الفنانة سمية الخشاب تسببت في جدل كبير على السوشال ميديا من يومين بخصوص حصولها على الدكتوراة الفخرية التي وجدت أنها فخ في النهاية.
ومن كام يوم بردوا الفنانة إيمان العاصي اللي قدمت دور دلال في مسلسل جعفر العمدة اللي اتعرض في دراما رمضان اللي فات نشرت صورة من شهادة تقدير منحها ليها المركز الثقافي الأمريكي في ولاية نيويورك، ومحدش عارف لحد دلوقتي طبيعة الشهادة دي إيه وهل حقيقية ولا الموضوع ضحك على الدقون، زي ما في فنانين قبل كده اتعرضوا لمواقف محرجة بتكريمات من الخارج ومنهم محمد رمضان بطل المسلسل نفسه، وفي الفيديو اللي معانا ده هنقولكم مين الفنانين اللي اتعلم عليهم في موضوع التكريمات المزيفة دي، وإيه اللي حصل مع إيمان العاصي وفريدة سيف النصر.
كريم في محله
ونشرت إيمان العاصي على صفحتها في فيسبوك صورة لشهادة تكريم من المركز الثقافي المصري الأمريكي في ولاية نيويورك وده عشان خاطر دورها اللي قدمته في مسلسل جعفر العمدة واللي قدمت فيه دور دلال فتح الله، ووجهت الشكر للمركز وقالت دي شهادة أعتز بيها جدا الحمد لله.
والجمهور يهني ويبارك والحياة فلة، لحد ما لقينا ناس بتتكلم عن التكريم نفسه والشهادة دي حقيقة ولا مضروبة رغم إنها تستحق لكن هي مراحتش نيويورك للتكريم وكل اللي شوفتها صورة الشهادة ومفيش صورة ليها وهي بتستلمها وده اللي عمل شكوك في الموضوع، وبسخرية في ناس قالت طيب دي دلال هتطبعها ولا هتروح تستلمها ولا هتفضل محافظة بيها على الإيميل اللي وصلها؟.
بس يمكن منشور الفنانة فريدة سيف النصر، كان أوضح شوية عشان كتبت اسم الشخصية اللي قدمت لها الشهادة، اللي نشرها على حسابها في فيسبوك وقالت: “من السيد أيمن معروف المتحدث باسم المركز الثقافي المصري الأميركي بولاية نيويورك، مبروك الفنانة فريدة سيف النصر صدور شهادة تكريم حضرتك عن نجاح مسلسل جعفر العمدة شخصية عزيزة المميزة تحياتنا لحضرتك أيمن معروف”.
لكن بردوا الجمهور مش عارف يحدد مدى جدية الشهادة دي وهل هيتعمل حفل لأبطال المسلسل يروحوا نيويورك يتكرموا ويستلموا الشهادات دي ولا إيه الموضوع، وده لأن في فنانين تانيين اتدبسوا في شهادات ودروع قبل كده وطلعت فنكوش.
دكتوراة بالكذب
وفي أغسطس سنة 2021 اتصدر اسم الفنان مواقع التواصل الاجتماعي بعد ما نشر صورة ليه عن منحه الدكتوراه الفخرية في التمثيل والأداء الغنائي وكمان حصوله على لقب “سفير الشباب العربي” وده كان وقت تكريمه في مهرجان “أفضل الدولية” في كازينو لبنان.
والصور وقتها كشفت عن شهادة دكتوراة من المركز الثقافي الألماني الدولي في لبنان بتاريخ 5 أغسطس، وشهادة “سفير الشباب العربي” من نقابة المسرح والإذاعة والسينما ونقابة محترفي الموسيقى والغناء.
وفي الوقت ده ومع الجدل اللي حصل خاصة إن محمد رمضان كان عنده مشكلة وقضية مع الطيار الراحل أشرف أبو اليسر واتبرأت وزارة الخارجية الألمانية من المركز الثقافي الألماني الدولي.
والمركز الألماني للإعلام التابع لوزارة الخارجية الألمانية قال في بيان رسمي على موقع فيسبوك إن مفيش علاقة بين الحكومة الألمانية والمركز الثقافي الألماني الدولي في لبنان، ومن هنا اتضح إن المركز ده مجهول الهوية، ومع استمرار الجدل وأزمة الطيار اتسحبت الشهادة والدكتوراة الفخرية من محمد رمضان.
سمية الخشاب عملت إيه؟
سؤال الكل كان بيسأله هي سمية الخشاب عملت إيه عشان تاخد الدكتوراة الفخرية عشان دي أصلًا شهادة شرفية بيتم منحها من غير رسالة دكتوراة بس بتكون تكريم وتقدير لإنجازات شخصيات في مجالات معينة ومينفعش اللي ياخدها يشتغل بيها.
فكان الكلام على إيه التأثير المجتمعي اللي عملته سمية الخشاب عشان تاخد تكريم فني رفيع من جهة اسمها منظمة الأمم المتحدة للفنون اللي منحتها شهادة الدكتوراه الفخرية، وبعدها لقيت نفسها في ورطة وهجوم ثقافي وجماهيري كبير.
سمية الخشاب وقعت في الفخ
وتقريبًا سمية الخشاب وقعت في الفخ وطلعت الدكتوراة فنكوش بعد ما نفى المكتب الإعلامي للأمم المتحدة في القاهرة وجود كيان تابع للمنظمة الدولية اسمه منظمة الأمم المتحدة للفنون ده غير إنه طالب بالتحقيق الرسمي في صحة الشهادة دي، وسمية الخشاب بتواجه دلوقتي انتقادات وسخرية وتشكيك وحالتها حالة.
_استرابة: تامر حسني والدكتوراة الفخرية
وفي مارس 2017 سمعنا خبر كده إن تامر حسني حصل على الدكتوراة الفخرية من الجامعة الأمريكية للعلوم، وده بقى لسبب معلوم ومعروف وهو إسهاماته الخيرية في المجتمع المصري وبقى أول مصري يدخل موسوعة جينيس العالمية للأرقام القياسية بأكبر حملة تبرع بالدم فى العالم، ووقتها اتبنى تامر الحملة مع جمهوره بعد ما سجلوا 120 ألف كيس دم في ساعتين بس واتخطوا الرقم القديم واللي كان من نصيب الصين بـ110 ألف كيس، واللي استلم جايزة الدكتوراة الفخرية للسلام مكانه وقتها أخوه الكبير حسام حسني عشان هو كان مسافر، وزي ما شهادة الدكتورة الفخرية بتاعة تامر محصلش عليها جدل في فنانين تانيين خدوا دكتوراة حقيقية زي فاتن حمامة ويحيى الفخراني ونور الشريف ونادية لطفي، قولونا بقى في التعليقات ممكن تكون إيمان العاصي واقعة في الفخ بردوا وخدت شهادة مضروبة هي وفريدة سيف النصر ولا إيه؟.
