وكالعادة وبكل سعادة ومثل كل سنة، رجع رامز جلال بمقلب جديد، ومصيبة جديدة يقع فيها زملائه في الوسط الفني والرياضي، وبعد كل موسم يعتقد الناس أن رامز انتهى ولم يوجد لديه فكرة جديدة ولكننا نتفاجئ بأفكار جنونية أكثر من المواسم السابقة.
رامز نيفر إند.. خلاص سلمنا وآمنا واتأكدنا إن الجنان اللي على أصله راجع.. والمرة دي عدى كل الحدود.. رامز جلال مرمط زمايله وبهدلهم.. وكمان سبب لهم جروح بسبب المقلب بتاعه في رمضان
نشر رامز جلال بوسترات مقلبه الجديد السنة دي.. والناس بقت محتارة هو هيعمل ايه؟.. والثور اللي راكب عليه ده هيروضه ازاي.. يا لهوي هو هياكل الفنانين بجد ولا ايه؟.. بس الحكاية مش كده خالص
رامز جلال كعادته بيقدر يوقع النجوم والمشاهير في مقلبه بسهولة.. والسنة دي هيقولهم أو مش هو اللي بيقول يعني الناس اللي شغاله معاه.. تعالوا أنا عازمكم على افتتاح مطعم جديد.. وطبعا هيروحوا دي السعودية.. وفلوث يا مان
بس.. هيروح الزبون من دول ويفتكر نفسه بيتصور عشان الافتتاح.. والمطعم والشياكة والأناقة.. وفجأة يلاقي الثور داخل عليه.. وتبدأ رحلته معاه من البهدلة والمرمطة والشقلبة
في 100 مليون مصري هيفرحوا في الحكم بتاع الكورة إبراهيم نور الدين اللي مشاكله كتير.. ورامز جابه عشان ياخد منه حق النادي الأهلي اللي مبوظله كل ماتشاته
الفنانة نسرين أمين قالت إنها المرة التانية ليها اللي تشارك في برنامج رامز جلال.. لكن المرة دي أصعب بكتير من اللي حصل قبل كده.. وإنها اتبهدلت واتعورت.. وإنه مقلب جامد ومش سهل ومش أي حد يستحمله”
في البوستر التاني اللي نشره رامز جلال عن المقلب بتاعه السنة دي.. ظهر ماسك سلاح وفي فناجين وأطباق بنطير.. وشكله كده هيدمر ضيوفه.. وصارف ومكلف جامد السنة دي
اللي محدش يتوقعه بقى إن المخرج حسام الحسيني داخل مع رامز جلال في المقلب السنة دي.. وإن كان رامز مجنون قيراط.. فا حسام معداش على العقل أصلا.. وتعاونهم سوا جه على دماغ زمايلهم في الوسط الفني
معنى إن رامز نشر البوستر وفضح المقلب إنه خلص تصوير حلقات البرنامج.. وقدر يوقع حوالي 30 نجم مشهور سواء في الكورة أو الفن في شر أعمالهم.. خصوصا إن الفترة اللي فاتت ناس كتير منهم كانت موجودة في السعودية لأسباب كتير منها الحفلات والمسرحيات
متوقع نشوف نجوم زي شيماء سيف ومحمد هنيدي وأحمد حلمي وريم مصطفى.. ده يمكن نشوف السنة دي أحمد السقا في مقلب رامز جلال.. لإن كل دول شغالين في السعودية مؤخرا.. وعملوا مسرحيات كتير وكانوا متاحين لدعوتهم لحدث زي ده.. هنشوف وربنا يستر.
