على قدر النجاح الذي حققه مسلسل جعفر العمدة،إلا أنه لا يوجد حلاوة بدون نار، والعمل الذي لفن الأنظار في رمضان هذا العام ملئ بالكواليس والأسرار والحكايات التي لا تنتهي، وطبها اهما حكاية زينة مع المخرج محمد سامي، تابعونا لمعرفة التفاصيل:
الفنانة زينة مستمرة في إعلان الحرب على المخرج محمد سامي وفريق مسلسل جعفر العمدة، والتمثيل قلب حقيقة، على قد ما كانت الوحيدة اللي مش مرغوب فيها في قصة جعفر وعيلته، على قد ما بقت برضه الوحيدة اللي بره الصورة في كل نجاح المسلسل.
زينة بعد ما اختفت الفترة اللي فاتت عن السوشيال ميديا، ومنشرتش أي صور أو دعاية لها علاقة بالمسلسل، كانت السبب في كشف كواليس وحكايات وأسرار كتير في العمل.
أولها طبعا إنها على خلاف معاهم كلهم وعلى رأسهم المخرج محمد سامي، وقاطعت كل حاجة تتعلق بالعمل كإنها معملتهوش. بعد ما كانت توب وان في مسلسل الليلة واللي فيها، تقدر تشيل مشاهدها من جعفر العمدة عادي جدا ومحدش هيحس بحاجة.
ورغم كل ده محمد رمضان دافع عن زينة في كل كلامه.. وقال إنه مفيش مشاكل ولا حاجة.. وهي زينة بطبعها كتومة شوية.. مش أكتيف على السوشيال ميديا.. راحت في نفس اليوم منزلة صور وفيديوهات وستوريز.. رهيبة زينة برضه.
المهم اتضح ان الصور دي كانت في كواليس تصوير حلقة جديدة من برنامج حبر سري، اللي هتطلع فيه زينة ضيفة على مدار حلقتين تكشف فيه كواليس وأسرار وحكايات وعياط وشحتفة، ياختاااي مقولكش.
لكن أهم حاجة قالتها زينة في الحلقة هي إنها مش هتشتغل مع المخرج محمد سامي تاني، شكله زعلها جامد فعلا.. كده زينة هتنضم لصف طويل من النجمات مش عاوزين يشتغلوا مع أنجح ممثل في رمضان، أنا بشوف العجب هنا والله.
زي ما غادة عبد الرازق نجحت مع محمد سامي وطلعت بعد كده قالت مش هشتغل معاه تاني، جه دور زينة. اللي زعلها وحش جدا، بس هي قررت إنها تترفع عن الصغائر، وتقول إن محصلش بينهم مشاكل بس أنا مش هشتغل معاه تاني
وغالبا كده المشكلة هتطلع إن محمد سامي مطلعش زينة حلوة في المسلسل زي ما كان بيعمل مع مراته مي عمر، اللي بيتوصى بيها جامد، وده دايما بيعمله مشاكل مع بطلات أعماله.
وبرضه الناس كلها عارفة إن زينة متضايقة من مساحة الدور اللي اتقدمت واتصورت في مسلسل جعفر العمدة. كان المفروض تتبروز أكتر من كده. وكمان نهاية المسلسل مش جاية على هواها. اللي هي احتمال تكون بتتغير دلوقتي واحنا بنتكلم عادي جدا.
زينة الحلقات اللي جاية هتتألق في المسلسل، خصوصا بعد اللي اتعرضت له من جعفر، وبعده من الستات اللي هجموا عليها وحاولوا يخلوها تخسر جنينها، وده كان آخر أمل لجعفر عشان يبقى أب، ولعايدة عشان يبقى في حاجة ربطاها بيه بعد ما حبته.
دراما وحكايات مسلسل جعفر العمدة مبتخلصش.. ربنا يستر في اليومين اللي فاضلين دول.
