هل تتذكروا مسلسل السبع وصايا، كنا جميعا نتجمع أمامه في رمضان 2014، وقصته وأحداثه كانت مثيرة جدا، الفنانة شيرين الطحان التي رحلت منذ قليل كانت من أبرز الوجوه الجديدة في هذا العمل.
ومن وقتها اشتغلت في كذا مسلسل منهم رمضان كريم.. اللي من غير سبب واضح مش هتكون موجوده السنة دي في الجزء التاني منه.. فجأة تعبت جدا ونقلوها العناية المركزة.. تعالوا أقولكم حصلها ايه.
عدد كبير من فنانات الصف التاني وعلى رأسهم صفاء جلال.. نشروا كلام غريب ومقلق عن زميلتهم الممثلة شيرين الطحان خلال اليومين اللي فاتوا.. كلام من نوعية “ادعولها”.. عندها مرض خطير.. صاحبتنا في العناية المركزة.. شيرين الطحان في أزمة.. ومحدش بيقول هي مالها.
الناس مكنتش مركزة أوي مين شيرين الطحان لغاية ما انتشرت صورها.. وافتكروها.. جميلة الجميلات.. “ماجدة”.. اللي سحرت هيثم أحمد زكي بحلاوتها في مسلسل السبع وصايا.. اللي كان المفروض يقتلها.. بس لما شاف ملامحها الحلوة وعيونها الملونة.. وقع في غرامها.. وكانت بداية اللعنة عليه.
بعدها بتلت سنين.. رجعت شيرين الطحان مرة تانية بدور جديد.. ورغم ملامحها الراقية.. إلا إنها كانت شاطرة جدا في دور البنت الشعبية.. هند مرات المعلم حناوي.. اللي سابت حبيبها عشان فلوس صاحب القهوة.. وكانت هتخسره هو كمان بسبب جمالها.. وغيرته عليها.
من وقتها شيرين الطحان اختفت.. ومكملتش في التمثيل.. بس اللي ناس كتير متعرفوش إن شيرين أصلا مذيعة مش ممثلة.. وقدمت أكتر من برنامج على قنوات التلفزيون المصري.. وليها برامج كتير على قناة النيل للمنوعات.. غلبها المرض الفترة اللي فاتت.. ومبقتش قادرة تركز في شغلها.
شيرين اللي موجودة دلوقتي في العناية المركزة.. بتعاني بقالها فترة من مرض السرطان.. ورغم إنها اتعالجت منه بعد عناء سنين طويلة.. إلا إن توابع العلاج والكيماوي أثر عليها جدا.. وفجأة جالها حالة ضيق تنفس.. وانهارت من أسرتها.. ونقلوها المستشفى فورا.
الفنانة نهال عنبر قالت إنها بتتابع حالتها مع الدكاترة بشكل مستمر.. واللي تعرفه إنها فعلا كانت كتير مع المرض الوحش زي ما بيقولوا عليه.. بس هي دلوقتي في تطورات الأزمة.. جالها انهيار في الرئة.. وآلام في القولون.. ودول حاجتين يوقعوا أي حد.. فما بالك بمتعافية.
بس الغريبة إنه على الرغم من صعوبة الحالة اللي عبرت عنها نهال عنبر وصفاء جلال وغيرهم من الفنانات.. إلا إن شيرين الطحان بترد على الناس سواء على رسايل الفيسبوك أو الموبايل.. ورغم إنها في العناية المركزة والمفروض ميكنش معاها تليفون أصلا.. بتتكلم مع الناس وبتقولهم ادعولي
نتمنى تقومي بالسلامة يا فنانة ونرجع نشوفك تاني على الشاشة.. ونقول أزمة وعدت
