أحيانا تجد شخص ينجذب للشخصيات السامة او ما نطلق عليها توكسيك، وذلك دون ان يفهم الآخرين ما سبب هذا اانجذاب، وهذا ظهر في دراما رمضان في مسلسل جعفر العمدة.
من بداية شهر رمضان بيتعرض مسلسل جعفر العمدة، وخلينا نقول إن هو من أنجح الأعمال جماهيريا إن لم يكن هو أنجحهم طبعا، وده لأنه قادر يجذب قطاع كبير من الجمهور، متفاعل مع حكاياته، سواء كان الجمهور العادي بقى على القهاوي وفي الشوارع، أو حتى السوشيال ميديا، سواء كانوا بيتريقوا أو معجبين، ففي النهاية العمل بإفيهاته بشخصياته عامل تأثير كبير.
بطل المسلسل زي ما كلنا عارفين هو محمد رمضان، وهو متجوز أربع ستات بدأت بواحدة وهي ثريا اللي بتلعب دورها مي كساب، وبعدين دلال فتح الله واللي بتلعب دورها إيمان العاصي، وبعدين نرجس اللي بتلعب دورها منة فضالي، والأخيرة هي عايدة اللي بتلعب دورها زينة.
هنلاحظ إنه خلال أحداث العمل الأربع شخصيات المرتبط بيهم محمد رمضان، وبغض النظر عن فكرة إن الجواز من أربعة دي حاجة توكسيك في حد ذاتها، وكفيلة بإن هي تجننه، هنلاقي إن مؤلف العمل ومخرجه محمد سامي قرر إن هو يخلي كل واحدة فيهم عندها مصيبة في حياتها، ومفيش ولا واحدة فيهم علاقة طبيعية متزنة زي أي اتنين عاديين.
الزوجة الأولى ثريا واللي بتلعب دورها الفنانة مي كساب، دي بقى قصة لوحدها وهي من عيلة صبحي ترموستات، واللي محمد رمضان بيعايرهم كل شوية إنهم نسب مش مناسب، وفوق كل ده بقى إيديها طويلة، عندها داء السرقة، يعني أي حاجة تلمحها تسرقها حتى لو عايزاها، وكمان من أحسن الناس اللي تعمل تصرفات غبية وترجع تعيط.
الزوجة التانية بقى ودي أصلا أزمتها تقريبا جزء من الصراع الرئيسي في المسلسل، ودي بقى شخصية دلال اللي بتقدمها الفنانة إيمان العاصي، ودي من عيلة فتح الله، ودول بقى بينهم وبين جعفر ما صنع الحداد، قتل وحبس وتار وقصص كلها بلاوي، اللي هو يقولك لما تتجوز واحدة شوف عيلتها، جعفر عامل حاجة مالهاش علاقة بالمنطق تماما.
الزوجة التالتة لجعفر العمدة هي منة فضالي، واللي بتلعب شخصية نرجس، ونرجس دي فيها أهم الموبقات في الدنيا كلها وهي إنها هي وأمها ماشيين في طريق السحر والشعوذة والجنان والحاجات اللي من النوع ده.
والزوجة الرابعة بقى، عايدة، واللي بتلعب دورها زينة، فهي واحدة أبوها ماشاء الله سجين، قبل طبعا ما يموت في المسلسل، وهي بتحاول تنصب عليه عشان تاخد منه الفلوس وتمشي وتسيب البيت، وهو عايش معاها وعارف إن هي مش بتحبه، فوق كل ده هي الواحيدة من زوجاتها اللي مش محجبة، ولا بيقولها بتلبسي ايه ولا أي حاجة خالص.
الحقيقة محمد سامي عامل شخصية جعفر العمدة فيها تسامح غريب جدا مش متناسب مع معلم كبير من السيدة زينب.
