كلنا عارفين الشخصية التي يقال عليها خرّابة البيوت العمرانة.. هذه هي المراة التي تأخذ الراجل من زوجته أو تبعده عنها حتى وتبقى زوجة ثانية مش مشكلة.
تخيلوا ده كمان حصل لبعض نجمات الفن وكانت حكاياتهم حكاية.. يعني أصالة وياسمين عبدالعزيز وبسمة بوسيل وغيرهم كتير عانوا من الكلام ده كله.. لكن أنغام بقى هي اللي عملت عكس كده وجوزها في الآخر لحق نفسه.. ودي التفاصيل اللي هتسمعوها في الفيديو ده.
العيب في الراجل
إحنا كمجتمع عندنا نوع من العاطفة شويتين تلاتة وبنتضامن مع الستْ ده حتى القوانين في صف المرأة وبتعرف تاخد حقوقها من الراجل وتعملها يجي 15 قضية لو انفصل عنها ويا سلام بقى لو في أولاد.. المهم خرّابة البيوت دي معظمنا مش بيجيب العيب عليها وبنودي كل الأسباب واللي حصل عند الراجل وإن هو اللي عينيه زايغة.
ولو مكانش عاوز من الأول يخرب بيته مش هيوافق حبيبته التانية إنه يسيب مراته وولاده وهكذا لكن ده ميمنعش إن عندنا عقارب بيعرفوا يدخلوا كويس جدًا ويجيبوا عاليها واطيها.. وفي حالات الراجل مش بيتلف فيها بس يكون كفاية إن البيت اتعمل فيه هزة كده ده بيخلي الحياة مش مستقرة.
راحت لدكتور واتعالجت
كلنا سمعنا كويس عن اسم نيكول سعفان ودي عارضة أزياء لهفت المخرج والمنتج طارق العريان من أصالة وخربت البيت بعد 14 سنة استقرار.. طبعًا ده كلام الجمهور والناس على السوشال ميديا اللي قلنا عليهم إيه؟ بتحكمهم العواطف لكن الحقيقة فين الله أعلم.
المهم أصالة اكتشفت علاقة جوزها السابق بنيكول سعفان وطلبت الطلاق وقعدت أكتر من سنة تروح لدكتور نفساني عشان تتعافى من العلاقة دي أصلها كانت بتحب طارق أوي وهي اللي طلبته للجواز كمان.. اتضح بعد كده إن أصالة وكلام الجمهور صح وارتبط طارق ونيكول والحياة لذيذة وأصالة التانية شافت حياتها.
كيادة
العلاقة بين ياسمين عبدالعزيز وجوزها السابق كانت على ما يرام حتى وهما منفصلين ومعاها منه ولد وبنت لكن اللي عملته ريهام حجاج أثبت العكس خالص واتضح إنها كيادة وكانت على علاقة برجل الأعمال محمد حلاوة وقدرت تلهفه وتتجوزه وحاولت ياسمين تقول إن العلاقة دي محلصتش وهي على ذمته يمكن خوفًا على كرامتها وكمان عشان محدش يفتش في إنها هي كمان كانت لهفت محمد حلاوة من مراته وولاده الأربعة.
المهم فضلت حكاية ريهام حجاج وياسمين عبدالعزيز مستمرة شوية والكل عارف إنها قدرت تلهف حلاوة منها وتسقيها من نفس الكاس.. وحاليًا الموضوع هدي خالص وياسمين شافت حياتها ومبنسمعش حكاية الكيد دي غير لما كل واحدة فيهم تظهر في مسلسل في موسم رمضان.
خرجت عن شعورها
اكل كان مبسوط بالعلاقة الكويسة بين الفنان تامر حسني وبسمة بوسيل بعد الانفصال وقالوا إن النهايات أخلاق فعلًا وهما هيعيشوا يربوا الأولاد وربنا يسهل ويمكن يرجعوا.. ومعداش يومين هما يومين وكل حاجة اتغيرت وفرح هالة عمر اللي ماسكة السوشال ميديا بتاعة تامر حسني كشف المستور .
وخرّج بسمة عن شعورها وده كله عشان تامر غنى في فرحها اللي حضرته يارا السكري ملكة الجمال اللي الكل بيقول إنها السبب ورا الانفصال وده بسبب إن هالة عمر هي اللي عرفت تامر على يارا وإنها السبب في خراب البيت وبسمة بوسيل ضربتها واحدة حسبي الله ونعم الوكيل من قلبها شوفناها كإننا بنسمعها مش بنقراها.
حكاية أنغام
وكانت الفنانة أنغام حكايتها حكاية دي لهفت الموزع الموسيقي أحمد إبراهيم من مراته وولاده وهوب الكل قال دي قصة حب ملهاش زي بس اللي حصل بقى إن أنغام ملفتش عليها السنة وكانت منفصلة عن أحمد إبراهيم والباشا جوزها كان لحق نفسها ومكانش لسه انفصل عن مراته رسمي يعني أنغام كانت زوجة تانية؟.. أيوه وجوزها اللي سابها رجع لمراته وولاده تاني وأنغام رجعت لشغلها والحياة لذيذة وبعد ما البيت كان بيتخرب بسببها رجعت المية لمجاريها وحظها حلو.
طبعًا النماذج كتير وفي مشاهير تانيين دخل حياتهم خرابة البيوت دي.. اكتبولنا في الكومنتات إيه رأيكم في الفيديو وشايفين العيب خراب البيت من مين.. الراجل ولا الست؟ وإيه اللي ممكن الست تعمله عشان تحافظ على بيتها وجوزها؟.
