اقتربت رأس السنة، والي يفضل العديد أن يحضر حفل خلالها، ونجد أن معظم الفنانيين يشاركون في تلك الحفلات، ولكن حفلات هذا العام مختلفة عن الأعوام السابقة، وأجور خيالية للفنانيين سنتعرف عليها من خلال التقرير التالي ونعرف من الأعلي سعرا من الفنانيين.
طبعا كلنا عارفين ان احتفالات راس السنة بتبدأ من أخر شهر ١٢، لحد ما تخلص اعياد اخواتنا المسيحين في اول شهر يناير، والفترة ديه بتبقى موسم مهم اوي للمغنيين، الحفلات فيها سعرها بيبقى اغلى من اي وقت تاني.
والاسعار ديه سواء جوة مصر ولا برة مصر،يعني لو بدأنا الهضبة عمرو دياب، وهيكون ليه حفلة في ليلة راس السنة، بس في أقاويل كتير ما بين انه هيعمل في مصر ، او برة مصر خالص
لانه كل سنة بيكون في دبي، عرفنا ان أجره في حفلة ليلة رأس السنة بيتراوح بين ٢٠٠ ألف دولار ل ٥٠٠ ألف دولار ، و طبعا ان أجره بقى عالي كده اكيد التذكرة هتكون غالية جدا .. وحتى وسعر التذكرة عالي بردو بتكون خلصانة من قبل ايام من الحفلة
اما الفنانة هيفاء وهبي قررت انها هتحيي حفلة ليلة راس السنة في مصر بردو، و اتفقت على أجر ١٣٠ ألف دولار .. لا متستغربوش ده لسه في ارقام تانية كتير.
طبعا بعد الارقام الخرافية ديه وائل جسار قال طب و اشمعنى انا،وهوب رفع اجرة في حفلة ليلة راس السنة ..فبعد ما كانت السنة اللي فاتت ٤٠ ألف دولار ..السنة ديه بيتراوح بين ٥٠ ل ٧٠ ألف دولار .. في مصر بردو .
اما ابن بلدنا الفنان محمد حماقي عرفنا ان أجره في حفلة ليلة رأس السنة وصل ٥٠٠ ألف جنية بعد ما كان السنة اللي فاتت ٤٠٠ ألف جنية .
اما الحفلات اللي خارج مصر، فقرر الفنان راغب علامة يحيي حفلته في دبي مقابل ٩٠ ألف دولار، الاجر ده أزيد من السنة اللي فاتت وكان اجره ٨٠ ألف دولار .
اما بقى البرنس اللي هيقدم لاول مرة حفلة راس السنة في مصر السنة ديه .. الفنان محمد عبده، و اللي من اول ما اعلنوا ان ليه حفلة في مصر .. واحنا بنسمع عن اسعار تذاكر الحفلة وصلت ل ١٧ الف جنية … انتو متخيلين ان سعر التذكرة بالمبلغ ده ، فاكيد الاجر خيالي.. علشان كده غير معلن عنه تماما.
بس الفترة اللي فاتت اعلن الفنان محمد عبده انه اتعرض لوعكة صحية بسيطة، و اكد ابنه انه خرج بالسلامة من المستشفى .. وان مفيش الغاءات حصلت لاي شغل خاص بالفنان محمد عبده .
طبعا ديه كانت نظرة بسيطة على عدد قليل من الفنانين اللي هيحيوا حفلات راس السنة في اماكن معروفة.. غير الحفلات الخاصة .. و الافراح .. و ربنا يزيد و يبارك .. كل سنة و انتو واحنا طيبين.
