نجمة حلوة وجميلة وعنيها زرقا، لكن الحياة قست عليها ورأت منها العين الحمراء، بدأت من بدايتها مشوار النجومية، ولكن النهاية كانت في طريق ثاني غير متوقع.
أشهر أدوارها كان مشهد جريء، رغم إنها قدمت أعمال تاني ناجحة ومميزة كتير، ولكن ذاكرة الجماهير بتفتكر تفاصيل معينة وتنسى الباقي، خلال السنين الأخيرة الحال اتدهور بيها شوية، ولكنها لسة واقفة على رجلها، وبتربي عيالها التلاتة.. هي الفنانة جيهان فاضل.
مش دايما الحياة بتكون وردي، وأحيانا البدايات الحلوة بتكون وبعدها نهايات مش حلوة أوي، حياتها الفنية كانت واعدة، ممثلة شاطرة وموهوبة وجميلة، اكتشفوها في وقت بدري، ودخلت المجال وقدمت أعمال فنية مهمة كتير، ولكن في النهاية كان فيلم سهر الليالي هو أشهر الأعمال الفنية اللي قدمتها، واللي ملتصق باسمها لحد دلوقتي، ويمكن لأنه حقق نجاح كبير، وكان جريء شوية في فكرته وكمان طبيعته، إلى جانب دور جيهان فاضل نفسه اللي كان في مشهد جريء شويتين.
جيهان فاضل وهي طالبة في الجامعة اكتشفها المخرج خيري بشارة، وشافها من خلال بعض العروض الفنية اللي كانت بتقدمها مع فرقة الجامعة، وقدمها في الفيلم الجميل واللي لسة بنحب نشوفه لحد انهاردة «آيس كريم في جليم»، وطبعا اللي كان بطله الفنان عمرو دياب لما كان لسة ممثل شاب بقى وبيمثل، وبعدها شاركت في عدد من الأعمال الفنية، منها «التحويلة، أرض أرض، وجبر الخواطر».
وقدمت عدد من المسلسلات المهمة زي «أرابيسك، حياة الجوهري، امرأة هزت عرش مصر»، وكان آخر أعمالها الفنية مسلسل تحت السيطرة مع الفنانة نيللي كريم.
جيهان فاضل اتجوزت من مصمم الأزياء الراحل عمرو حمدي، وأنجبت منه أبنائها التلاتة أدهم وزياد وعالية، قبل ما يرحل عن الدنيا في 2012 نتيجة هبوط في الدورة الدموية، وده اللي سببلها حالة حزن كبيرة جدا، وكمان أزمة مادية في حياتها هنتكلم عليها كمان شوية.
جيهان وزوجها كانوا من أبرز المشاركين في ثورة يناير من بدايتها، وكانت من الناس اللي نزلوا يوم 25 يناير ومن أشد المعارضين لنظام الرئيس الأسبق محمد حسني مبارك، والبعض اتهمها بإنها بتعمل كدة عشان شهرة، ولكن هي ردت على ده وقالت إنها وقت ما نزلت مكنتش تعرف إن الموضوع هيتطور للدرجة دي.
خلال أحداث الثورة اتقال إن جيهان فاضل اتعرضت لاعتداء من خلال تواجدها في المظاهرات ولكن هي نفت الكلام ده وقالت إن اللي حصل كان مجرد تدافع والناس دخلوها قهوة في المكان قعدت فيها وبعدين صديق ليها عدى عليها خرجها بعيد عن الزحمة.
في الفترة دي باردو طلع كلام إنها راحت صفوت الشريف أحد أقطاب نظام مبارك، عشان تطلب منه إنها تاخد أفلام مخلة كان صورها ليها، ولكن هي نفت الكلام ده، وقالت إنه محصلش وهي معندهاش حاجة تخاف منها، إلا لو كان حد صورها مع زوجها جوة أوضة نومها، ودي حاجة هي متحبهاش.
جيهان فاضل آخر عمل فني ليها قدمته كان مسلسل تحت السيطرة مع نيللي كريم في 2015، وقبله قدمت عدد قليل من الأعمال الفنية، ومن بعد رحيل زوجها وقلة الأعمال قررت تسافر برة مصر وبالفعل راحت كندا، وفي الوقت ده انتشرت بعد الصور ليها وهي بتبيع بيطخ وبتبيع أكل وبتاع، واتقال إن هي شغالة كاشير في مطعم هناك، ولكن كل ده طلع مش حقيقي، وهي شريكة في مطعم هناك، وعايشة مع ولادها.
جيهان فاضل عندها عادة كمان وهي إنها بتحب التدخين، ومتقدرش تبعد عنه، وبدأته من لما كانت في الثانوية العامة، لما كانت بتاخد «السبارس» اللي هي بواقي السجاير من جدتها وبعدين بقت تسرق سجاير كاملة.
