تقريبا الوطن العربي كله يتابع مسلسل الثمن ، الذي عرض في شهر فبراير الماضي وجميعنا نريد أن نعرف نفس القصة التركية من جديد لكن في الشكل العربي.
مسلسل التمن اصلا هو نفسه مسلسل ويبقى الحب التركي ، اللي اتعرض سنة 2009 على التلفزيون وحقق نجاح كبيييير ، ولما اتعاد تمثيله من تاني لكن بشكل عربي بعد اكتر من 20 سنة ، برضه الجمهور اتفرج عليه وحبينا نشوفه بشكل جديد ومختلف ، وفعلا المسلسل حقق نسبة مشاهدات عالية جدا في الشهور اللي فاتت.
بدأ مسلسل التمن ولحد تقريبا الحلقة ال60 اتوقف عشان بدأت مسلسلات رمضان ، وبعدها رجع عرض المسلسل من تاني والاحداث بقت مشوقة اكتر بعد مرض كرم.
من اول حلقة لفت نظرنا اداء النجم باسل الخياط بطل المسلسل اللي عامل دور زين ووقع في حب سارة من اول نظرة ، واللي عملت دورها الفنانة رزان جمال.
ورغم ان المسلسل حقق نجاح من الحلقة الاولى الا ان كان في تعليقات كتير بخصوص اداء الفنانة رزان جمال من اووول مشهد ، والمفروض انها بتقدم نفس شخصية البطلة التركية الاصلية في مسلسل ويبقى الحب لكن بطريقتها وادائها.
وده خلى الجمهور يهاجمها كتير واتقال انها مش بتأدي احسن ماعندها ، وبعض المشاهد بيكون رد فعلها فيه مش زي ما المشهد محتاج ، مثلا زي الانفعالات والعياط والصدمات ، كلها حاجات بتعملها رزان بنفس الاداء وتعبيرات الوش.
وللاسف من اول عرض المسلسل ده كا التعليق الاكتر انتشارا على البطلة ، ورغم انها جميلة وملامحها رقيقة وكلنا حبيناها الا ان مشاهد كتير حسينا انها ادية زيادة عن اللزوم وكان المفروض تقدم ردود فعل مختلفة عن كدا.
وفضل المسلسل يتعرض لحد تقريبا الحلقة 59 واتوقف في رمضان مؤقتا ، وبعد ما رجع استكمال العرض سمعنا ان في خلاف حصل خلال الفترة اللي فاتت بين ابطال المسلسل باسل الخياط ورزان جمال.
باسل كمان وصله نفس الاحساس اللي وصل للجمهور ، وبدأ يعترض على اداء رزان في كتير من المشاهد ، خاصة وان هو اصلا بيعرف يوصلك الانفعال والتأثر بشكل كبييييير ومحترف في الحتة دي في كل اعماله ، عشان كدا بدأ يحس ان رزان معندهاش نفس الاداء المطلوب في كتير من مشاهدها زي ما حصل في المسلسل التركي.
وبحسب التصريحات اللي اتقالت ، فباسل الخياط معترض تماما على اداء رزان ووصفه بانه اداء بارد وسيئ وغير مرضي ليه كفنان.
مش بس اعترض وقال رأيه ، لا ده باسل الخياط خد موقف كبير ، وامتنع عن تصوير المسلسل لمدة 15 يوم في تركيا لحد ما الوضع يتحسن ورزان تقدر تقدم اداء افضل من كدا قدامه لانه شايف ان المسلسل كدا بيفشل بسبب ادائها وهو البطل ومتعودتش يعمل حاجة وتفشل ، وطبعا وصله كل تعليقات الجمهور على السوشيال ميديا بخصوص اداء رزان وفعلا ركز في الموضوع واكتشف انه صحيح وخد موقف.
كمان طلب باسل الخياط تقليل عدد مشاهد رزان جمال في الجزء الباقي من المسلسل ، وفعلا شركة الانتاج وافقت على طلبه عشان يرجع يكمل تصوير ، واضطرت الشركة انها تحجم مشاهد سارة على اد ماتقدر ، وظهرت الممثلة اللبنانية ميرفا القاضي اللي طلعت في دور صاحبة زين وكرم ، وبدأ يبقى ليها مشاهد كتير في المسلسل ، ده خلى مشاهد سارة قلت كتير عن الاول.
والجمهور مكنش متوقع ظهور ميرفا القاضي وانها خدت حجم كبير في المسلسل بالشكل ده ، وناس كتير قالت ان ده اثر بشكل سلبي على المسلسل وخلى قصة سارة وزين الابطال تتغير ومنبقاش متحمسين ليها زي الاول.
كمان التعقيد والتصاعد اللي حصل في علاقة سارة وزين في الحلقات الاخيرة خلى الناس مش عايزة تكمل القصة ، وبعد مرض كرم وموته بالسرطان من غيرما زين يعرف عقد الاحداث اكتر ، ومش عارفين هل ينتهي الثمن بنفس نهاية المسلسل التركي الاصلي ويبقى الحب وهيرجعوا لبعض في الاخر ، ولا هيتم تغيير النهاية في المسلسل الجديد بعد موت كرم ومشاكل سارة وزين ؟
كلها كام حلقة ويخلص مسلسل الثمن ونعرف النهاية.
