بعد 20 يوم من الجدل والبيانات المختلفة بخصوص حالة المطربة “شيرين عبد الوهاب”، وهي كثرت بعد “التسريب الصوتى” المنسوب إليها الذي انتشر من عدة ساعات، وطلبت فيه من المحامي الخاص بها أن يساعدها في الخروج من المصحة، وتستكمل علاجها في المنزل، ومن دقائق قليلة خرج علينا “نقيب الموسيقيين” الفنان مصطفى كامل ليحسم الجدل بخصوص حالتها الأخيرة، وتحدث عن فترة النقاهة التي ستقضيها “شيرين” الأيام اللي جاية!
“مصطفى كامل” طلع بيان بصفته نقيب للموسيقيين بخصوص خروج الفنانة “شيرين” من المستشفى النهاردة قال فيه إنه بيطمن كل الجمهور المصري والعربي وكل اللي ساند ودَعم المطربة الكبيرة الصوت المصري المشرف”شيرين عبد الوهاب”، ودعوا إن ربنا يشفيها احنا بنطمن الكل هي بقت بخير وطلعت بالسلامة من المستشفى ودلوقتي هي في بيتها”.
“نقيب الموسقيين” قال في بيانه الموجه للجمهورين المصري والعربي “اطمنوا شيرين عبد الوهاب في بيتها حالاً، وتم الاتصال بها تليفونياً في مكالمة استمرت أكتر من نص ساعة، ودلوقتي بقت بكامل صحتها ولياقتها ومحتفظة بابتسامتها الجميلة، وقريب أوي بإذن الله هتمتع جمهورها وتُشجي الجميع بصوتها، وأغانيها كجمهور مصري وعربي “.
كان المستشار “ياسر قنطوش” قال في تصريحات صحافية إن “شيرين” طلعت بالفعل صباح اليوم الخميس من المستشفى وهي بصحة جيدة، وبتقضي فترة النقاهة في بيتها تمهيداً للاستعداد لأول حفل غنائي لها قريباً.
الكلام كان كتير أوي بخصوص حالة “شيرين” خاصة بعد “التسريب الصوتى” المنسوب ليها وكلمت فيه محاميها “ياسر قنطوش” طلبت منه يعمل أي حاجة ويخرجها من المستشفى علشان تقضى فترة علاجها في البيت، وقالت إنها بقت كويسة كمان ومش عاوزة تقعد أكتر من كدة.
التقارير الأخيرة عملت حالة جدل على وسائل التواصل الاجتماعي لأن “شيرين” قالت في تسجيلها إنها بقت كويسة واستجابت للعلاج خلال مدة احتجازها في العشرين يوم اللي فاتوا، وقالت إن “إدارة المستشفى” مضتها على ورق ماتعرفش ده ورق إيه على حد تعبيرها، لكن محاميها طلع وقال “إن الورق ده عبارة عن إقرار بتوقيع شيرين بموافقتها على العلاج لفترة تانية جوة المستشفى.
وبعد خروج “شيرين” من المستشفى عدد كبير من جمهورها بيسأل “يا ترى امتى أول حفل غنائي هتعمله خاصة إن آخر حفل لها، كان من المفترض تحييه في دولة “الكويت”، لكن تم إلغائه بعد دخولها المصحة، فهل يا ترى هترجع شيرين تغنى في “الكويت” على اعتبار إن آخر حفل لها كان المفروض يبقى هناك، كمان الشركة المنظمة لحفلها قررت تأجله لأجل غير مسمى من غير ما تحدد ميعاده.
“ازاي شيرين خرجت من المستشفى وهل خفت خالص وبقت كويسة؟ ده السؤال اللي بيردده عدد كبير على السوشيال ميديا بعد نشر خبر خروجها من المصحة، لكن التقرير الصادر من المجلس القومي للصحة النفسية بخصوص حالة “شيرين” واللي صدر من “لجنة طبية” مختصة من المجلس القومي للصحة النفسية قال “إن شيرين تعافت وبقت بصحة جيدة ومستقرة، ومش محتاجة علاج إلزامي بالمستشفى.
التقرير قال كمان إنها بقت بصحة كويسة وكمان بقت متزنه نفسياً وتم ارسال التقرير اللي يبيستوجب خروجها من المستشفى للنيابة العامة اللي وافقت على خروجها، وده دليل على إن الكلام اللي قالته بارغامها علي انها تقعد في المستشفى وتوقيعها على أوراق متعرفش عنه حاجة “ده كلام مش حقيقي”، بدليل موافقة “اللجنة الطبية” على خروجها وكتبت ده في تقريرها”، فإزاي بقى شيرين قالت إن المستشفى بتجبرها تقعد فترة كمان ومضتها على ورق متعرفش عنه حاجة؟.
خروج “شيرين” من المستشفى فرح عدد كبير من جمهورها وكمان الوسط الفني ومن المفترض إنها هتطلع في فيديو تكمن بيه جمهورها على صفحتها الشخصية بانستجرام بعد قليل يا ترى شيرين هتقول ايه، وايه الرسالة اللي هتوجهها؟.. هنشوف.
