في هذا الشهر سنة 1940 اتولد الفنان الكبير عادل إمام الذي يحتفل هذا العام بعيد ميلاده الـ83 ورغم إن الكل في سباق لكي يهني ويبارك ويدعي بالصحة والعمر الطويل، يقوم الفنان حسن يوسف ويقول تصريحات صادمة يتكلم فيها عن فضله على عادل إمام ، فماذا قال؟ تابعونا في التقرير التالي لمعرفة التفاصيل:
نشأة عادل إمام
الزعيم عادل إمام اتولد يوم 17 مايو سنة 1940 ونشأ في قرية شها مركز المنصورة في محافظة الدقهلية، واتخرج في كلية الزراعة جامعة القاهرة وبدأ حياته الفنية على مسرح الجامعة، وهو بينتمي لأسرة بسيطة بعني أبوه كان شغال “شاويش” في مصلحة السجون، وفضل يخدم فيها لحد ما وصل لرتبة رقيب أول، وأمه كانت ربة منزل ومع الوقت نقلوا عيشتهم لمنطقة السيدة زينب، وخلفوا ولادهم التلاتة عادل وعصام وإيمان.
انطلاقة الزعيم
وكانت بداية عادل إمام، في الفن سنة 1962 بأدوار صغيرة وكان ده في منتصف السبعينات في القرن العشرين، وبدأت شهرته في فيلم “البحث عن فضيحة”، و”عنتر شايل سيفه”، وتألق في 13 مسرحية أشهرها “الزعيم”، و”شاهد مشفش حاجة”، و”مدرسة المشاغبين”، وعمل بطولة أكتر من 17 مسلسل أشهرها “أحلام الفتى الطائر”، و”العراف”، و”فرقة ناجى عطا الله”، و”عوالم خفية”، و”صاحب السعادة”.
وكمان اشترك في مسلسل إذاعي واحد اسمه “أرجوك لا تفهمني بسرعة” مع العندليب عبدالحليم حافظ، وليه أكتر من 120 فيلم وآخر عمل فني ليه كان مسلسل “فالنتينو” سنة 2020، ووسط كل النجاح ده طلع حسن يوسف وقلب الترابيزة واتكلم عن فضله على عادل إمام ومش عارفين ده بقى حُسن نية منه ولا زلة لسان.
مستقبل باهر
وقال الفنان حسن يوسف إنه أول واحد آمن بالفنان عادل إمام واتنبأ له بمستقبل باهر في بداية مشواره الفني، وهو اللي رشحه للمخرج أحمد بدرخان في فيلم “أفراح” اللي اتعرض سنة 1968، وكان العمل ده بداية فنية مهمة في مشوار الزعيم.
وقال إن هو اللي اكتشف الزعيم، يعني بقوا أصحاب من وقت ترشيحه ليه في فيلم أفراح ده ووقتها المخرج أحمد بدرخان، قاله عاوز كوميديان مشتغلتش معاه قبل كده، فرشحله عادل إمام وقاله أنا متوقع إنه هيبقى ليه مستقبل، والحمد لله كانت نظرتي صح.
صداقة مديدة
وأكد حسن يوسف، إن صداقته مع الزعيم ممتدة لحد دلوقتي وهما على تواصل مستمر وآخر مرة كلمه كان من شهر، بس مش بيتقابلوا لإن مفيش مكان يجمعهم غير نادي النقابة واللي يعتبر مكان غير مؤهل لاستقبال النجوم الكبار، ولما ببيتكلموا في التليفون بيقعدوا يفتكروا مواقف من الأفلام وذكرياتهم في التصوير ورجع لسانه خانه تاني تقريبًا وقال بس عادل إمام مش بتاع نُكت، وعدل نفسه كده وقال الزعيم قيمة فنية كبيرة بقوله كل سنة وأنت طيب وأسرتك كلها بخير، كل سنة وأنت بصحة وسعادة وراحة بال إحنا اشتقنا لأعمالك فشد حيلك.
أول أجر للزعيم
الفنان عادل إمام، قال في أكتر من لقاء ليه إنه بدأ حياته من الصفر، وظهر على المسرح في عرض “ثورة قرية” وكان بيردد جملة وحيدة هي: “حلاوة عسلية بمليم الوقية”، وومخدش فلوس لأ وشارك في أعمال كتير عشان يثبت موهبته واتعرف من مسرحية “سري جدًا” مع فؤاد المهندس وزوجته شويكار، ولما فكر فريد شوقي في إنتاج رواية “أنا وهو وهي” اتعاقد مع عادل إمام واداله عن الدور ده 50 جنيه ورغم إنه كان متوقع وقتها ياخد 250 جنيه.
