معجونة بالموهبة، ميكس فنون مجتمعة فيها، قررت الاحترافية وأن تكون موجودة بطريقة مستحقة على الساحة، وهي فنانة بنت فنان أخت فنان، وجواها غنا وتمثيل، ووقعت في أزمة مع حسن شاكوش، وهذه كانت بداية تعرف الجمهور عليها، انها الفنانة هنا يسري.
طبعا من الاسم عرفنا هي بنت مين، أيوة هي بنت الفنان الراحل إبراهيم يسري، واللي اتوفى في 20 أبريل سنة 2015، وهو بالمناسبة نفس يوم ميلاده، وهنا يسري بتشبه والدها في الملامح بدرجة كبيرة، وناس كتير قالولها ده.
هي مواليد 1993، وأخوها هو الفنان محمد يسري، واللي شفناه في أعمال كتير يمكن آخرها مسلسل «ضل راجل» و«وعد إبليس».
هنا باباها كان عارف من بدري بموهبتها، ولكن كان شايف إنها مش واخدة الموضوع بجدية، لحد بعد وفاته قررت هنا إنها تاخد الموضوع بجد، وتبدأ تنتيج وتعيش الحياة اللي هي عايزاها، إنها تمثل وتغني.
بس جنب الموضوع ده هنا قررت، إن هي تفتح مشروع خاص بمشاركة والدتها عشان يكون حاجة كدة بعيدة عن المجال الفني، زي ما نجوم كتير بيعملوا، وقرروا إن هما يشتغلوا في مجال تصميم الشنط وتسويقها، ولكن هي بتقول إن مامتها شايلة معظم الشغل.
بداية ما الناس عرفت هنا، كان وقت ما ظهرت أغنية بنت الجيران، والأغنية دي ناس كتير أعادت غناها، سواء بنفس الطريقة أو بأسلوب مختلف، وكان منهم هنا يسري، واللي غنتها بصوتها الجمل وبتوزيع مختلف مع مزجها بأغنية dance monkey الشهيرة عشان تعمل حالة كويسة جدا، ولكن فوجئت بعد صدورها على طول إن حسن شاكوش حذف الأغنية من على يوتيوب.
هنا بتقول إنه مشغلهاش الموضوع وكانت مركزة مع النجاح اللي حققته الأغنية بالشكل اللي هما عملوه، خصوصوا وإن فكرة الـcover للأغاني دي موجودة في كل حتة في العالم، والنجوم بيعتبروها بمثابة تكريم ليهم على نجاح أغنياتهم، وفي منهم كمان بياخدها يشيرها على صفحته.
وهنا بتعمل الموضوع دي كتير، وكمان ليها أغنيات فعلا بدأت تنزلها على فترات، ولكن لسة مصدرش ليها ألبوم، ولكن البدايات مبشرة، خصوصا إن عندها خامة صوت ممتازة، وكمان حضور قدام الكاميرا.
كمان هنا عندها داعم كبير ليها في الغنا، وهي الديفا سميرة سعيد، وهي صديقة مقربة للأسرة من زمان، وكانت موجودة معاها وقت تصوير cover أغنية بنت الجيران.
هنا ليها تجارب تمثيل لسة في بدايتها، زي مسلسلات «العيلة دي، وفي كل أسبوع يوم جمعة، والثمانية»، وهي مبسوطة جدا بالخطوات اللي بتاخدها في مشوارها الفني.
هنا يسري بتحلم تكمل في أكتر من مسار وهما الغنا والتمثيل، وكمان المشروع الخاص اللي عاملاه مع والدتها.
