نمبر وان عايز إيه ؟
تصدق إن عمرو سعد لبس قميص ساتان هو كمان؟ غريب أوى بجد ، الساتان مش عمرو سعد لا .لما كان ضيف فى برنامح جوسيبس ظهر لابس بنطلون أبيض طيب تمام فين المشكلة إستنى القميص اللى كان ساتان أزرق علشان الحسد والأكمام بيضة أهو يكسر اللون بردوا.
لإنت عارف سعره كام ؟ 20 ألف جنيه أصله ساتان بردوا اكيد ساتان حرير من تصميم جوشى مش الألترا مودا بتاعنا ده اللى المتر منه ب40 ج لا .الحق يتقال هو الساتان الأيام دى تريندى جدا ومكسر الدنيا حتى الأزرق بيعمل شغل جامد بردوا.
لو تفتكروا الفنان إسلام إبراهيم وويجز لما ظهروا فى أحد المهرجانات ببدل عجيبة الألوان كنا مستغربين إزاى كده معقول؟ مكناش شوفنا إطلالات الساتانات والشيفونات دى والفساتين كمان .
شاركونا برأيكم فى التعليقات هل إنتو مع المثل اللى بيقول كل اللى يعجيك وإلبس اللى يعجب الناس ؟ ولا شايفين إن من حق الفنانين يلبسوا ساتانات وشيفونات وفساتين ؟ومش على قد الألوان المطرقعة بس يعنى ؟
