في الوقت الذي تتعرض فيه لانتقادات كبيرة، والتي وصفها البعض بإنها حملة ممنهجة، هي وفريق عمل المسلسل ولا تحركوا أو تأثروا، يقدموا شغلهم تاركين الحكم للنهاية.
والحقيقة هما عاملين شغل نضيف، وحاجة زي الفل.. بنتكلم عن الفنانة رحمة أحمد اللي بتلعب دور «مربوحة» مرات «الكبير» في مسلسل «الكبير أوي» في الموسمين السادس والسابع.. طب هي ردت على الانتقادات دي إزاي؟
السوشيال ميديا موراهاش حاجة خلال الكام يوم اللي فاتوا، غير إنها قاعدة بتقطع في فروة الفنانة رحمة أحمد اللي بتعمل دور «مربوحة» في مسلسل الكبير، الفكرة بقى إن معظم التعليقات دي كلها عبارة عن منشورين مبيتغيروش، ومتداولين بشكل كبير، والبعض وصف الموضوع بإنه حملة ممنهجة، ولكن هو مش حملة ولا حاجة، ده لعب عيال.
مش مصدقين إنه لعب عيال؟ هنقولكم إزاي.. اللي كاتب المنشور بيقول «أنا ممكن أسامح أي حد إلا اللي دخل البنت دي مسلسل الكبير وبوظلنا مسلسل الطفولة»، طب حد خد باله من حاجة؟ اللي كاتب الكلام بيقول «بوظلنا مسلسل الطفولة»، وبما إن الموسم الأول اتعرض في 2010، يعني من 13 سنة، واللي كاتب الكلام ده بيقول إنه مسلسل طفولة، يعني ده واحد وقت ما اتعرض الموسم الأول كان عمره 6 ولا7 سنين، وبيتعامل مع الكبير إنه زي فوزاير عمو فؤاد وبكار.
ما علينا من النقطة دي، الفنانة رحمة أحمد انضمت لفريق العمل في الموسم اللي فات، عشان تعمل دور الكبير، وطبعا هي كانت بتحل محل دنيا سمير غانم، اللي كانت توقفت عن المشاركة، وفي خلال مشاركتها الموسم اللي فات كانت من ضمن أسباب نجاحه، مع عدد من الوجوه الجديدة زي حاتم صلاح، وعبدالرحمن حسن، ومصطفى غريب، وغيرهم من الوجوه الجديدة.
كمية الإشادات اللي حققتها الفنانة رحمة أحمد بسبب الموسم السادس كانت كبيرة، ويعتبر دي بدايتها الفينة الحقيقة، وأول دور كبير ليها، ولأن حجم سقف التوقعات عنها عالي، فالموسم السابع كان الجمهور مركز معاها، ولكن فجأة لقينا سيل هجوم على الفنانة رحمة أحمد، واتهموها بالأفورة، وإنها بتعتمد على الإزعاج والصويت، وقالوا إن دي مش كوميديا ولكن دوشة.
في الوقت نفسه عدد كبير من الفنانين دعموا الفنانة رحمة أحمد، ووقفوا جنبها وهاجموا الناس اللي بتهاجمها، لكن في الحقيقة رحمة أحمد نفسها، مردتش على أي نقد ولا أي حاجة، وكانت عايشة حياتها عادي جدا، وهنا بيحضرنا تعليق الفنان عمرو وهبة على الموضوع اللي بيقولها: « طبعاً انتى الناس شايلة همك وبيدافعو وبتاع وميعرفوش إنك واقفه زى الجبل فى المطبخ بتلفى محشى عادى جداً».
الفنانة رحمة أحمد خلال الفترة اللي فاتت كانت بتشير بوستات عن المسلسل، وبعض الفيديوهات والإفيهات، ولا شوفناها علقت ولا اتكلمت ولا قالت أي حاجة، وفي الوقت نفسه المسلسل بيواصل عرضه.
لكن الرد الحقيقي منها، كان الحلقة الرابعة، واللي ظهرت هي والكبير بشكل مختلف وهما بيحاولوا إنهم يصلحوا علاقة الجواز بينهم، بناء على تعليمات من الدكتور اللي بتلعب دورها الفنانة نور اللبنانية، والحلقة كانت الحقيقة قنبلة ضحك، سواء منها أو من الفنان أحمد مكي، واللي أكدت إن المسلسل برغم كل الانتقادات اللي بيتعرض ليها، إلا إنه مازال قادر يضحك الجمهور ويسبطهم وواخد مساحة خاصة بين الأعمال الموجودة على الساحة في الموسم الرمضاني.
