فنانة اتسببت في اكتر من ضجة في الوسط الفني، مرة بزواجها المفاجئ من الداعية معز مسعود وبعد فترة انفصلت عنه ومرة تانية بعلاقتها بالفنان طارق صبري.
هي الفنانة “شيري عادل” اللي اتصدر اسمها اهتمامات الجمهور خلال الكام ساعة اللي فاتوا بتصريحانها الغريبة.
“شيري” كانت ضيفة برنامج صاحبة السعادة مع الإعلامية إسعاد يونس هي والفنان طارق صبري وقالوا كلام مفاجاة وصادم.
علاقة سرية اتكشفت للعلن
شيري بتربطها علاقة حب كبيرة من نوع خاص بالفنان “طارق صبري” العلاقة دي بقت حديث الوسط الفني خلال الايام اللي فاتت.
وده ظهر للناس بعد الصور اللي اتنشرت ليها وهي في حضنه بصحبة الفنانة بشرى ونجلاء بدر والراقصة دينا.
الصورة دي ظهرت فيها “شيري” في لحظة رومانسية في حضن “طارق صبري”، والناس فسرت ده بانهم متجوزين رغم عدم الاعلان رسمياً.
لكن لما طلعت الفنانة الشابة مع “اسعاد يونس” كشفت عن مفاجآت بالجملة وقالت انها بتحب “طارق” بقالها فترة، وبتحس معاه بالامان..
قالت انها بتحب فيه كل حاجة ماعدا صوته العالي، علشان كدة الناس بتفتكرهم بيتخانقوا لما يتكلموا مع بعض.
ومن ضمن الاسرار اللي كشفتها “شيري عادل” عن علاقتها السرية بطارق انه بقى في حياتها فجاة وبقى من الحاجات العادية في يومها، ومن غيره بتبقى مش مظبوطة.
كمان قالت إنه كان نفسها تعمل فرحها على البحر وتدعي فيه كل زميلاتها الفنانات، وطلبت منه تعمله في الصيف.
زواج بدون بوتاجاز وجبنا 10 ملايات
وعن الفرش بتاعها وشقة الزوجية كشفت شيري عن مفاجاة تانية لما قالت: كفاية 10 ملايات و10 فوط في البيت.
لكن “شيري” لسه مجابتش لا غسالة أطباق ولا بوتجاز.. لانه كان قال لها لو جابت بوتجاز لازم تطبخ عليه، وهي ضعيفة في الطبخ.
اما “طارق صبري” فقال إنه ضغط على “شيري” عشان توافق على الجواز منه، فهي قالت له إن شرطها علشان توافق لازم تعمل فرحها في الصيف.
فقال لها يلا نتجوز الاول وبعد كدة نبقى نعمل الفرح في المكان اللي هي عاوزاه، ووافقت وحالياً بقت مراته.
وقال كمان “طارق” إن في البداية مكانش حد عارف عن علاقتهم غير القريبين والأسرتين بس، لأن الافضل إن علاقة الحب تتبني في هدوء بعيداً عن الناس.
ابوها مهندس واختها إعلامية شهيرة
اسمها “شيرين عادل حسن حمدي” ابوها المهندس عادل حسن خالد حمدي، ولها أخت أكبر منها هي الإعلامية الشهيرة “نيفين عادل” اللي هي مراة الفنان أيمن عزب.
وفي سنة 2018 كانت “شيري” حديث الجمهور كله بعد خبر جوازها من الداعية الاسلامي “معز مسعود”، لكن بعد سنة الناس اتفاجئت بانفصالها عنه من غير متكشف عن السبب.
علاقة حب ايمان العاصي بطارق صبري
طارق صبري كانت بتربطه علاقة حب قديمة بالفنانة إيمان العاصي واتقال كلام كتير عنهم لكن هو رفض التعليق عن ده اكتر من مرة رغم ان العلاقة كانت معروفة في الوسط الفني.
آخر اعمال شيري وطارق
وبالنسبة لآخر اعمال شيري عادل فبيعرض ليها حاليا مسلسل «جروب الدفعة» على قناة ON، ويشاركها في بطولتة كلا من ميدو عادل وعمرو وهبة وولاء الشريف وأحمد ماجد وإيمان الشريف، المسلسل من تأليف هاني سرحان وإخراج محمد عبدالسلام.
اما أخر أعمال الفنان “طارق صبري” كانت مشاركته في مسلسل «الاختيار 2»، اللي اتعرض ضمن سباق رمضان 2021، مع النجوم كريم عبدالعزيز، أحمد مكي، إياد نصار، بشرى، هادي الجيار، إنچي المقدم، أحمد سعيد عبدالغني، للمؤلف هاني سرحان والمخرج بيتر ميمي.
