نجمة عرفناها كلنا، ومشوارها الفني كبير وممتد وأدوارها كثير مننا تابعها على الشاشات وفي السينمات، قدرت تحتل مساحة كبيرة بين نجمات جيلها، وهذا بفضل موهبتها الكبيرة، حياتها الفنية كانت ناجحة بدرجة كبيرة لحيم ما قررت تسافر وتبعد عن الوسط الفني وتعيش مع بناتها، ولكن عادت تاني للساحات ولكن المرة دي من خلال المحاكم، بسبب دعوة قضايئة ضد زوجها، عشان تفتح ملف.. زيجات علا غانم
الفنانة علا غانم، نجمة مصرية اتولدت سنة 1971 في الكويت ولكن رجعت وعاشت في إسكندرية بعد كدة، حياتها بدأت بشكل خلاها تدخل في دوامات يمكن أثرت عليها بعد كدة.
علا غانم خدت مجموعة من القرارات في طفولتها تأثيرها امتد على مستقبلها كله، أولها إنها دخلت كلية الفنون الجميلة ولكن مكملتش فيها، وسابتها ودخلت معهد الفنون المسرحية لكن باردو مكملتش، وفي الآخر اكتفت بحصولها على مؤهل ثانوي عام.
واللي بيوضح السبب في اللي حصل ده، هو جانب تاني من حياتها الشخصية، وهي إن أول جوازة في حياتها كانت بعمر 17 سنة، ووقتها زي ما بتقول كان شائع الجواز في سن صغير، ووقتها اتجوزت من وليد الدفراوي، واللي عاشت معاه حوالي 5 سنين، وخلفت منه بنتين وهما كاميليا وفريدة، وحصل بينهم الانفصال بعد كدة، واللي كشفت إن سبب الانفصال إن هما الاتنين كانوا صغيرين.
ودخلت علا المجال الفني وبدأت مسيرتها الفنية، وبعمر الـ22 كانت علا غانم أم لبنتين، ومش متزوجة، وبدأت مشوارها الفني وقتها، واستمرت أم عزباء لمدة 11 سنة، لحد ما والدتها قالتلها كفاية كدة السنجلة دي، وبالفعل علا سمعت كلام والدتها ودخلت في علاقة زواج تانية، ولكن لأنها مكنتش عن حب، فكانت النتيجة سيئة.
تاني جوازات علا غانم كانت من أحمد المسلمي، ودي مستمرتش أكتر من 7 شهور بس، وده لأنها اتعرضت منه لضرب وإهانات قدام بناتها، للدرجة اللي حسستها إنها اتكسرت، وفوق كل ده كمان اكتشفت إن هو جاب ستات تاني وفي أوضة نومها وعلى سريرها، وهنا كانت النهاية، وحصل بينهم الانفصال، وهي علاقة بتعتبرها علا غانم من الأسوا في حياتها.
قعدت علا غانم سنين من غير جواز، ومستمرة بالتوازي في مسيرتها الفنية، ولكن بعدها بتقرر تتجوز رجل الأعمال عبدالعزيز لبيب، وكانت علاقة هادية ومستقرة وكانت بتقول إنه اكتر شخص بيفهمها، وفجأة بتقرر علا تسيب مصر وتسافر من 6 سنين، عشان تعيش مع بناتها وتتفرغ ليهم، وفجأة كمان لقيناها بترفع دعوى طلاق ضد زوجها التالت.
بعدها بفترة قصيرة علا غانم بتتصالح مع جوزها رجل الأعمال عبدالعزيز لبيب، وبترجع تعيش معاه تاني، وتنزل مصر زيارة، والبعض اعتقد وقتها إنها بتحضر لرجوعها الوسط الفني، لكن هي بتنفي وبتقول إنها زيارة قصيرة، وهي مستمرة في أمريكا عشان مشروعها الوليد اللي هو عبارة عن فندق بتاع كلاب، وسبب نزولها إن بنتها المهندسة كاميليا كانت بتتجوز وهتعيش في مصر.
ولكن بترجع أخبار علا غانم تاني تتصدر التريندات ومش لأنها اتعاقدت على مسلسل «توحة» واللي المفترض عرضه في رمضان 2023، ولكن لأنها رفعت دعوى خلع من زوجها الأخير للضرر.
