هي في الأصل مغنية، لكن عمر ما كان غناها سر شهرتها، قد ما كانت دماغها وكلامها وأفكارها، هي شخصية غريبة بشكل كبير، ناس بتقول إنها بتتعمد الإغراء، ولكن هي بترفض هذا، ورغم اهتمامها بإطلالتها وشكلها، إلا إن الأكثر إثارة للجدل، هو عقلها.. وكان آخرها حديثها عن أهوال يوم القيامة.. هي شمس الكويتية.
هي شمس بندر نايف الأسلمي، اتولدت في 28 أبريل 1980، مغنية كويتية سعودية الأصل، ولكنها اتنازلت عن جنسيتها الكويتية وخدت جنسية سانت كيتس ونيفيس، وده عشان تقدر تتكلم براحتها وتلبس براحتها، لأنها شايفة إنه بالجنسية العربية ممكن أي حد يرفع عليها قضية فجور ويكسبها، ولكن مع ذلك قالت إن ولائها الكامل للكويت.
بدأت مشوارها الفني سنة 2001 بألبوم باسم حبيب الورد، واستمرت أعمالها الفنية لسنين طويلة، كان ليها بعض التجارب التمثيلية البسيطة، ولكن آخر حاجة تعاقدت عليها كان مسلسل «سره الباتع» للمخرج خالد يوسف.
شمس الكويتية معروف عنها إثارة الجدل، ولكن هي مش من النوع اللي بيطلع يقول كام تصريح على الهوا والناس تشيرهم بس، لأ، هي شخص بتاع أفعال غريبة، وجريئة، والجرأة هنا مش مقصود بيها لبس ورقص، وهي بتظهر كدة كتير، ولكن منها مثلا زيارة فلسطين، وتحديدا الجزء المحتل، عشان تحصل على «قفلة العلوم» أو خاتم العلوم يعني، من دكتور اسمه نادر بطو.
من فترة قريبة ظهرت شمس في مقطع فيديو وهي بتعلن زيارتها لفلسطين، عشان تقابل دكتور اسمه نادر بطو، وهو جراح فلسطيني، متخصص في مجال القلب، ومخترع فرع في الطب مسمية «الطب الشامل الموحد» وهو علاج حسب ما هو بيقول، بيربط بين الجانب العلمي والنفسي والروحي، والمفروض إن شمس احتاجت فترة 4 سنين عشان تقدر تاخد معاد من الدكتور، اللي ساب العمل في المستشفيات من 2019 عشان يتفرغ لعيادته، ويطور العلم اللي هو شغال عليه.
شمس قالت إنها مسافة هناك للعلم والعلاج، واتعرضت لانتقادات كتير، خصوصا إن الدكتور عايش في الجزء المحتل من أرض فلسطين، وطبعا معروف الأمو الخاصة بالتأشيرات ودخول البلد، وازاي رد الفعل بيكون من ناحية التطبيع وخلافه.
ولكن شمس بجرأتها المعتادة سافرت وعملت اللي هي عايزاه، ووعدت المتابعين ليها بنشر فيديوهات تعليمية.
وبمناسبة التعليم، هي بتقول إنها درست علوم كتير، وبغض النظر عن دراستها الأولى في معهد الفنون الموسيقية بالكويت، اللي هو مجالها الأصلي، هي بتقول إنها درست علم نفس، ودرست مايكروبيوتك، وساعات بتطلع تعمل فيديوهات عن طريق علاج القولون وبعض المشاكل الطبية، وحاليا هي بتدرس خاتم العلوم مع الدكتور نادر بطو.
ومن سنتين أعلنت إطلاق موقعها الإلكتروني للاستشارات الصحية في علاج الأعراض النفسية والمشاكل مثل: السمنة، النحافة الزائدة، الأمعاء، تنظيف الكبد، الغدة الدرقية، الشعر والبشرة وكل ما يتعلق بعلم الرايك.
آخر تصريحات شمس المثيرة للجدل، هو إنها بتقول إنها بتحلم بأهوال يوم القيامة، وكمان بتقدر تعرف امتى الشخص هيموت، وطبعا دي من الغيبيات، وده يقربنا شوية يمكن من بعض الأمراض النفسية الخاصة بالذهان والفصام، والشخصيات اللي بتطلع تدعي النبوة.
كمان شمس الكويتية كان ليها رأي في تفسير حور العين، إن مفيش حاجة من دي، وإنها معترضة على التفسيرات بتاعة الشيوخ في الموضوع ده.
