في نهاية التسعينات قررت فجأة إن تعتزل الفن، وتبدأ حياة جديدة، وترتدي الحجاب، لكي تسير في مسيرة سبقتها لها فنانات آخرين اعتزلوا مثل شادية، وتحية كاريوكا، وشمس البارودي، لكن هي حكايتها مختلفة عنهم، لأنها رجعت في القرار بعد سنين، واعتبرت إن هذه فترة انتهت في حياتها، وأيضا ارتبط اسمها وقرار اعتزالها بالشيخ الشعراوي.. هي سهير رمزي.
هي بنت بورسعيد، اشتغلت مضيفة طيران طيران وعارضة أزياء، دخلت مجال الفن من طفولتها، وكان أول عمل شاركت فيه وعمرها 6 سنين فيلم «صحيفة سوابق»، مع الوقت كبرت وبقت من أهم نجمات السينما المصرية، وفي فترة السبعينات وما بعدها كانت من النجمات المصنفات بأدوار الإغراء، وقدمت ده كتير في مسيرتها الفنية اللي توقفت بعد كدة في التسعينات.
الفنانة سهير رمزي، المولودة سنة 1950 في بورسعيد، قصة اعتزالها وابتعادها عن عالم التمثيل ولبس الحجاب، كان ليها أكتر من تأويل، ولكن في مرة من المرات كشفت إنها كانت بتحضر درس بعد زلزال 1992، لياسمين الخيام وكان متواجد بقى عدد من النجمات المعتزلات زي شادية وسهير البابلي، وكان كل الموجودين محجبات معادا هي.
سمعت الدرس وحست إن الكلام كله متوجه ليها، والدرس ده كان بيتكلم عن الحب في الله، وإن إزاي نقرب من ربنا، ومن أول الحاجات دي إننا منلبس لبس ضيق، أو نظهر في السيما بملابس عريانة، وكان كل اللي في دماغها في الوقت ده، إنها هتخرج من الدرس تروح المسرح تلبس لبس عريان، فانهارت فقعدت تبكي، وطلبت منهم إنهم يغطوها.
بعدها طلبت من ياسمين الخيام، إنها تبلغ الصحافة بإنها خلاص اعتزلت ومش هترجع تاني عن القرار ده، وخرجت من الدرس سافرت السعودية وقعدت في مكة، وفضلت تدعي وتبكي وتتعبد، وفعلا قدرت إن هي تستمر على القرار ده أكتر من 20 سنة.
في كل ده الشيخ محمد متولي الشعراوي مكنش ليه علاقة بالموضوع، غير مرة في لقاء قابلته وقالتله على الموضوع فقالها لو هتمثلي قدمي أدوار تفيد الناس، وقالت إن كلامه أثر عليها لكن مكنش هو السبب في قرار الاعتزال والحجاب.
ومن بعد اعتزالها كانت طول الوقت بتسأل الشيخ الشعراوي، وبتعتبره أهم شيخ في حياتها، وكانت دايما بتستشيره في أمورها.
سهير رمزي قدرت إن هي تستمر على قرار الاعتزال لفترة طويلة ولكن بعد سنين وتحديدا في 2006، رجعت تاني تمثل بالحجاب في مسلسل «حبيب الروح»، وبعدها ظهرت في مسلسل «قصر العشاق» باردو بالحجاب، قبل ما تقرر تقلع الحجاب بقى في مسلسل «القاتل الذي أحبني» وتعتبر دي مرحلة من حياتها وانتهت.
وبتستعد للظهور بمسلسل جديد في الموسم الرمضاني 2023 وباردو من غير الحجاب وهو بعنوان «ليل أم البنات».
الفنانة سهير رمزي مندمتش على المشاهد اللي قدمتها، ولما اتسألت هل لو تقدر تحذفها هتعمل ده؟ فقالت لأ.. أمسح تاريخي ليه؟ دي حاجات أنا عملتها وكانت مشاهد جريئة في سياق الدرامة، وإن كانت قالت إن في بعض الأعمال قدمتها كانت تافهة شوية ومالهاش قيمة، ولكن كانت بتعمل ده عشان الانتشار.
