هو ايه الحاجة اللي ممكن نتكسف منها؟ أكيد ما يمكن أن يشوه صورتنا أمام الناس، لكن هيفاء وهبى فاجأت الجميع ولها رأي مختلف في موضوع الكسوف، تابعونا لمعرفة التفاصيل:
فكرة الكسوف دي بتختلف من واحد للتاني، في ناس ببتكسف أوي وناس مبتتكسفش.. وناس عندها الموضوع نص نص، ومن بين الحاجات دي موقف إنك تعمل حاجة قدام الناس، لأنهم بيبقوا مركزين معاك، وده أحيانا بيخليك انت تفقد تركيزك، فتغلط، وتخاف اللي برة يضحكوا عليك.
المهم يعني إحنا مش جايين هنا نشرح ليه بنتكسف.. ولكن جايين نقول.. هو ايه اللي بيخلي هيفاء وهبي تتكسف؟ ده السؤال اللي هي جاوبت عليه بنفسها، وده كان موضوع مختلف شوية عن رأي ناس كتير.
لكن الأول خلينا نقول إن هي فنانة لبنانية اتولدت سنة 1976، وهي في عمر 16 سنة فازت بمسابقة ملكة جمال لبنان، قبل ما يتسحب منها للقب بسبب مخالفتها لقواعد المسابقة، لأنها طلعت متجوزة ومخلفة كمان، وده عند اللي عاملين المسابقة مينفعش.
وهي نقدر نعتبرها فنانة استعراضية، بتعمل حاجات كتير رغم غنها عمليا مش موهوبة بشكل كافي في أي حاجة منهم، بس عندها جاذبية وقبول كبير، أغانيها بتجيب ملايين المشاهدات، رغم إن هي صوتها مش قد كدة، ولما مثلت، بدأت حياتها بدور ضيفة شرف في فيلم «بحر النجوم» وبعدها على طول بطولة مع المخرج مكتشف المواهب خالد يوسف في فيلم «دكان شحاتة» الغريب هنا إنها لعبت الدور حلو، عشان تتوالى أعمالها الفنية، زي فيلم «حلاوة روح» اللي اتسحب من دور العرض بسبب جرأته الزايدة.
هنا بقى نركز على جرأته الزايدة دي.. ليه لأن هيفاء وهبي سواء من خلال أفلامها أو كليباتها، أو حتى صورها وظهروها بتظهر بشكل جريء وبتقدم الأدوار اللي فيها إغراء ونجاحها بالأساس معتمد على استخدام أنوثتها، ولكن دي حاجة هي مبتتكسفش منها خالص..
أمال بتتكسف من ايه؟ هيفاء وهبي في مداخلة مع برنامج “بحب السينما” على إذاعة ميجا FM كانت بتتكلم عن فيلم رمسيس باريس، وتصويره وكواليسه، وقالت إنها كانت مكسوفة أوي في تقديم الأدوار الكوميدية.
واتكلمت عن الفيلم وإنها وافقت عليه عشان الضحك اللي فيه، وهي دورها معتمد على كوميديا الموقف، وده كان حاجة تكسف بالنسبالها في الأول لحد ما تأقلمت على الدور.
الفكرة هنا إن هيفاء وهبي متكسفتش لما قدمت إغراء، ولا لما شتمت رامز جلال في برنامج المقالب رامز عنخ أمون، وكانت حلقتها مشهور بسبب كتر الشتايم اللي هي استخدمتها واللي اتفاجئ بيها الجمهور، ولكن اتكسفت من الأدوار الكوميدية.
