هي البنت التي ولدت في الإسماعيلية سنة 1915 وعاشت طفولة صعبة وهربت للقاهرة، حتى أصبحت أهم راقصة في مصر، والتي قال عنها إحسان عبدالقدوس في مجلة صباح الخير، في مقال سنة 1960: «استطاعت أن تجعل من الرقص الشرقي فنا بعد أن كان عرضا للجسد، كما استطاعت أن تجعل من الراقصة سيدة محترم»، هي تحية كاريوكا وهذه قصتها مع الشيخ الشعراوي.
الحقيقة مش هنتكلم عن مسيرة تحية كاريوكا الكبيرة، ولا طفولتها الصعبة من لما والدها اتوفى وهي في عمر صغير، وراحت عاشت مع أخوها غير الشقيق واللي في بيته اتعاملت بشكل قاسي، ولكن مع ذلك ورغم كل شيء، فضل قلبها أبيض، وحبت الخير للجميع، وإن كانت دورت في حياتها على الاحتواء سنين كتير من عمرها، وده يمكن اللي خلاها تتجوز كتير جدا.
الفنانة تحية كاريوكا، مش الراقصة بس، كان ليها تجربة فنية مميزة، من وهي صغيرة اشتغلت مع بديعة مصابني في الكازينو بتاعها، ومع الوقت بقت أهم راقصة مصرية، وبعد كدة تم اكتشافها ودخلت عالم التمثيل، عشان تقرر في وقت من الأوقات إنها تتوقف عن الرقص تماما، وتكتفي بالتمثيل بس، وهي اللي اتقال عنها إنها بتملك أنوثة طاغية ومع ذلك ست بـ100 راجل.
تحية كاريوكا في مرحلة ما قررت إن هي تتوقف عن الرقص، وده بعد ما شافت ممثلة مش مشهورة أوي بتقدم العشاء للزباين في مرة من المرات وبتتعرض للسخرية بعد ما كبر سنها، وراح جمالها وضاعت فلوسها، فحزنت على حالها وقررت اعتزال الاستعراض نهائيًّا.
تحية كاريوكا بعد سنين من شغلها في التمثيل قررت إن هي تتحجب، وقضت السنين الأخيرة من حياتها في إنها تحج وتعمل عمره، وأعمال خير، وفي مرة من المرات التقت الشيخ الشعراوي عند الكعبة، ونادت عليه ولكنه مسمعهاش، ففضلت تلح لحد ما سمع وقالتله بنادي عليك من بدري.. قالها معلش مش سامع، لو كنت شفتك كنت جيتلك «رأسا وليس رقصا» وده الإيفيه اللي ضحك اللي كانوا حاضرين الموقف.
من بعدها داومت على زيارة الشيخ الشعراوي، وكانت بينهم علاقة مميزة، واتدخل كمان في انفصالها من المخرج والمنتج فايز حلاوة اللي استولى على شقتها في الزمالك، وكان الشيخ وسيط بينهم عشان ينهي العلاقة دي، ولكن حصل خلاف في الجلسة، لأن حلاوة طلب منها تتنازل عن الشقة وعن المجوهرات وكل بدل الرقص، وتقدم معاه مسرحية أخيرة كانت متفقة معاه عليها، وهي طلبت منه نص مليون جنيه نفقة متعة، فقالها يعني كدة الليلة بكام؟ فرمته بحاجة في وشة ومشيت، ولما كانت في آخر أيامها راح بكى واعتذر وطلب منها السماح.
ورفعت دعوى قضائية عليه لاسترداد الشقة، ولكن بعد كدة رجعت في كلامها وقررت تخلي المحامي ميحضرش الجلسات، ولما الشيخ الشعراوي سألها عن السبب، قالت إنه عنده بنت وزوجة هيروح بيهم فين، وأنا عندي شقة عايشة فيها ومش محتاجة الشقة التانية ولا المجوهرات، للدرجة اللي خلت الشيخ يقولها أنا كدة هغير منك، بيتينيلك قصور في الجنة.
تحية كاريوكا لما فايز حلاوة طردها من شقة الزمالك، نزلت من سلم الخدم وراحت عند رجاء الجداوي، قعدت معاها، وبعدين أجرت شقة في حارة في الدقي، وعاشت فيها لآخر أيامها، ولما اتسألت ليه سابت المجوهرات، قالت «لو كان فيها ذرة حرام يبقى ربنا بعدها عني».
في فترة إقامتها في الدقي واللي كانت منقطعة فيها للعبادة، كانت بتنزل توزع أكل على الفقرا، وفي مرة من المرات، لقيت طفلة رضيعة على باب شقتها، وكلمت الشيخ الشعراوي، وقالها أكفليها وسميها «عطية الله» لأن دي عطية من الله، وبالفعل عملت ده، وقبل وفاتها وصت الراقصة فيفي عبده بإن هي تتولى رعايتها، وبالفعل فيفي عبده نفذت الوصية وربتها مع بناتها الاتنين.
