السوشال ميديا كلها تتحدث عن سقوط شيرين عبدالوهاب على المسرح وهي تحيي حفلها في دبي،لكن السقوط على المسرح ليس جديد وحدث مع مطربين كثيرين، لكن لم يخرج أحدهم لسانه للجمهور كما فعلت شيرين، ولم تكتفي بذلك بل أنها وضعت نفسها في ورطة بتصريح غير متوقع.
وفي التقرير ده هنقولكم على زلات شيرين عبدالوهاب وإيه اللي قالته وقعها في ورطة، ومين هما الفنانين اللي وقعوا على المسرح زيها كده بس لحقوا نفسهم؟.
ورطة شيرين عبدالوهاب
لاحظنا إن حفل شيرين عبدالوهاب في دبي رفع شعار “عودة شيرين” وفي الحقيقة جمهورها كله مستني عودة قوية مش زي كل كام شهر حفلة ومشاكلها اللي أكتر من فنها، المهم شيرين بعد ما وقعت وقعت في ورطة مع منظمين الحفل وبعيدًا عن المشهد نفسه اللي الجمهور اللي حضر الحفلة قابله بالتصفيق ليها عشان يدعموها هوب راحت موقفاهم وقالت: “شوفوا فنانين كتير حصلهم نفس الموقف ده تقصد الوقعة، بس محدش فكر يكون الستاند ده ليه مكان على المسرح مدفون فيه عشان المطرب ميقعش لكن للأسف المنظمين عمرهم ما بيتعلموا لكن عادي ما يقع إلا الشاطر”.
ورغم إن الجمهور بردوا معرفناش بيسقف على إيه بس هي كملت: “لأ بجد حاجة صعبة دلوقتي الكل على السوشيال ميديا هيسيبوا كل حاجة ويقولوا شوفوا شيرين وقعت يعني المفروض لو أنا مأمنة على رجلي أطلب منكم أد إيه بقى؟.. من المنظمين طبعًا بس يلا معلش شوفوا اللي بيحصل لنا”، وغالبية السوشال ميديا فعلًا مركزة على إنها وقعت وقليلين اللي قالوا إنها في حفلة المفروض بتستعيد فيها نفسها وبتعملها بره مصر يعني كان إيه لزمته كل اللي اتقال.
سخرية من لبس شيرين
وشيرين كانت لابسة فستان طويل لونه بنفسجي وعملت تسريحة شعر جديدة ورغم إن وزنها كان زائد بطريقة ملحوظة بس لبسها هو اللي كان سبب في سخرية الجمهور منها زي إن متابعة قالتلها: “الشوال اللي لبستيه هو اللي وقعك لبسها مش حلو أبدًا”، والتانية قالت: “لبسها اللي لبسته لا يصلح لحفل كبير ولا يصلح لشكلها على مسرح طفيتي نفسك ياشيرين””، وطبعًا هاتك يا تريقة وفي اللي قال إزاي أهلها وجوزها ساكتين على وضعها الصعب ده.
زلات شيرين عبدالوهاب
ودي مش أول زلة لسان شيرين تورط نفسها فيها وكلنا عارفني إن ليها مواقف كتير على المسرح وفي حفلات قدام الجمهور وقعت في مشاكل واعتذرت عنها ده حتى الناس في تونس والسعودية مسلموش من لسانها، وكله كوم واللي قالته على عمرو دياب كوم تاني، ونفتكر ليها لما كانت بتعمل حفلة في بيروت ومعجبة طلبت منها تغني “مشربتش من نيلها” فردت عليها وقالت “يجيلك بلهارسيا” وهوب الموضوع بقى إساءة لمصر ومياه نهر النيل واتحاكمت بسبب الكلام ده بالحبس 6 شهور وغرامة 5 آلاف جنيه واتوقفت عن الغنا.
وبردوا لما وقفت على مسرح قرطاج في تونس واتكلمت على حوار دار بينها وبين بنتها لما سألتها عن المكان اللي هتحيي فيه حفلها ولما قالتلها تونس راحت بنتها ردت: بتسأل: “بقدونس”، فكملت معاها بتقولها: “مفيش فرق بين تونس وبقدونس لأن تونس خضرا زي البقدونس”، وده طبعً عمل إزعاج للتوانسة وبررت موقفها إنها قصدت تضحك الجمهور مش تسيء لبلدهم، وسنة 2017 غضب منها جمهور عمرو دياب وهي في حفل زفاف عمرو يوسف وكندة علوش لما قالت: “عايزة أقولكم إن.. خلاص راحت عليه وكبر خلاص في السن وإحنا اللي جايين”، ووقتها الكل قال دي سقطة جديدة وبتهين عمرو دياب بس وقتها العريس عمرو يوسف حاول يلحقها وخد منها المايك وقالها: “بموت فيكي”.
فنانين وقعوا على المسرح
وقبل شيرين عبدالوهاب في فنانين كتير وقعوا على المسرح سواء وهما بيعملوا حفلات غنائية أو وهما بيستلموا جوايز زي محمد رمضان اللي وقع وهو في دبي في مهرجان الضيافة ولحق نفسه وقعد يضحك، وفي بردوا ماجدة الرومي لما وقعت على المسرح وهي في الأردن في افتتاح مهرجان جرش ووقتها كانت تعبانة واتعالجت ورجعت كملت، وبردوا ميادة الحناوي جتلها دوخة ووقعت وهي بتعمل حفل في مهرجان صفاقس الدولي في تونس وكملت حفلها على الكرسي، ومحمد منير وقع على المسرح لما هجم عليه واحد من معجبيه وكمان إليسا اتعثرت على المسرح وهي بتعمل حفلة في دبي، وكل اللي بيقع محدش بيسمع إنه اتورط في كلام ولا أحرج المنظمين.
تفتكروا شيرين عبدالوهاب هتعتذر للمنظمين بتوع الحفل ولا هي عندها حق في اللي قالته، وهل ده هيأثر عليها في الحفلات الجاية ولا لأ؟، مستنين تكتبولنا آرائكم في التعليقات.
