خناقة جديدة في الوسط الفني الذي اعتادنا منه كل يوم على مشكلة أو انفصال أو زواجة جديدة ، لكن هذه المرة، الخناقة عائلية بين هنا الزاهد واخو زوجها الفنان كريم فهمي وزوجته، فماذا حدث؟
فجأة لقينا هنا الزاهد عملت unfollow ل كريم فهمي اخو جوزها احمد فهمي ومراته دانيا البناوي ، وهما كمان لغوا متابعتهم ليها على انستجرام ، وده معناه ان اكيد في حاجة حصلت خلتهم يعملوا كل ده ، لكن هنا مجتش جنب اكونت جوزها كريم ولسة عاملين متابعة لبعض لانهم اكتيف جدا على السوشيال ميديا وبيحبوا يهزروا مع بعض في التعليقات
هنا بعد ما عملتلهم ان فولو ، كتبت ستوريهات عندها ع الانستجرام فيها كلمتين تلقيح ، وقالت : افعل ماهو جيد لصحتك النفسية
وكمان نشرت هنا صورة ليها وكتبت عليها : اذهب حيث تشعر أنك على قيد الحياة”.
محدش عارف سبب الخناقة ايه ، ودانيا مرات كريم فهمي هي كمان الغت متابعة هنا من عندها ، مفيش ولا صورة ليها مع هنا على حسابها ، وكلها صورها هي وجوزها بس ، شكلهم كدا الستات وقعوا في بعض ،
والرجالة مش عارفين يعملوا ايه
ومن ساعة ما اتجوزت هنا الزاهد وأحمد فهمي وبنشوف صور كتير عائلية بتجمعهم مع اخوه كريم ومراته دانيا ، وكان واضح ان علاقتهم قوية وكويسة وحابين جو الاسرة مع بعض ، سفريات بقى وخروج وصور وفسح ، لحد ما حصل تاتش بين هنا ودانيا.
طب بالنسبة لهنا و أحمد فهمي ؟ هل في خناقة بينهم ولا بوادر انفصال مثلا زي ما سمعنا الفترة الاخيرة ؟ محدش منهم طلع علق ولا اتكلم في اي حاجة ، حتى كريم ومراته ملتزمين الصمت.
واحمد وهنا مستمرين في الترويج لفيلهم الجديد مستر اكس اللي المفروض هيتعرض في عيد الاضحى
، واللي بتدور قصته حولين رئيس عصابة هيقابل محامية بالصدفة وهيحاول يبعدها عن طريقه عشان يحميها من مخاطر العصابة
فيلم مستر اكس من بطولة أحمد فهمي، وهنا الزاهد، وأوس أوس، وبيومي فؤاد، ورحاب الجمل، ومحمود حافظ، وكمان هيظهر فيه نجوم كتير كبار بس كضيوف شرف ، وهما أكرم حسني، ومصطفى خاطر، ومحمد أنور، وصبرى فواز، وعمرو يوسف ، يعني توليفة كبيرة من النجوم وشكله كدا هيكون فيلم حلو ومختلف لان احمد فهمي بقاله كتير معملناش افلام.
ودي بقى مش المرة الاولى اللي يشتغل فيها احمد وهنا مع بعض ، دول عملوا مع بعض 3 حاجات قبل كدا، منهم مسلسل الواد سيد الشحات اللي اتعرض في رمضان من حوالي 3 سنين ، وكمان مسلسل اذاعي اسمه عربي وانجليزي واتعرض في رمضان برضه ، وكمان اشتغلوا مع بعض على المسرح لاول مرة وعملوا مسرحية اسمها جوازة معفرتة اتعرضت في موسم الرياض.
احمد فهمي وهنا الزاهد قصة حب فاجئت الوسط الفني والناس كلها من كام سنة لما فجأة اعلنوا ارتباطهم واتجوزوا في فرح كبير جدا سنة 2019 ، لكنه حتى الان مأجلين الخلفة.
واحمد قال انه اتفق مع هنا قبل جوازهم على شوية قواعد كدا عشان الجوازة دي تستمر، قالها احنا لازم نقفل على نفسنا محدش يعرف عننا حاجة، نعيش حياتنا براحتنا، قرارنا من دماغنا فقط…منديش ودننا لحد ونسمع لبعض وبس”.
وفعلا من ساعة ما اتجوزوا ومشوفناش اي تفاصيل خناقة بينهم على السوشيال ميديا ، وواضح انهم ملتزمين بالاتفاق ، لكن بعد فرحهم الضخم سافروا يقضوا شهر العسل وهنا تعبت جدا واتنقلت المستشفى وقالوا اننا اتحسدنا وملحقناش نتهنى في السفرية.
اما بقى كريم فهمي ومراته دانيا ، فهما كمان عايشين قصة حب كبيرة بقالهم سنين ، وكريم دايما بيحب ينشر صور مع مراته ويكتبلها كلام حلو عنده على انستجرام.
وفي عيد ميلادها قالها : ياللي نجاحي عندك اهم من نجاحك ، ياللي بتحبيني اكتر من نفسك ، ياللي بتستحمليني وانا شخصية بشعة وقت الشغل ، وقت ما بكتب مسلسل او فيلم او وقت التصوير،، وقت منا مستني النتيجة ، يعني معظم الوقت ومحدش استحملني غيرك .. توكسيك بقى هتقولي ايه … الحقيقة اي نجاح ليا ده نجاحك انتي قبل ما يكون نجاحي ، ربنا يخليكي ليا”.
واضح ان كريم بيعمل شوية حركات مش اد كدا بتزعل مراته لكنها ست عاقلة وبتحبه وبتستحمله في كل الاوقات وده سر حبه ليها.
