ربنا استجاب لدعوتي على هاني شاكر.. هذا تصريح من تصريحات مطرب المهرجانات حمو بيكا، الذي يتسبب كل فترة في جدل كبير على السوشيال ميديا، لكن ما سر خلافه مع حسن شاكوش؟، ولماذا دعى على هاني شاكر؟، كل هذا سنعرفه في التالي:
حمو بيكا من المطربين اللي ظهروا في الفترة اللي فاتت وعمل لنفسه أرضية واسعة، وإيفهاته وإنه ميعرفش يجيب الأغنية أو يقول كلماتها من أول مرة كان ده اللي بيعجب كتير من جمهوره فيه، بس مطرب المهرجانات عمل ضجة كبيرة بخناقاته مع حسن شاكوش وهاني شاكر.
دعى على هاني شاكر وربنا استجاب
حمو بيكا قال إنه دعوته على هاني شاكر كانت دعوة مظلوم، عشان وقتها الفنان هاني شاكر سمح لكل المطربين إنهم يغنوا ويظهروا بس رفض إن حمو بيكا مخصوص هو اللي يظهر، وده اللي بيكا مكنش عارف سببه، وعشان ربنا بيستجيب دعوة المظلوم رجع للشغل تاني وربنا رد ليه حقه، ورجع مرة تانية للشغل، وحاليا هاني شاكر هو اللي مش شغال.
محدش ساعده في مشواره الفني
كمان مطرب المهرجانات قال إن محدش ساعده في مشواره الفني، على الرغم من إن هو ساعد كل الناس تقريبا، وعمره ما تخلى عن حد، زي مثلا حسن شاكوش، واللي أكد بيكا إن هو المدرسة الي طلعت حسن شاكوش للنور، وعلى أد غرور شاكوش معاه، لكن بيكا قال إنه بيحب يكون شخص طيب مع الناس، وإن مبيعرفش يسمع لحد بيسلطه وكل حاجة بيعملها من دماغه، مش بس كده، ده كمان اتهم شاكوش بالكذب وقال إنه لما كان عاوز يغني وسط بينهم واحد صاحبه، ولما صاحبه كلمه قاله إن فيه محتاج يشتغل وعاوزه يساعده، وعشان هو بيحب يعمل خير دايما، وافق يساعده بدليل إن شاكوش مكنش عنده لا استوديو ولا ميكرفون يغني فيهم.
حمو بيكا هو اللي اكتشف حسن شاكوش
الفنان حمو بيكا مسكتش عند النقطة دي لكنه كمل هجومه على حسن شاكوش وقال إن هو اللي كان بيوجهه عشان يقف قدام المايك، وبيعلمه حاجات كتير في وقت كان حمو بيكا فيها هو عمرو دياب الغلابة، مش بس كده بيكا قال تاني إن حسن شاكوش عشان يظهر كان بيحط إعلانات ممولة عل أغانيه، وإن أول أغنية عملها بمساعدته جابت 15 مليون مشاهدة، وكان هو اللي طلعه للنور، لكن ياخسارة الغرور أخده من أصحاب عمره.
حمو بيكا بيهاجم عمر كمال
مش بس شاكوش هو اللي هاجمه حمو بيكا، لاء ده كمان هاجم المطرب عمر كمال وقال إنه مبيعرفش يغني، وحلف مليون مرة إنه مبيعرفش يغني، وبعدين إيه يعني صوته حلو أصلها مش بالصوت، وكمل بيكا وقال إنه على الرغم من إن صوته على قده لكن عنده جمهور كبير بيحبه وبيسمعه، وبيروح حفلات مخصوص عشانه، مش بس كده بيكا قال إنه بيعرفش يقرأ ولا يكتب بس بيعرف يغني، وإنه بيتحدي أي حد يغني معاه قدام المايك، عشان أداؤه هو اللي هيطلع أحسن وأسرع في النهاية.
مطرب المهرجانات حمو بيكا مسكتش عند كده، لاء ده كمان قال إن هو اللي اكتشف عمر كمال زي ما اكتشف شاكوش بالظبط، من أيام ما كان مرتبه 400 جنيه بس، لكنه زعلان عشان كلهم باعوه، وإن طيبته هي السبب في كده، إيه رأيكم في كلام حمو بيكا، وهل ليه حق في مهاجمته لشاكوش وكمال ولا لاء، قولولنا رأيكم في التعليقات.
