ردت الفنانة لقاء سويدان، على مهاجمة الإعلامية بسمة وهبة لها بسبب صفعها ميدو عادل بالقلم، وذلك من خلال بث مباشر على حسابها الشخصى، على موقع تبادل الصور والفيديوهات إنستجرام.
وقالت لقاء سويدان: مش عايزة أطلع أرد، رغم أني بتهاجم في البرامج، بيتصلوا بيا يقولولي ردي فارفض وأتشتم، حتى لو في خلاف بيني وبين زميل، مش هطلع أشتمه في برنامج دي مش أخلاقي، بيشتموني في البرامج بس عادي ياما ناس أهم وأكبر مني واتشتموا، الموضوع مع جهات تحقيق.
وتابعت لقاء سويدان: أنا قدمت شكوى في ميدو عادل من أغسطس الماضي، مش عشان في تجاوزات في حقي، لأ دي تجاوزات كتير، أنا واحدة كبيرة وعندي 49 سنة، اشتغلت مع أحمد زكي وسعاد حسني، ورغم أن سني كبير لكن مبسوطة أن ربنا مديني صحة وشكل مناسب مع سني، فإنكم تخوضوا في عرضي دي مش أخلاق، لما تخوضوا في عرضي وفي حياتي الشخصية، أسهل حاجة إن الواحد يجيب لجان الكترونية وترد وتهاجم، أنا مبيفرقش معايا الناس المزيفة، مبيفرقش معايا غير الجمهور الحقيق اللي بيحبني وأصحابي اللي واقفين جمبي.
ومن جانبه، كانت الإعلامية بسمة وهبة هاجمت الفنانة لقاء سويدان، بعد صفعها لـ ميدو عادل، إذ قالت في برنامجها: موضوع مقزز، وجديد علينا إن فنانة تضرب فنان بالقلم على وشه أو ست تضرب راجل بالقلم وبقول لميدو عادل إنت ساكت ليه، وبقول للقاء سويدان التصرف دا لا يليق بأنثى ولا بفنانة.
