سمية الخشاب اشتهرت بخناقاتها على تويتر فمرة نجدها تتحدث بطريقة قاسية مع احد المتابعين ومرة مع زوجة ميسي وأخير مع صديقة كرسيانو رونالدو فما القصة ومأ أخر تلك الخناقات.
سمية الخشاب بتحب تتفاعل اوي مع الجمهور على تويتر و كل فترة كده بيكون ليها تويتة تخلي الناس تتكلم لا و بتجاري الجو يعني وقت امتحانات الثانوية العامة كانت كل يوم تنزل نصيحة فرفوشة للطلبة و احنا طبعا الفترة اللي فاتت كنا في كاس العالم و كانت بتجاري الجو بردو .
بس فجاة نزلت تويتة و موجهاها ل جورجينا صديقة كرستيانو و قالتلها (( جورجينا لن تكوني سمية الخشاب ))طبعا الناس استغربت انتي كتبتي كده ليه يا فنانة وايه علاقتك اصلا ب جورجينا في ناس طبعا هزروا و ناس قالولها فوقي يا فنانة .
وناس تانية جابوا صور ل سمية الخشاب و صور ل جورجينا يعني المفروض ان جورجينا كده بتقلد سمية الخشاب طبعا جورجينا مردتش و مدخلتش في المقارنة مع سمية بس لقينا الفاشونيستا الكويتية (( دانا الطويرش)) هي اللي بترد و كتبت تويتة بعد ساعات قليلة على كلام سمية و قالت (( لن تصبحي جورجينا يا جبن الكيري)) طبعا واضحة هي قاصدها على مين.
بس الموضوع ده ماسمعش اوي يعني قعدله يومين وخلاص اما بقى الجديد ان سمية الخشاب بتقول رايها بقى في جورجينا .
فجاة لقينا تويتة منسوبة ل سمية الخشاب وبتقول (( انتونيلا دي وشها خير علي ميسي لكن جورجينا بومه من ساعه ما ظهرت مع رونالدو باظت حياته)) .
طبعا اما التويتة ديه انتشرت سمية ما انكرتش انها قالت كده بس اللي خلى الناس تستغرب وبقى سؤال موجود عند المتابعين ليها (( انتي عاوزة ايه من كرستيانو يا سمية )) و ليه عمالة تهاجمي جورجينا ده غير كمان خناقاتها مع واحدة من متابعينها من كام يوم لما طلبت البنت من سمية الخشاب ارد عليها وردت سمية قالتلها اتفلقي وبعدين لما لاقت نفسها افورت في الرد راجعت اتكلمت بأسلوب كويس ودي مش اول مرة تدخل خناقة مع حد من متابعنيها علي تويتر.
في ناس بتقول ياجماعة عادي بتهزر وناس بتقول سمية بتحاول تعمل قلق على السوشيال ميديا علشان تخلي الناس كل شوية تدخل عندها .. وهي كل شوية بتروج لعمل من أعمالها الفنية زي مسرحية (( كازينو بديعة)) واللي اتعرضت في رأس السنة ولازالت عروضها مستمرة علي مسرح الماركية.
المهم بقى اننا هنشوف سمية الخشاب الفترة اللي جاية في ادوار مختلفة يعني هي خلاص قربت تخلص مشاهدها في فيلم التاروت اللي بتشارك فيه مع رانيا يوسف و بدات تصوير دورها في مسلسل (( ارواح خفية)) واللي المفروض هيتعرض في رمضان .
ده غير مسرحية (( كازينو بديعة)) واللي اتعرضت في موسم راس السنة طبعا المسرحية ديه هي اللي رجعت سمية لخشية المسرح بعد سنين كتير على اخر مسرحية هي عملتها ..
لا وراجعة بمسرحية استعراضية .. و بتتكلم عن بديعة مصابني وفترة زمنية مختلفة .. على العموم ادينا هنشوف ايه اللي هيحصل مع سمية الخشاب الفترة الجاية بعد كل الجدل.
