مواقف كثيرة محرجة يتعرض لها الصحفيين والعاملين في الميديا مع النجوم ، دائماً عندهم مشكلة في التعامل معاهم إلا من رحم ربي ، وليس كل النجوم تقدر الميديا والصحفيين، الذين يتابعونهم في كل ما هو جديد لكي يقدموهم للجمهور، ولكن في المقابل قد يقابل ذلك معاملة لا تليق ، وهذا ما فعله أحمد شيبة مع الصحفيين.
الحكاية كلها ان احمد شيبة و عبد الباسط حمودة بيصوروا فيديو كليب اغنية جديدة ليهم ، وطبعا كلنا بنحب النجمين وبنعتبرهم حاجة كبيرة في الفن الشعبي وليهم جمهور كبيرجداااااا بيحب صوت شيبة ، وطرب عبد الباسط.
واللي حصل ان عدد كبير من الصحفيين راحوا يحضروا التصوير كجزء من طبيعة شغلهم الفني ، وكان المفروض يكون في لقاء يحصل بين الصحفيين واحمد شيبة وعبد الباس عشان يتكلموا عن الاغنية الجديدة ، وده شغل متعودين عليه وجمهور النجمين بيحب يشوفه.
لكن الصحفيين فضلوا قاعدين مدة اكتر من خمس ساعات في انتظار احمد شيبة عشان يقابلهم ويعملوا اللقاءات ، طبعا ده وقت كبير جدا ممكن يخليك تسيب الشغلانة كلها وتمشي .
حاول الصحفيين يستعجلوا شيبة وكلموا مدير اعماله وكمان مدير اعمال عبد الباسط ، لكن الرد مكنش في محله ، ورد عليهم مساعد شيبة وقالهم ” اصل الفنان نايم ” .
تخيل بقى لما تقعد خمس ساعات تستنى فنان عشان تصور معاه وتاخد منه كلمتين وتخلص شغلك وفي الاخر يطلع نايم وسايبك .. طبعا موقف لا يحسد عليه الصحفيين دول.
سوء تنظيم وعدم تقدير وطريقة تعامل مش لطيفة من الفنان احمد شيبة مع الصحفيين اللي جاين يعملوا شغلهم ، وهو مديهم معاد لكنه وصل متأخر 5 ساعات ودخل اوضته واعتذرلهم مدير اعماله بحجة انه نايم.
وبعدها بدأ الموضوع يتعرف على السوشيال ميديا ، وصحفيين كتير كتبوا بوستات على فيسبوك ع اللي عمله معاهم شيبة من قلة تقدير وطبعا البوستات والهجوم وصل لأحمد شيبة اللي مكنش متخيل انه هيحصل كل ده.
وعشان يلم الموضوع ، اتصل احمد شيبة بواحد من صحفيين الفن اللي كانوا موجودين في انتظاره خمس ساعت ، بعد ما كتب بوست انتقد فيه الفنان ، واعتذرله عن الموقف اللي حصل ، وطلب منه يبلغ باقي الناس اعتذاره
مش كل الناس تقبلت الاعتذار ، وطلبوا ان شيبة ينزلهم اعتذار مخصوص على صفحته أو بيان رسمي منه ، وتدخل عدد كبير من الزملاء عشان يصلحوا ما بين شيبة والصحفيين ويعتذرلهم بشكل شخصي ردا لاعتبارهم وكرامتهم
وكانت اخر اغنية قدمها شيبة في مسيرته هي اغنية الصعايدة اللي شاركه فيها الشاعر هشام الجخ ، والفنان عصام كاريكا ، وحققت اكتر من 2 مليون مشاهدة على يوتيوب.
احمد شيبة بدأ مسيرته وهو بيغني في الأفراح في اسكندرية لحد ماقدر يكون فرقة وبقى مطلوب في الحفلات والافراح ، وبعدين كمل المسرة دي بأغاني على يوتيوب كان منها اغنية اللي مني مزعلني ودي اللي اتشهرت لكن مكنش لسة الجمهور يعرف شكله.
وفي ليلة كان شيبة بيحضر فرح في المنصورة وبيغني ومسلطن الناس وطلع واحد قاله ” انت مية المية المية واسيادنا راضيين عليك” .. الجملة اللي شهرته اكتر وخلت الناس كلها عرفت احمد شيبة وبعدها حياته اتغيرت وبدأ يعمل اغاني تضرب وتسمع وكمان دخل مجال التمثيل وقدم كليبات في الافلام ، وعمل اغنية أه لو لعبت يا زهر اللي حققت 200 مليوووون مشاهدة.
