نفسها ربنا يهديها وتلبس الحجاب،ولا تريد أن تظهر مفاتن جسمها لأحد، تصريحات مفاجئة لياسمين صبري كانت صدمة لناس كثير، خاصة بعد حديثها عن الحجاب والابتعاد عن هذه الأجواء.
بس يا ترى هل معن كده إنها هتعتزل؟ وهل الموضوع له علاقة بانفصالها عن أبوهشمية؟ وهل ممكن ترجعله لو عملت كده؟ كل ده وأكتر هنعرفه في التقرير التالي:
أنا نفسي ربنا يهديني وألبس الحجاب أكيد، عشان أنا مسلمة وده فرض من ربنا في شريعتي.. ده كان جزء من تصريحات الفنانة ياسمين صبري اللي اتكلمت فيها عن نيتها في لبس الحجاب والابتعاد عن الأجواء اللي عايشة فيها.. مش بس كده دي نفت إنها قالت في يوم إنها بتخاف على نفسها، لكنها مؤخرا بدأت تشوف إن نفسها عزيزة عليها جدا وبدأت تحرّص على حياتها.
بتفكر تلبس الحجاب
خافت ياسمين على نفسها كامرأة وقالت إنها أول مرة في حياتها لما تشتغل في عمل فني تحاول تخفي جسمها بالهدوم على أد ماتقدر، لأنها خافت إن مفاتنها تلفت الأنظار ليها، وإن حد يبص ليها على إنها مجرد مفاتن بس، عشان كده هي صرحت بإنها بتفكر حاليا تلبس الحجاب، وخايفة جدا من إنها تكون عند ربنا سيئة وبتلفت الأنظار بلبسها ومفاتنها.
ملكات العالم بيحتشموا بالحجاب
كمان رفضت ياسمين صبري إن ملكات العالم هما بس اللي يحتشمو بالحجاب، وقالت إن أي ست بتعتبر نفسها ملكة بتلبس الحجاب وخصوصا إنها شخصية طبيعية وهادية وبيتوتية وبسيطة وانطوائية ومش بتهتم بالأضواء، وعلى العكس هي بكتفي بأصدقائها من قبل الشهرة خاصة لأنها مش بتثق بسهولة في الناس، وكمان هي بتخاف تدخل ناس جديدة حياتها عشان ميكونش قربهم منها فيه مصلحة.
بتسمع حلقات قرآنية
ياسمين صبري قالت كمان إن ربنا خلقها خليفة في الأرض، وإن الكون كله متسخر عشان يخدمها، وهي مؤمنة جدا بإنها تقدر تتحكم في كل حاجه حتى الجماد اللي ربنا خلقه بيخدمها، وعشان هي ست مؤمنة فاتعلمت تربط كل حاجة بتعملها بالدين وتشوف رأي الدين قبل ماتعمل أي حاجة، مش بس كده ياسمين حرصت مؤخرا إنها تسمع حلقات قرآنية كتير بتتكلم عن رحمة ربنا عشان تقدر توصل للتصالح النفسي بينها وبين الناس.
وبعد ماوصلت للتصالح النفسي بدأت تتكلم مع ربنا وتلجأ ليه دايما، وبتقول إنها دموعها سبب في إنها تشوف الدنيا بشكل مختلف عن الأول، وحاولت توصل لجمهورها إن الدموع دي أهم شيء سواء للراجل أو الست، والكبت بيضر صاحبه جدا، وكمان اعترفت إن عمرها ماقاومت دموعها، عشان كده لما حد بيتكلم معاها بتخليه يسيب نفسه للدموع.
لكن هل ده معناها أنها بتفكر في الاعتزال؟
بعض المصادر المقربة من ياسمين صبري نفت أن تكون الفنانة بكلامها ده أنها ناوية تعتزل على الأقل في الوقت الحالي.. مش بس كده لكن المصادر قالت كمان إن السبب الرئيسي في عدم رجوعها لطليقها رجل الأعمال أحمد أبوهشيمة كان التمثيل.
أبوهشيمة اللي شايف أن مراته المفروض تبطل تمثيل عشان تكون سيدة مجتمع بتقدر تظهر والكل يحترمها في الوقت اللي ياسمين متمسكة فيه بالتمثيل ومش عايزة تسيب الفن وده اللي خلى أبوهشيمة يصر على عدم رجوعه ليها رغم المقابلات اللي بينهم والتقارب اللي كان بينهم الفترة اللي فاتت.
مؤمنة بكرم ربنا
ياسمين كمان قالت إنها مؤمنة بكرم ربنا عليها جدا، وطول عمرها بتعرف توصل لحلمها، كمان هي مؤمنة بإن الإنسان لازم يعرف عيوبه عشان يصححها، و اتعلمت دلوقتي تكون حريصة جدا على نفسها وتخاف على حياتها.
ياسمين مهتمتش بالتعليقات السلبية اللي بتتوجه ليها، وقالت إن كل شخص معرض للنقد، وخصوصا الفنانين والشخصيات العامة، وإن أي شخص بيرفض الانتقاد يبقى الأفضل ليه يقعد في بيتهم لأن دي ضريبة النجاح.
