مش هسمح لحد يقلل من تامر حسني ،ياترى هل هو حب جديد أم ماذا تريد ياسمين عز من نجم الجيل الذي خصصت له فقرة مخصوص في برنامجها وعملت نفسها المحامي الخاص به وظلت تدافع عنه وهاجمت مل من ينتقده.
كلنا عارفين ياسمين عز لما بتحط حد في دماغها مش بتسيبه ، وعندها عشق غير مبرر للدفاع عن الراجل المصري ، بس المرادي بقى مش اي راجل ده ابننا تامر حسني اللي هوشخصيا اتفاجئ ان ياسمين عز طالعة في التلفزيون ربع ساعة تمدح فيه وتدافع عنه وهو مش فاهم في ايه.
القصة كلها ان تامر عمل فيلم من قريب اسمه تاج ، وزي محنا متعودين تامر كل سنة او اتنين بيعملنا فيلم حلو وخفيف وليه جمهور كبير في السينمات ، لكن فيلمه الاخير تاج محققش النجاح اللي كان متوقعه تامر وبدأت الناس تنتقده وان الفيلم مكنش اد كدا يعني ، وده انتقاد مشروع وبيحصل مع اي نجم.
لكن بالنسبة للاستاذة ياسمين عز مقدرتش تتحمل النقد ضد تامر حسني وقررت تطلع تبقى هي المحامي بتاعه وتدافع عنه زي بقية الرجالة اللي بتكلمنا عنهم كل يوم في برنامجها.
هي قالت كلام منطقي وجميل في حق تامر حسني وهو اكيد مبسوط ان في حد بيدافع عنه في الميديا من غير ما يطلب ، لكن الطريقة بتفرق يا استاذة ياسمين.
ياسمين جت تمدح تامر فعكت الدنيا اكتر وقالت انه بيغني من وهي في المدرسة ، ولما دخلت الجامعة كان برضه بيغني وناجح ، ولما خلصت دراسة واشتغلت برضه فضل يغني ويمثل ومكسر الدنيا.
يعني استاذة ياسمين عايزة تقولنا انها اصغر بكتير من تامر حسني وبيغني من وهي طفلة في المدرسة ، ولما حست انها بتعك في الكلام قالت انا مش بصغر نفسي ولا بكبره هو كبير ومجتهد من زمان وده راجل عنده خبرة وممكن يألف أغنية وهو نايم او وهو بياكل السلطة.
كمان قالت ان مصر مفهاش فنان شامل واحد غير تامر حسني ومحدش يجي جنبه ولا يكسر مقاديفه والمفروض لما يعمل حاجة كلنا نشجعه مش ننتقده وهو اصلا مش مستني نجاح تاني لانه عمل كل حاجة ، غنى ومثل والف ولحن وهو اهم نجم في مصر.
وصلة مدح لمدة دقايق على الهوا من ياسمين عز للنجم تامر حسني ، لدرجة اننا افتكرنا ان كل دي مقدمة عشان تامر هيظهر معاها في الحلقة ولا حاجة ، والناس كانت مستغربة هي ليه محموقة اوي كدا على تامر ، ماهو ياما اتعرض لهجوم هو وغيره من النجوم الكبار ودي مش اول مرة ، وتامر ذات نفسه لا بيعلق ولا بيرد ولا بيفرق معاه ومكمل في حياته عادي
بس طبعا ياسمين عز بتحاول تقف جنب تامر خاصة بعد انفصاله عن المغربية بسمة بوسيل ، واكيد هي شايفة انها هي الخسرانة وانها مقدرتش تحافظ على بيتها وراجلها وعيالها ، ومحدش كان هيدافع عن تامر ضد بسمة احسن من ياسمين عز بس الحمدلله هي مجابتش سيرتها وسابتها في حالها.
ياترى بعد ده كل تامر ممكن يطل في حلقة مخصوص مع ياسمين عز ؟ وهل هي كانت بتمهد لكدا فعلا خاصة وان تامر مش بيظهر في برامج خالص الا نادراً ، لكن ياسمين عندها خطة وعايزة تستضيفه خاصة بعد انفصاله عن بسمة بوسيل عشان دي بالنسبالها فرصة تعمل فيها حلقة نار مع تامر وهتضمن بيها مشاهدات بالملايين، فيمكن بتحاول تجر رجله عشان يطلع معاها لانه مش بيظهر في برامج توك شو ، ومظهرش غير مع منى الشاذلي واسعاد يونس.
بس دي مش اول مرة ياسمين تتكلم عن تامر حسني ، لكن من فترة قالوا لبعض كلمتين حلوين على انستجرام ومن وقتها وهي نفسها تستضيفه وتعمل الحلقة اللي نفسها فيها خاصة ان اليومين دول بتوع تامر ومكسر الدنيا حفلات وفيلم واحداث كتير في حياته.
من فترة استضافت ياسمين عز الفنان مسلم ، وشاف الحلقة تامر حسني ونشر على ستوري صورة من الحلقة وكتب كلمتين حلوين لمسلم ، وكمان قال كل الشكر للجميلة ياسمين عز.
وطبعا ياسمين مضيعتش الفرصة ورجعت نشرت الستوري على حسابها وردت على تامر وكتبت : انت اسطورة .. نجم الجيل وكل جيل.
ياترى خطة ياسمين هتنجح في جر رجله تامر حسني ؟
