مازالت توابع الانفصال العالمي بين بيكيه وشاكيرا مستمرة حتى الآن، لأن التفاصيل بينهم لا تنتهي، خصوصا إن علاقتهم التي استمرت حوالي 12 سنة وكانت نتيجتها طفلين.
ولكن في النهاية كل واحد راح لحاله، وياريتها كانت بطريقة حلوة لا دي كانت بخناقة العالم كله اتفرج عليها، وكل شوية بتظهر فيها حلقة جديدة بتكشفها الصحف العالمية.
انفصال الفنانة شاكيرا ولاعب كرة السابق بيكيه، موضوع مطول معانا، وعامل زي ما يكون ضرس بيطلع من اللحم، لأن العلاقة كل ما يتسكت عنها شوية تظهر فيها تفاصيل جديدة تخلي الواحد مستغرب كل ده كان بيحصل ازاي.
في أواخر السنة اللي فاتت انتهت علاقة من أشهر العلاقات في العالم بين شاكيرا وبيكيه، ولكن النهاية كانت بخيانة وجرح كبير اتعرضتله الكولومبية الشهيرة، وده خلاها تحس بإهانة كبيرة وفضلت ترد عليها كل شوية بأسلوبها، والظاهر كدة إن جاتلها فرصة ترد وتنتقم بشكل أكبر.
اللي حصل إن شاكيرا قبل الانفصال اكتشفت إن بيكيه بيخونها، مع بنت صغيرة اسمها كلارا شيا، واكتشاف الموضوع ده كان بتفصيلة صغيرة يمكن بيكيه مكنش ممكن ياخد باله منها، وأي راجل عموما، لأن الرجالة ذكاؤهم محدود شوية في التفاصيل الصغيرة دي.
بيكيه ساب الدنيا كلها وخان شاكيرا في بيتهم، ولأجل الحظ المنيل حبيبته بتاكل مربى فراولة اللي هو مبياكلها ولا هو ولا ولادهم الاتنين ميلان وساشا، فلما شاكيرا رجعت البيت لقيت علبة مربى الفراولة شكت فيهم، وجابت محققين يدوروا ورا الموضوع ده، وبالفعل جابولها صور لبيكيه مع البنت الجديدة وحصل بينهم الانفصال.
طبعا بعد الانفصال شاكيرا فضل محروق دمها، فراحت عملت أغنية وشتمت بيكيه فيها، وفضلوا بقى هما الاتنين ينزلوا بوستات تلقيح وحاجات من دي، وكمان بقت شاكيرا تتخانق مع أم بيكيه لأنها كانت بتعمل بينهم مشاكل، وبما إنهم ساكنين جنب بعض، جابت مرة عروسة على شكل ست عجوزة ساحرة وجهتها ناحية بيت والدة بيكيه وشغلت الأغنية اللي بتشتم ابنها فيها وحوارات من دي، شغل عوالم بس برة يعني.
الكلام ده بيفكرنا بجعفر العمدة، لما كان بيقول لسيف في المسلسل «لما تيجي تسيب بيت عوالم لازم تخرج بمعلمة.. عشان لا تطلع متجرس ولا متعور»، المهم بيكيه اتعور واتجرس.
اللي حصل إنه بعد كل اللي عملته وبتعمله شاكيرا جاتلها الفرصة إنها تتشفى فيه أكتر لما نشرت الصحف العالمية، إن كلارا شيا حبيبة بيكيه بتخونه، ومعه مين؟ مع جوراديولا، مدربه السابق في برشلونة، تخيلوا الصدمة الكبيرة دي، وهي عملت كدة ردا على إن بيكيه بيخونها مع محامية شابة بتشتغل في واحدة من شركاته.
بيكيه طبعا ولا كلارا ردوا على الكلام ده، ولكن الكلام إن كلارا راحت مدرسة بنت جوارديولا واتعرفوا ملك التيكي تاكا على البنت الصغيرة.
الموضوع ده لحد دلوقتي لسة مثبتش صحته، ولكن لو طلع حقيقي فهيكون فرصة عظيمة لشاكيرا إنها تنتقم من بيكيه.
