طبعاً كلكو مستغربين إن شخص كبير في العمر مثل حلمي بكر الذي وصل عمره إلى 85 سنة سيدخل دنيا الآن ويتزوج من جديد بعد أن عاش نحو 4 سنوات وحيدا.
وناس كتير اعتقدت إن خلاص بقى شاف حياته واتجوز 13 مرة قبل كده آه طلقهم كلهم واللي رحلت وهو لسه عايش بس صدقوا خلاص لما المأذون يحضر كل اللي عايز يتكلم كلمة يحطها في بوقه ويسكت.
إلا هي مين سماح القرشي مرات حلمي بكر دي بقى وياترى هيعملها فرح والذي منه ولا كتب الكتاب وخلاص على كده.. طيب هي ليه سماح القرشي اتخلت عنه زمان بعد الحب والحنية وليه رجعت وقعت جنبه تاني من كام شهر لما تعب كل ده وأكتر هتعرفوه معايا في التقرير التالي:
حلمي بكر اكتشفته وردة الجزائرية.. تخيلوا أيوه هو عاشق للفن وبدأ حياته من الصفر وكان لسه شاب صغير بيكافح واتخرج من المعهد العالي للموسيقى العربية واشتغل في مدرسة حكومية بس معجبوش الوضع قام مستقيل.
ولما اكتشفته وردة كان بيقضي الخدمة العسكرية بتاعته وكان حلمي ده نجم الكتيبة بتاعته في العزف والموسيقي وأول ما جت وردة تغني في حفلة تخرج هناك كان بيلحن ليها سمعته عجبها واتواصلوا مع بعض وقدمته لمدير الإذاعة وقتها والزهر لعب وبقى الملحن المشهور حلمي بكر اللي عمل أكتر من 1500 لحن وكل شغله مع النجوم الكبار.
بس حياته الشخصية عليها علامات استفهام كتير هو راجل متعدد الزيجات يعني خلينا نقول كده عشان ربنا يجعل كلامنا خفيف عليهم.. اتجوز 13 مرة ومخلفش غير ولد وبنت بس وحكاياته كتير ودايما الجوازات دي إما من فنانة أو قريبة فنانة وقليل لما اتجوز من بره الوسط الفني.
على سهوة
كنا قاعدين في حالنا يوم الجمعة عادي بنقضي أجازاتنا وعلى سهوة كده لقينا حلمي بكر بيتجوز جاب مأذون واتنين شهور وطلعوا على شقته في المهندسين وكتب كتابه على سماح القرشي وهو داخل على 85 سنة.. إزاي الكلام ده يا جدع ده كان ليه تعبان من قريب ودخل العناية المركزة آه ما هو ربك لما يريد بقى طيب ده كان على كرسي متحرك وهو في السعودية من كتم يوم بيحضر حفلة الموجي عادي بردوا الدهن في العتاقي..
اتكتب الكتاب وسماح القرشي فرحانة والشمل اتلمْ من تاني، سماح القرشي مش دي ي ي ي أيوه اللي كانت اتخلت عنه زمان قبل كده وكان بينهم حب ودلع وحنية وفجأة قلبت عليه، والناس بقى مبطلتش إزاي تآمن لها تاني يا عم حلمي دي عملت وعملت .. يا جماعة خلاص دي بقت مراته بس بقى، المهم كل ده كوم والكلام عن إنه هيعمل فرح كوم تاني.
الفرح برعاية؟
بصوا عشان تبقوا عارفين حلمي بكر كان اتجوز سماح القرشي مرة قبل كده يعني لما رجعلها اليومين دول كانت بالنسبة ليه طليقته وأم بنته الصغيرة ريهام اللي عندها 7 سنين دلوقتي.. الكلام أصلا عن رجوعهم لبعض بدأ من عند حلمي بكر وسماح القرشي شافت إن بنتهم ريهام رايدالهم يرجعوا لبعض قالوا وماله أهي البنت تتربى في وسطنا ويا دار ما دخلك شر.. أصلا سماح القرشي كانت مقدمة السبت من قبلها ووقفت جنب حلمي بكر لما تعب وراحت المستشفى وعملت معاه موقف إنساني جميل وده خلاه يقدم الحد.
المهم وافقوا على الجواز ودلوقتي بنتهم عاوزة تعملهم فرح عشان تكون مبسوطة أكتر ولسه بقى مستنين البنت تقرر عشان هي متمسكة بالفرح وواضح أمها بتحاول تقنعها بحاجة تانية.
الحب والبلطجة
سحلوني وضربوني وأهانوني والجيران شافوهم.. دي كانت كلمات الراجل الكُبّارة حلمي بكر من كام سنة.. معقول عم حلمي الكاريزما اللي الكل بيعمل ليه حساب عشان هو هيبة كده ومش بيهمه حد يقول كده.. أيوه أصل طليقته كانت أجرت بلطجية وبعتتهم على شقته في المهندسين يضربوه وده اللي خلاص اتصاب في كتفه ورقبته وحروق في إيده غير إصابات الركبة اللي خلته مش عارف يتحرك.
هما كانوا اتفقوا بعد انفصالهم سنة 2018 إن بنتهم هتتربى معاه بس هي قعدت تساومه عليها لما عرفت إنها ممكن تاخد فلوس منه لما تكون البنت معاها.. فاتت الأيام وحلمي بكر ساب شقته اللي في المهندسين وراح عاش في حدايق الأهرام لكن واضح إن بعد اللي حصل ده اتساوت الأمور بينهم ودلوقتي رجعوا لبعض بالسلامة ومبروك للملحن حلمي بكر ومراته سماح القرشي.
