موهبة كبيرة في بدايتها، فجأة ومع بداية نجاحة قرر فجأة أن يبتعد، القرار ولو كان البعض بعتبره غريب، لكن هو بأمر أخر بجانب موهبته، وهي شخصيته، القرارات من هذا النوع وفي وقت الضغط والمغريات الموجودة بيكون صعب جدا، ومابالكم عندما يكون هذا القرار في عمر الـ 19!.. نتحدث عن خالد الفايد.
بدون أي كلام هو موهبة هايلة، عنده خامة صوت جميلة ومميزة جدا، وفوق كل ده عنده طله وحضور، وكان مشروع نجم كبير، وده كان واضح من أول ظهور ليه، يمكن هو مدرسش في معهد الموسيقى، ولكنه علم نفسه بنفسه وخد كورسات، وعنده ودن موسيقية سمحتله بإنه يقدر ينفذ بشكل سليم، فما بالكم لما يقعد تحت إيد أساتذة يعلموه.
خالد الفايد قرر مرة واحدة، وبدون مقدمات، إن هو يعتزل، وده بعد ما بقى في رصيده الفني، أغنية واحدة بس «أنا حد جديد»، واللي هي من إنتاج هاني محروس، شقيق المنتج الشهير نصر محروس.
الفايد نشر صورة ليه بملابس إسلامية، وكتب عليها «مش عايز فلوس ولا شهرة ولا علاقات ولا أي سراب من ده كله»، وبناء على كدة قرر إن هو يستخدم صوته في تلاوة القرآن، والإنشاد الديني بس.
بداية شهرة خالد كانت مشاركة في برنامج «ذا فويس كيدز» وهو عمره 14 سنة لما ظهر وهو بيغني للفنان جورج وسوف، وكان لابس وقتها جلابية صعيدي، وأبهر لجنة التحكيم، المكونة من ناسي عجرم وتامر حسني وكاظم الساهر، وبالفعل من وقتها كان واضح إنه عنده ثبات وخامة صوت مميزة جدا.
خالد كشف إنه راح اتقدم للبرنامج زي ناس كتير، طلبوا منه ورقه فيها 10 أغنيات، واختاروا منهم أغنيتين، وبالفعل غناهم وعمل حالة كويسة جدا، وكان في احتفاء كبير بموهبته.
كان بيغني بين وقت والتاني لنجوم تاني، وكان بيظهر مع بعضهم في فيديوهات، وأكتر فيديو ليه حقق انتشار كان مع النجم أحمد سعد وهما بيغنوا «عليكي عيون».
وظهر اكتر من مرة مع الفنان جورج وسوف اللي بيحبه جدا، إلى جانب ظهوره في لقاءات تلفزيونية كتير. الفايد بعد كدة ومن سنة تعاقد مع شركة nj music productions واللي بيملكها الأخوين نصر وهاني محروس، وماضى معاهم عقد احتكار لمدة 8 سنين، وبالفعل صدر ليه أغنية واحدة واللي هي «أنا حد جديد»، وكمان مسجل 7 أغنيات لكن لسة منزلوش.
ولكن هو قرر يوقف كل ده ويبعد عن الطريق، وبيقول انا كنت صغير وعايز أتشهر وأبقى معروف، لكن لما كبرت اكتشفت إن ده مكنش هدفي في الحياة ولا طريقي، أنا عايز استخدم صوتي في الإنشاد والقرآن، وأنا كنت في صراع نفسي بقالي فترة لحد ما قررت أعتزل، خالد كمان قال إنه أي حد جواه جانب ديني من المغنيين بيكون جواه نفس الصراع الداخلي ده.
ولو رجعنا ليوتيوب، فخالد ليه فيديوهات من زمان فعلا وهو بيؤذن أو بينشد أو بيتلو القرآن، وكمان ليه باردو فيديوهات لما كان بيغني.
خالد هيرجع أو مش هيرجع؟ هو شاب صغير، وطبيعي إنه يندفع تجاه عاطفة معينة، في النهاية ده قراره، هو موهبة كبيرة، الأهم إنه يستخدمها.
