أنا أسعد إنسانة في الدنيا لأني عمري ما تخيلت أن في ناس متعرفنيش بتحبني، وبقول شكرا لكل حد دعالي وزعل عشاني وجالي وجاب لي ورد.. هذه كانت مشاعر الفنانة حورية فرغلي بعد ما عملت عملية استئصال الرحم والتي حرمتها من الأمومة التي كانت بتتمناها.
و بعد العملية أجرتها حورية فرغلي من أيام قليلة ، ظهرت انهاردة وكشفت عن تفاصيل كتير حصلتلها خلال الفترة اللي فاتت واد ايه هي دلوقتي حاسة انها مبسوطة بحب الناس ليها رغم حزنها الكبير عشان مش هتقدر تكون أم.
حورية كانت مصابة بأورام كتير في الرحم و كل ما بتعالجها بترجعلها تاني لحد ما الدكتور قالها انها لازم تعمل العملية ومينفعش تأجلها تاني وفعلا استسلمت لنصيبها و عملتها لكن في كل محنة منحة وربنا عوضها بحب ناس كتير انفاجئت انهم سألوا عليها وغيروا حالتها النفسية تماما وقدرت تتقبل اللي هي فيه و تبدأ من جديد.
وظهرت حورية في اول فيديو ليها بعد العملية وحبت تشكر كل مزاياها النجوم اللي سألوا عليها و اهتموا بأزمتها الصحية و قالت : عاوزة أشكر هوانم الزمن الجميل مدام صفية العمري ومدام ميرفت أمين ومدام ليلى علوي ومدام إلهام شاهين وأستاذ أشرف زكي ومدام مادلين طبر ولطيفة وسميرة سعيد وأحمد زاهر ومحمد رمضان كمان سأل عليا، وناس كتير أوي مش عايزة أنسى حد عشان ميزعلوش”.
انفاجئت حورية فرغلي بكم هائل من المكالمات و الرسايل و الهدايا اللي جاتلها بعد العملية وحست اد إيه هي محبوبة من اللي حوليها ، وانبسطت عشان في ناس بعتتلها ورد و شيكولاتة ، كأنها طفلة صغيرة فرحانة بحاجة حلوة جاتلها.
وقالت حورية : أنا أتولدت برا وعشت برا وكنت في مدرسة داخلية طول عمري، بابا كان في الكويت ماما كانت مسافرة وأخويا كان في أمريكا وطول عمري كنت محتاجة للحنان والحنية اللي محستهمش وأنا طفلة، وعمري ما تخيلت أني هحس بيهم زي ما حسيت آخر أسبوع لما الدكتور قرر يستأصل الرحم بالكامل ودا معناه أني مش هيكون عندي أي أطفال زعلت شوية بس الحمد لله أنا راضية، تخيلت أن أولاد إخواتي هما أولادي وأي طفل بشوفه هيبقى ابني”.
و عاشت حورية فرغلي لحظات حلوة من الحب والحنية اللي مفتقداهم في حياتها بعد الازمة اللي مرت بيها ، وقالت : تليفوني من امبارح مبطلش رن من صحفيين وفنانين وناس مش بيشتغلوا في الفن خالص وكمية الدعاء والضحك والحب أنا مكنتش مصدقة نفسي، حصل من الغريب ومحصلش من القريب ودي حاجة مأثرة فيا أوي، وفي يجي 40 شخص أنا معرفهومش ساكنين في العمارات اللي حواليا جابولي شيكولاتة وكيك وفضلنا نتكلم ونضحك، الحكاية دي أدتني قوة وطاقة أني لازم أقف على رجلي وأرجع تاني، أنا الحمد لله بقيت زي الفل ومش هتسمعوا عن عمليات ولا حوادث وهحاول أنقي قصص بتحبوها وأدوار تكون مميزة، وهدخل قريب تصوير عملين جداد .. أنا فخورة أني مصرية لأن معتقدتش في بلد تانية عملت كده مع فنانة مرت بظروف صعبة والناس كلها وقفت جنبها”.
ناس كتير كانت مستغربة ليه حورية عملت استئصال للرحم ، لكنها مرت بفترة صعبة من ١٥ سنة اما اكتشفت انها عندها حوالي ٧ اورام في الرحم منها كانت خطيرة ، وفضلت حورية تتعالج على مدار كل السنين دي لكن كانت بترجعلها تاني.
الدكتور اللي كان بيعالج حورية زمان قالها قدامك ١٠ سنين عشان تلحقي تتجوزي وتخلفي بسبب حالة الرحم و الاورام اللي بتجيلها ، لكن حورية مجلهاش نصيبها و متجوزتش وفضلت تعاني من مشكلتها الصحية لحد ما تعبت من فترة صغيرة و الدكتور قالها لازم تعملي العملية بكرة الصبح.
مكنش قدامها حل تاني وكان جواها شعور الامومة قوي جدا ونفسها تحلف لكن في نفس الوقت حالتها الصحية متسمحش تستنى يوم واحد ، واستسلمت حورية و عملت العملية واتمنت ان ربنا يعوضها عن موضوع الاطفال بحاجة تانية تسعدها.
وقالت حورية انها كانت نفسها تكون أم لكن حلمها ضاع بعد اللي حصلها ، وكان عندها أمل تتجوز وتخلف زي كل البنات وحاولت تتعالج لكن ربنا مأردش ، وأملي اني اخلف راح ، وأكيد ربنا شايلي حاجة أحسن.
وطبعا حورية فكرت تتبنى طفل وتربيه وفعلا حاولت تعمل كدا لكن مقدرتش لانها مش متجوزة و اكتفت بالتكفل بمصاريف الطفل اللي كان عنده ازمة في السمع ، لكن بعد فترة اتوفى ، لكنها اكيد نتعيد نفس التجربة تاني خاصة بعد ازمتها الاخيرة.
