أثارت الفنانة حلا شيحة الجدل خلال الفترة الخيرة فبد أن قالت أن الفن حرام وانها تابت عما قدمته، تريد الآن أن تعود للتمثيل، فهي دائما تتراجع عن قراراتها وهذا ظهر في ارتداء الحجاب وخلعه أكثر من مرة.
حلا شيحة من أول ما بدأت تمثيل الناس كانوا حابينها بنوتة كيوت و بتدلع وعرفت توصل للجمهور و عرفت تغير من جلدها فشوفناها في اللمبي بشخصية نوسة و زيها زي أي بنت اتجوزت، و بعدت عن الفن، و اتنقبت، ده سابت مصر كلها، وعاشت في كندا
وغابت سنين كتير .. لا تعرف حد و لا حد يعرف عنها حاجة من الوسط الفني .. لحد ما في يوم فجأة حلا شيحا ظهرت تاني .. بس لا في نقاب و لا حتى حجاب .. و أعلنت انفصالها عن أبو أولادها .. و بدأت تحط رجليها تاني في الوسط .. شوية في مهرجانات ..
وشوية في أفراح و شوية في اعلانات، لحد ما محمد رمضان قالها يلا ارجعي تاني و هنعمل مسلسل سوا، و قدموا سوا مسلسل “زلزال” .
الناس قالوا هي حرة تلبس حجاب أو تخلعه مالناش دعوة، و المسلسل جاب مسلسل تاني، و بعده فيلم و البلية رجعت تلعب تاني، بس بعد ما خلصت تصوير فيلمها مع تامر حسني ” مش أنا “، بدأت تختفي تاني وهوب حلا شيحا و معز مسعود و المأذون بينهم.
أه اتجوزوا وهي رجعت تلبس الحجاب تاني وهو قالها ” ستكونين أخر زيجاتي ” وبعد ما خلص الجو الرومانسي ده نزل فيلم ” مش أنا ” وكان ليها فيه مشاهد كتير مع تامر حسني أحضان و حب و رومانسية .
أزمة حلا شيحة مع أشرف زكي
راحت كتبت بوست طويل، وقالت من الأخر فيه إن الفن حرام ، اه الفنانين جواهم خير كتير، بس فتنة الشهرة عميانا، طبعا بعد الكلام ده، أشرف زكي حلف إن حلا مش هترجع تمثل تاني، وهي كمان اختفت .
لحد من كام شهر رجعت تاني بشعرها و شالت كل صورها مع معز مسعود أيوة زي ما جيه في دماغكم. انفصلت هي و معز مسعود، و بقت بتنزل كل شوية صور من غير الحجاب ولا معز، و رجعت تتفاعل تاني مع الناس .
و شوية تشيل صورها خالص، و شوية لا لحد أما قررت تنكش الناس و تبين إنها عاوزة ترجع لتمثيل تاني، و راحت منزلش صورتها و هي بشخصية نوسة، و حطت سؤال ايه رأيكم لو رجعت و عملت شخصية نوسة.
طبعا كومنتات كتير معاها و كتير بردو ضدها .. بس اللي شاغل دماغ الناس، هو رد فعل أشرف زكي هيكون ايه، و اللي رد على سؤال الناس بانه هيسمح ليها انها ترجع للتمثيل تاني بعد ما حرمت الفن.
أشرف زكي قال انها أصلا مش عضوة نقابة .. و إنه ميعرفش أي حاجة عن نيتها إنها ترجع ولا لا، وانه مستني يشوف هي هتعمل ايه .
