معروف عن الفنان محمد منير إنه تخطى الستين سنة وهو مازال أعزب، ولا أحد يعلم حتى الآن إن كان قد سبق له الزواج من نوبية ام لا.
المهم محمد منير في نساء طبعاً في حياته لكن المثير إن في قصة من فنانة معروفة اتعرض عليه إنه يتجوزها غرفض، وكان عنده أسبابه.
وقصة الحب دي كانت من زمان وهو لسه في عز شبابه لما كان بيعمل مسرحية “الملك هو الملك” واللي شاركته فيها الفنانة فايزة كمال، وناس اتوسطت عشان الجوازة تتم بس هو أصر على موقفه، وشكله أخد منها موقف لحد ما رحلت لأنه مرضيش يحققلها أمنيتها إنها تشوفه قبل ما تفارقنا وكمان مراحش يعزيها ووجع قلب جوزها كمان، إيه اللي حصل من محمد مني، وليه رفض يروح يشوف فايزة قبل ما ترحل بأيام؟، الحكاية كلها هنقولكم عليها في التقرير التالي:
محبة الجمهور الفائزة كمال
الفنانة فايزة كمال، قدرت تكسبت احترام الجمهور ليها عشان هي كانت فنانة ملتزمة في الوسط الفني ومكانش ليها أدوار إغراء وعشان كده الجمهور كان حزين على رحيلها والكل كان بيدعيلها لأنها كمان فارقتنا وهي سنها صغير، لكن إيه قصة حبها من طرف واحد دي وعلاقتها مع محمد منير.
محمد منير رفضها
الفنانة فايزة كمال تبقى زوجة المخرج المسرحي مراد منـير والغريبة إن هو اللي اتوسط ليها عند الفنان محمد منير عشان يتجوزها وكان معاه الفنان صلاح السعدني، رغم إنه مكانش يعرفها خالص واتعرف عليها لما قامت ببطولة مسرحية “الملك هو الملك” اللي كان بطلها الكينج محمد منير وصلاح السعدني.
ومراد منير قال في تصريحات ليه إنه اقترح هو الفنان صلاح السعدني إنهم يجوزوا فايزة كمال للكينج منير، ولما اتعرض عليه الموضوع قال مينفعش دي بنت ناس وأنا بتاع بنات، وكمان فايزة رفضت وقالت إنها بتحب الكينج كزميل وصديق ومعجبة بصوته مش لدرجة تتزوجه يعني وده كان موقفها لما منير رفض ومحدش يعرف كانت بتحبه من طرف واحد ولا إيه بس اللي طلبته وقت تعبها يمكن يفسر ده.
إزاي منير خد لقب الملك
وجوز فايزة كمال قال أن علاقة الصداقة بين محمد منير ومراته فايزة امتدت ومنير بقى لقبه الملك من مسرحية “الملك هو الملك”، وقبلها مكانش الملك ولا حاجة، هو كان طالع في مشوار الغنا زيه زي على الحجار وفنانين جيله لحد ما قفز وبقى نجم صف أول.
ووقتها قدر مراد منير يعمل أغاني المسرحية في شريط كاسيت اسمه “الملك” وحقق نجاح كبير، وكتب الأشعار الراحل أحمد فؤاد نجم وخد في الشريط ده 3 آلاف جنيه أما محمد منير فكان بياخد 4 آلاف جنيه في السنة مقابل عرض المسرحية.
طلب فايزة كمال قبل رحيلها
المهم فايزة كمال اتجوزت المخرج مراد منير وحياتهم مشيت عادي لحد ما تعبت ورقدت في المستشفى وقبلما ترحل طلبت تشوف الكينج محمد منير وقالتله إنها في مستشفى خاص ومش هيتبهدل ولا الجمهور هيتعرضله ولا حاجة ووعدها إنه هيزورها لكنه موفاش بوعده، وده اللي وجع قلب جوزها وقتها زي ما قال في تصريحاته في لقاء تلفزيوني.
ليه الكينج مزارش فايزة كمال؟
ومحمد منير ولا زار فايزة ولا راح يعزي جوزها مراد منير رغم إنهم كانوا أصدقاء جدا، وقال مراد يمكن الكينج متحملش يشوف فايزة تعبانة وفي أيامها الأخيرة عشان أنا لو صاحبي كلمني وقالي أنا حاسس إني همشي هخاف أشوفه ومنير قلبه رهيف جداً قلب عصفور وده بيظهر في صدق غناه.
أو يمكن كان جاي فعلاً بس القدر مش بيستنى، وكمل مراد بيقول ده غير إن الكينج مجاش العزا كمان وده وجعني منه وبعدها بيوم كلمني وقالي جايلك البيت وعشان أعزي الأولاد ومجاش بردوا ووجعني منه أكتر.
وفايزة كمال اتولدت في الكويت لأب وأم مصريين كانوا بيشتغلوا في الكويت، وعاشت هناك أكتر من عشرين سنة وأنهت دراستها الابتدائيّة والمتوسطة والثانوية هناك، وجت القاهرة على المعهد العالي للفنون المسرحية وقدّمت في قسم الديكور رغبة أولى والتمثيل رغبة تانية، ونجحت في الاتنين بس باباها ومامتها أصروا على قسم الديكور عشان مش هيسمحوا ليها تدرس التمثيل.
لحد ما الفنان سعد أردش أقنع الاتنين وتتلمذت على إيده، وبدأت مشوارها الفني وهي في سنة أولى معهد وشاركت في مسلسل تاريخي اسمه “العدل والتفاح” قدام مديحة كامل وعبد الله غيث، وحملت المشوار في مسلسل “وتاه الطريق” وفيلم “الطائرة المفقودة”، وكملت في الفن 30 سنة متواصلة لحد ما تعبت ورحلت يوم 26 مايو سنة 2014.
