المثل يقول الطيور على أشكالها تقع، وهذا ستجده ينطبق على ما فعله عمله حسن شاكوش في زوجته وما فعته هي أيضا فيه.
بس سبحان الله ياجدع مستروش مع بعض والكدب اتكشف بدري بدري مكملوش شهرين جواز وكل حاجة بقت على عينك يا تاجر، ويمكن يكون ظهورهم سوا في برنامج “العرافة” كان القشة اللي قصمت ظهر البعير، وعلاقتهم دلوقتي دخلت نفق مظلم بعد ما النيابة ما بدأت تاخد إجراءاتها وتتصرف بناء على القانون بيقول إيه، والاتنين بقوا متهددين بالسجن، ودي التفاصيل اللي هنعرفها في الفيديو اللي معانا ده.
شيخ العرافين وسنينه
حسن شاكوش ومراته ريم طارق اتجوزوا في شهر مارس اللي فات ده والحفل أحياه النجم تامر حسني، والاتنين ظهروا مع بعض في برنامج “العرافة”، وحصل خلاف بينهم لما سأل “شيخ العرافين” عن جوازة حسن شاكوش التانية في شقة بالتجمع وإنها مدياله سلسلة هدية وهو اداها عربية، واتطور الموضوع لما قال إن الكلب اللي اداه شاكوش لمراته ريم طارق هدية فهو في الأصل بتاع مراته الأولى.
وهنا بقى وبناء على اللي اكتشفته النيابة واضح إن شي العرافين كان على حق وحسن شاكوش كان متجوز وهو بيتجوز تاني وخبى على مراته ريم الموضوع ده لكن كمان حسن اتغفل ومراته ضحكت عليه ومقالتش إنها كانت متجوزة قبل كده، وواضح إن شيخ العرافين ده هو اللي خرب بيتهم ومراته اكتشفت حاجات وهو اكتشف حاجات وليلة كبيرة الحقيقة.
الكدب عيني عينك
محدش عارف بجد إيه اللي يجبر واحد على إنه يتجوز وميقولش لمراته إنه متجوز عادي وهي تقرر توافق أو لأ لأن القانون أصلًا بيقول كده واللي عمله حسن شاكوش إنه مقالش لمراته إنه متجوز والمستندات مبتكدبش.
وزي ما قالت وثيقة الجواز الرسمية لحسن شاكوش على مراته ريم طارق، إن اللي عملوه هما الاتين فيه جناية تزوير في أوراق رسمية، يعني حسن شاكوش أخفى جوازه وبيانات الست اللي على ذمته “ر م ص”، واللي لسه مراته في أوراق عقد القران الرسمية وده عكس الحقيقة، لإنه قدم أوراق غير الواقع.
المشكلة الأكبر بقى إن حسن شاكوش مش بس أنكر جوازة سابقة، ومضى وبصم إن مفيش في عصمته واحدة تانية لأ دي ريم طارق مراته الجديدة ارتكبت جناية تزوير إنها آنسة وبكر يعني المفروض لم يسبق لها الجواز، لحد ما اتفاجئا إن هي كانت متجوزة قبل كده وصورها مع جوزها الولاني ظهرت وهو بنفسه كمان طلع في برامج وهاتك يا تقطيع وتنمر عليها.
وتقريبًا هو السبب إن تحصل مشكلة بين حسن شاكوش ومراته والكل بيقول إن ده السبب اللي خلى حسن يطرد مراته بالهدوم اللي عليها ومخدتش حاجة من حقوقها لحد دلوقتي.
ده اللي حصل في التحقيقات
ونيابة الأسرة مكملة في التحقيق بتاعها بخصوص خلافات حسن شاكوش ومراته ريم طارق وطلبت كل المستندات اللي بتخص اللي حصل وكمان المستندات اللي بتثبت جوازات حسن شاكوش السابقة وجوازات ريم طارق وإيه اللي حصل في كتب كتابهم اللي اتعمل ببيانات مزيفة.
تهديد بالحبس
وفي مصادر قانوني اتكلمت بخصوص اللي حصل من حسن شاكوش ومراته وتحديدًا ريم طارق اللي اتقال إنها مهددة بالحبس 7 سنين بتهمة التزوير في مستندات رسمية، عشان سلمت بطاقة شخصية مكتوب فيها إنها “آنسة” في خانة الحالة الاجتماعية وبكده القانون يعاقبها لإنها سبق ليها الجواز والطلاق ومغيرتش بيانات البطاقة واتجوزت ببطاقة فيها بيانات قديمة.
وكمان أبوها قال في فيديو كتب الكتاب “زوجتك ابنتي الآنسة البكر الرشيد” وأثبتوا كده في وثيقة كتب الكتاب بشكل رسمي، وفي الغالب كمان هيكون في مشكلة لحسن شاكوش قانونيًا عشان زور بياناته إن مفيش في عصمته واحدة تانية.
وأزمة حسن شاكوش ومراته ريم طارق بدأت من كام يوم بعد ما عملت فيه محضر اتهمته فيه بطردها من منزل الزوجية ده غير اتهامها ليه بالاستيلاء على منقولاتها الزوجية وشبكتها وإيصال أمانة لصالحها وده بديل مؤخر الصداق، وحسن التاني اتهمها إنها سرقت منه مبلغ نص مليون جنيه وماها مفتاح الخزنة بتاعته تفتكروا بعد كل ده إيه اللي ممكن يحصل في القضية دي وممكن الاتنين يلموا الموضوع وكان الله بالسر عليم ولا حد منهم هيتسجن والموضوع يكبر أكتر ما هو كبير مستنيين تكتبولنا في التعليقات.
