أعلن الفنان محمد صلاح، أنه يعاني من حالة نفسية سيئة بسبب عدم عرض أدوار فنية عليه منذ سنوات، وذلك خلال تصريحات صحفية.
وقال محمد صلاح: بقالي كام سنة على الحال ده وحاجة تجنن، ومحاولتش أكلم حد، لأني شاركت مع نجوم مصر في أعمال مهمة، ولكن الجيل بتاعنا من المخرجين ومساعدين الإخراج وشركات الإنتاج كلهم مش بيشتغلوا، وكل اللي بيشتغل حاليًا صغير، لكن الناس القُدام في البيوت.
وتابع محمد صلاح: عندي معاشي من التلفزيون ونقابة المحامين، لكن التمثيل شغلي وحياتي كلها وزعلان على أوقاتي اللي كنت بقضيبها في المسرح، وده مأثر عليا نفسيًا، المادة بالنسبة لي مش مهمة، طالما الدور حلو، وأنا في بدايتي قعدت سنين اشتغل ببلاش وكنت محامي وليا اسمي ووضعي وكنت برفض اشتغل كومبارس وشاركت في أعمال حلوة.
واستكمل: الوسط الفني مفيش حد فيه بيفكر في حد، وكله بيقول نفسي، وأنا كرامتي ما تسمحش ليا أني أطلب من حد شغل، على الرغم من أني عارف الناس كلها وعلاقتي بيهم زي الفل.
واستطرد: بدايتي كانت على المسرح القومي وأول مسرحية شاركت فيها كانت مسرحية أهلا يا بكوات، مع عزت العلايلي وحسين فهمي واشتغلت معاهم تلات سنين، ودوري كان صغير ولكن عمل بصمة، واشتغلت سينما مع نادية الجندي وعزت العلايلي ونجوم كبار، وشاركت في ليالي الحلمية ورأفت الهجان وغيرها من الأعمال.
اقرأ أيضًا: مفاجأة عن سداد كهربا غرامته للزمالك بالجنيه المصري
