طبعا لو كل سنة قدمنا عمل جديد عن بطولات وتضحيات أبطال الجيش والشرطة في عمل أو مسلسل، فإن هذه البطولات لن تنتهي ورغم إن الاختيار قدم وجبة دسمة من الحكايات والقصص إلا إن الكتيبة 101يحضر هذا العام قصة تضحية كبيرة لا يعلم عنها أحد.
خلاص رمضان على الأبواب.. وزي ما الناس مستنية الكبير أوي ومربوحة ومهرجان المزاريطة.. في نفس القناة وبنفس الشغف.. مستنيين يعرفوا ايه قصة مسلسل “الكتيبة 101”.. وحكاية المكان اللي هجم عليه الإرهابيين وتصدى ليهم أبطال مصر.
الكتيبة 101 هو العمل الوطني الوحيد في رمضان السنة دي.. اللي كان لازم يتقدم عشان في وسط كل الوجبة الدسمة ما بين الكوميدي والأكشن والدراما والقصص الاجتماعية.. يكون في قصة مؤثرة وحكاية حقيقية تستحق الكلام عنها
آسر ياسين وعمرو يوسف وإسلام جمال وغيرهم من النجوم.. على موعد السنة دي مع رواية حكاية الكتيبة 101.. اللي كتبها إياد صالح وبيخرجها محمد سلامة.. وبتجسد قصة التصدي للتنظيمات الإرهابية في سيناء وهجوم التكفيريين على موقع مهم في مدينة العريش.
المسلسل اللي بيقدم ملحمة وطنية وبيشارك في بطولته كمان وفاء عامر وأحمد صلاح حسني وفتحي عبد الوهاب ووليد فواز.. باين جدا من البرومو بتاعه إنه بيقدم عظمة.. بطولات وتضحيات من أجل الوطن.. سواء من أبطالها الحقيقين.. أو من الفنانين اللي وقفوا كل أعمالهم عشان يقدموا الحكاية دي.
الفنان عمرو يوسف بيجسد في مسلسل «الكتيبة 101»، دور رائد بالجيش المصري يدعى نور صلاح العزب.. اللي اتخفى وسط الإرهابيين عشان يقدر يحمي بلده.. والفنان أسر ياسين بيقلعب دور الرائد الشهيد خالد محمد دبور.. اللي كان قائدا لمجموعة كمائن بكرم القواديس.
المسلسل اللي متخصص له ميزانية إنتاج ضخمة جدا.. مش بس هيقدم تضحيات وقصص أبطال سيناء.. لا ده كمان هيبقى فيه جانب رومانسي واجتماعي بين العديد من الأبطال.. وطبعا كشف للمؤامرات والهجمات اللي كان بيصدها أبناء تلك الكتيبة
الكيمياء بين آسر ياسين وعمرو يوسف بقيادة المخرج محمد سلامة واضحة جدا في برومو المسلسل اللي نزل من أيام قليلة.. وكان عليه مشاهدات عالية جدا.. وده بيأكد إن الجمهور بقى كل سنة مستني الوجبة الدسمة دي من التضحيات.. ومتشوق إنه يعرف الحقيقة من مصدرها
في كلام كتير إن المسلسل مش هيكون 30 حلقة.. وهيبقى أقل من كده.. غالبا 20 حلقة بس.. والحقيقة إنه رغم فترة الإعداد القليلة ليه قبل رمضان.. إلا إن البرومو ظهر فيه مستوى عالي من التحضيرات والجرافيكس.. ومعايشة كإنها حقيقية لأماكن الأحداث.. وشكل الأبطال اللي كتير منهم اتخلى عن اللوك بتاعه عشان الدور يطلع مظبوط.. ويكون شكلهم قريب جدا من الأبطال الحقيقيين.
مستنيين العظمة.. وكل سنة وانتوا طيبين
