ارتباطات الوسط الفني دائما محسودة، كثير ما نسمع عن أزواج من الوسط الفني ينفصلوا ، وأخر هؤلاء قصة شيري نعبد الوهاب وحسام حبيب وما حدث بينهم، والأن ظهر حوار حسن شاكوش.وما فعله مع الزوجة الثالثة ريم.
وكان من قبلها اللي حصل بينه و بين سلمى، و قبلهم مراته الأولى. و اللي كل الارتباطات ديه ، فشلت و مفيش حاجة كملت، و أسبابهم تقريبا واحدة، علشان كده حاولنا نعرف ليه حظ حسن وحش في الارتباط .
من ساعة ما حسن شاكوش اتجوز في شهر مارس، و هو كان عامل قلق، شوية علشان الساجدة اللي عملتها مراته و شوية تانيين علشان اللي مجوش فرحه و بيهددهم،وبعد كده التمثيلية اللي حصلت في برنامج العرافة في رمضان، وبعد كده طردها و قسم و محاضر ، و قصص كتير أوي .
والحقيقة إن حسن شاكوش ديه مش أول مرة يحصل كده في جوازة من جوازاته، أه أصل ريم كانت التالتة، و الاتنين اللي قبلها خلصت حكايتهم بردو بقصص و فضايح و حاجات تشيب.
ولو بدأنا بالجديدة ريم اللي حبها في شهر و خطبها، و على طول اتجوزوا، و من فرحتها بيه سجدت شكر بفستان الفرح، و طلعت تريند ساعة فرحها و مفيش شهرين تريند تاني، حسن شاكوش طردني و سرق شبكتي و مضاني على وصل أمانة، حاجة كده زي عُلا غانم و حكايتها، بس خلينا في حسن.
و طبعا السوشيال ميديا مالهاش كلام الا الحوار ده، و هي تقول عليه انه مش كويس و هو يقول هي لسه مراتي ومش هتكلم عليها، وعلى حسب كلام اللي قاله حسن لموقع القاهرة ٢٤، انه اكتشف انها كانت متجوزة قبله و مقالتش، وهي بتقول انه خانها و ضربها ” عنيف أوي يا حسن ” .
أصل ده نفس السبب اللي قالته الرقاصة سلمى مرات حسن التانية، واللي كانوا متجوزين عرفي، و مطولوش مع بعض، من ٣ سنين طلعت سلمى مجدي في لايف و قعدت تقول كلام مينفعش يتقال على الهوا، و انها هي و حسن شاكوش كانوا متجوزين عرفي .
و ضربها و قطع الورق أما اكتشفت خيانته، و انه بيتعاطى مواد ممنوعة، و فضلنا في الحوار ده حبة، لحد ما طلع حسن شاكوش مع بسمة وهبة ” أصلها بتعزه أوي “.و قال أنا مش هتجوز رقاصة، و ساعتها هنا سلمى ورته الوش التاني، لحد ما عرف انه يلم الحوار معاها .
أما عن المرة الأولى هو متكلمش عنها كتير. غير انه قال في لقاء ليه مع ايناس الدغيدي من ٣ سنين إنه اتجوز مرتين، و انفصل، و مقعدتش معاهم فترة طويلة، ده حتى أما خطب قبل ريم السنة اللي فاتت، قعد ٣ أسابيع و الخطوبة باظت .
و أيًا كان عدد المرات اللي اتجوز فيها، سواء ٣ ولا ٢ ولا ١،فالواضح كده إن حسن شاكوش حظه وحش مع الجنس الناعم، و الأغرب إن الأسباب اللي اتقالت سواء من ريم ولا من سلمى قريبة من بعض، واللي هي اهانة و ضرب.
