هي لبنانية، ممكن نتفق أو نختلف على فكرة فنانة أم لا، ولكن هي تقدم أعمال فنية، بين كليبات وأحيانا تمثيل، بتغني، لكن لا يمكن أن نعتبرها مطربة، تركت لبنان وجاءت عاشت في مصر لأنها وجدت نفسها بين أحضان أم الدنيا، وأيضا لأن أموالها سرقت في لبنان، وترى إن الراجل المصري لا يوجد منه في العالم، وبتعتبر إن تنمية عقلها حاجة مهمة، وربما يكون هذا سر جاذبيتها حسب وجهة نظرها يعني.. هي دومينيك حوراني.
والدها هو المؤرخ اللبناني الباز يوسف الحوراني، وهي اتولدت سنة 1985 في بيروت، واتعلمت وكبرت ودرست إدارة الأعمال وكمان خدت ماجستير، بس قالت كفاية كدة، التعليم مبياكلش عيش، ولا هيكمل تعليم اخواتها، خصوصا إن هي بتقول إنها من أسرة فقيرة، لأن العلم اللي عند والدها في الأوطان العربية مالهوش تمن، وهي كانت عايزة فلوس.
اتجوزت رجل أعمال إيراني نمساوي، عشان فلوسه، لأن الأسرة شافت إنه مناسب، ولكن هي محبتهوش، وفضلت عايشة معاه، وخلفت منه بنتها دي لارا، وهو كان عايز يخلي دومينيك زي قطعة أثاث في البيت ولكن هي محبتش الوضع ده، وبعد سنين طويلة من الجواز انفصلت عنه، عشان تشوف حياتها.
ولكن انفصالها عنه موضوعه غريب شوية، لأن كل شوية بحالات شوية تقول عايشة مع جوزي أبو بنتي، وشوية تقول اتطلقنا، وشوية تقول اتفقنا نبقى أصدقاء، بس هو أغلب الظن هما منفصلين كدة بالحب يعني، وكل واحد فيهم عايش في حالة.
من أهم تصريحات دومينيك عن جوزها إنه مبيغيرش عليها خالص، ووجهة نظره في الغيرة مميزة، لأنه بيقولها اقفلي من فوق وافتحي من تحت زي الاستايل الأوروبي، وده تفكيره لأنه معظم وقته عايش في النمسا وكدة.
هي كمان بتقول إنه بعد سنين طويلة من الجواز بقى منفضلها، ومش مهتم تلبس ايه وتعمل ايه، ولما اعترفتله إنها بتحب واحد تاني، قالها أنا واثق فيكي، وانتي زي أختي.. فاللي هو تمام يعني.
مشكلتها معاه إنها مكنتش عارفة تنفصل منه وده كان في حوار ليها مع إحدى المجلات، واللي بكت خلاله، وقالت إن هو شخص عنده نفوذ قوي، وإنه مش راضي يطلقها عشان متتجوزش حد تاني.
دومينيك حوراني اشتغلت في البداية في عروض الأزياء، وكسبت مسابقة ملكة جمال القارات وهي صغيرة، وبعدها اتعرض عليها تعمل كليب اسمه «عتريس» واللي حقق شهرة كبيرة وكان باللهجة الصعيدي، وبعدها ابتدت تشتغل سينما وكانت ضمن فريق عمل فيلم «البيه رومانسي» وآخر أعمالها كان فيلم «عمر خريستو» ورصيدها في التمثيل 4 أعمال.
دومينيك حوراني نموذج يشبه فنانات تاني كتير جم لمصر من لبنان، بينجحوا شوية جماهيريا، ولكن دون فكرة عن طبيعتهم الفنية، لأنهم غالبا ولا بيمتلكوا جودة الصوت، ولا الموهبة الفنية في التمثيل، ولكن بيعملوا الاتنين، وغالبا ده متعلق بقدرتهم على الاهتمام بشكلهم ولبسهم وجرأتهم ولهجتهم المختلفة، وعمليات التجميل.
دومينيك بتقول إنها بتحب الراجل المصري لأنه راجل وجدع وبيقف جنب مراته، وكمان بيدلعها وبيعاكسها، وبمناسبة المعاكسة بتقول إنها بتحب يتقالها «يا مهلبية يا طرية» لكن مبتحبش أكتر من كدة عشان بتعتبره تعدي بقى، ولما اتسألت عن الراجل اللبناني، قالت إن هي بتشوفه يعني عايز اللي يدلعه عيل في نفسه شوية.
دومينيك قالت إن هي معاها إقامة في مصر ونقلت بنتها لمدارس مصرية، وعاشت هنا واستقرت لأنها بتعتبرها بلدها الأولى اللي بتحبها لأنها حاليا زعلانة من لبنان، بلدها الأًصلي، لأنهم ببساطة سرقوا فلوسها، وهنا بتتكلم عن الأزمة السياسية في لبنان، لما البنوك منعت المودعين من الحصول على ممتلكاتهم، ودي أزمة اتعرضت ليها مع كل أهل البلد.
هاجمت برامج كدة من تحت لتحت بنشوفها وهي تقصد ياسمين عز يعني، واللي بتعتبر إن اللي بيقدموها معقدين وبيحاربوا الستات.
