طلتها خفيفة وملامحها جميلة، نجحت في الصعود والظهور بسرعة، وهذا لأنها من الوجوه التي لها كاريزما، استطاعت خلال سنين قلية أن تضع اسمها بين الأسماء الكبيرة في المشهد الإعلامي المصري.
عندها شوية مشاكل بسيطة كدة ولكن الدنيا بتمشي، ما هي معروف عنها إنها مشاكسة، كمان الجمهور بيتابعها باهتمام ودايما بيعاكسها ويعلق على جمالها.. هي الإعلامية سهام صالح.
الإعلامية سهام صالح معروفة بإنها حسناء النادي الأهلي، وده بعد تقديمها برنامج البيت الكبير اللي بيذاع على قناة المارد الأحمر لمدة كام شهر ولكن التجربة مطولتش لأنها مشيت من القناة بعد الاستغناء عنها، واتقال كدة في الكواليس إن كان في خلاف بينها وبين مقدم الحلقات معاها الكابتن هاني رمزي، بسبب مقاطعتها ليه خلال الحديث، ولكن هي نفت الكلام ده، وقالت مفيش أي خلافات، وهو الأمر مجرد إن كل واحد فينا بيحاول يعمل شغله، لكن هو أخ كبير ليا.
سهام صالح مواليد 1991، وعاشت عمرها في الكويت لحد 2009، وكانت بتحلم تكون مضيفة طيران، وموضوع إنها تبقى مذيعة ده مكنش على بالها تماما، وهي بتقول إن كله جه بالنسبالها صدفة، حد قالها صوتك حلو وقناة الحرة طالبة ناس، روحي قدمي، وبالفعل عملت ده، وبتقول إن المفاجأة إن الكلام اللي قالته في الاختبار نزل في النشرة في نفس اليوم، وبالفعل اشتغلت مع قناة الحرة، وبعدها قدمت في التلفزيون الكويتي، وانضمت للعمل هناك لفترة من الزمن، قبل ما تنزل مصر، وتبدأ مسيرة جديدة.
بتحكي إنها كانت في زيارة لمصر عشان فرح حد قريبها، وبعدين توفى خالها، فقعدت أكتر، فحد من الأصدقاء قالها بما إنك في مصر جربي وقدمي في القنوات، مش هتخسري، وبتقول بالفعل إنها قدمت كمقدمة نشرات أخبار، ولكن طلعت القنوات أصلا مفيهاش نشرة، لحد ما قابلت صديق في مدينة الإنتاج، وكلم مسؤول كبير في أون تي في، واللي قابلها وبعدين اتعملها اختبار، واتقبلت وانضمت للقناة، عشا تعتذر للتلفزيون الكويتي وتبدأ مشوارها في مصر.
انتهت تجربتها مع أون تي في عشان تنضم لقنوات إم بي سي، وقضت فيها 7 سنين، ما بين 2012 لحد 2019، وقدمت مجموعة من البرامج زي «صباحك مصري» و«حديث المساء»، ولكن بسبب خلاف في وجهات النظر مع القناة وزي ما بتقول «أوضاع معينة معجبتنيش.. فكان لازم استقيل».
بعدها بشوية عرفت إن قناة الأهلي طالبة ناس، وبالفعل كلمت المسؤلين عن القناة، واللي رحبوا بيها، عشان تنضم لقناة الأهلي، وتكون كمان محبوبة الجماهير لحد دلوقتي، حتى بعد رحيلها عن القناة.
وكمان من النجاحات اللي حققتها في حياتها، إنه بسبب اجتهادها وموهبتها، قرر الإعلامي الراحل حمدي الكنيسي اختيارها عشان تكون وكيل أول نقابة الإعلاميين وقت تأسيسها، وده بعد ما كانت استضافته في أحد البرامج وعجبه أدائها، واختارها عشان تكون ممثلة عن القطاع الخاص، وكانت بتتوفر فيها صفات إنها وجه نسائي، وصغيرة في السن، وبتمتلك الموهبة.
سهام صالح معتادة تنشر صور خروجاتها، أو زياراتها على حسابها على إنستجرام، وكمان حسابها على فيسبوك، وبترد وتهزر مع المتابعين، ولما اتسألت عن المعاكسات اللي بتتقال في التعليقات من الجماهيرة، قالت «جمهور الأهلي هو اللي عنيه حلوة».
سهام صالح مش متجوزة، وبتقول إن مواصفات فتى أحلامها انه يكون راجل، مش مهم يكون مقضيها في الجيم، المهم إنه يكون راجل بمعنى الكلمة، ويكون بيحترم شغلها.
وفي أحد اللقاءات معاها، قالت إنها بعد السنين دي لو رجع بيها الزمن ولا هتشتغل مذيضيفى ولا مذيعة وشايفة إن فكرة ست البيت أحسن.
