واحد من نجوم فترة الثمانينات والتسعينات وحتى بداية الألفية، أغانيه كانت تشعل الأجواء وأغانيه مازالت بيننا حتى الآن، سواء أغانيه أو أفلامه أو حتى تترات المسلسلات التي كان يغنيها، هو «القلب الطيب» اللي «ساعات بيشتاق» و«فاكر اللي ناسيه»، ودايما بيقوله «طمني عليك»، أوقات كتير كان بيطلع في دماغه أفكار مجنونة فكان بيقول «ما تيجي نعمل كدة».. هو طبعا محمد فؤاد.
من أيام احتفل النجم محمد فؤاد بعيد ميلاده الـ61، وفؤش ده بقى قصة كبيرة من أول ما جه من الإسماعيلية للقاهرة واتنقل بين مناطقها الشعبية لحد ما استقر في عين شمس، واللي عاش فيها 25 سنة ومازال محتفظ جواه بذكريات جميلة تجاه الناس هناك، وكمان استشهاد شقيقه في حرب 1967 كان ليه تأثير كبير على نفسيته وشخصيته وأغانيه بعد كدة، وكمان قصة صعوده وانطلاقته اللي جت صدفة، وده اللي هنتكلم عليه دلوقتي.
الفنانة ميرفت أبو عوف شقيقة الفنان عزت أبو عزف واللي كان صاحب فرقة فو إم، كشفت في لقاء صحفي عن تفاصيل اكتشاف النجم محمد فؤاد، وقالت إن الصدفة كانت البطل في اكتشافه، وهو نفس السيناريو الذى ظهر في فيلم «إسماعيلية رايح جاي».
والقصة إن عزت أبو عوف كان في سيارته ومعاه ميرفت، وكانوا تايهين ولقيوا مجموعة شباب سألوهم عن الطريق، فواحد منهم قال للفنان عزت أبو عوف «على فكرة محمد فؤاد صوته حلو أوي وبيغني» راح صاحب فرقة فور إم إداله رقم تليفونه وعنوانه وقاله كلمني ويارب صوتك يطلع حلو فعلا.
اللي حصل بعد كدة هو اللي ظهر في فيلم «إسماعيلية رايح جاي فعلا»، وعزت أبو عوف سأله تحب تغني لمين فقاله لعبد الحليم حافظ وأم كلثوم وكارم محمود، وطلب منه يغني للأخير «أمانة عليك يا ليل طول» وبالفعل عزت أبو عوف أعجب جدا بأداء محمد فؤاد، ومن هنا كانت الانطلاقة.
استمر محمد فؤاد مع فرقة الفور أم، وقدم معاهم مجموعة من الأغاني زي «سلطان زماني»، و«متغربين»، وبعد كدة انفصل محمد فؤاد عن الفرقة، واتنقل لمرحلة جديدة من حياته في الغنا، ووقع على عقد لإنتاج ألبومات مع شركة صوت الحب، وهي من أكبر شركات الإنتاج الفني والغنائي في مصر والوطن العربي في الوقت ده.
قدم معاهم أول ألبوم خاص بيه وكان اسمه «في السكة» والكلام ده كان سنة 1983، ونجح الألبوم، وأغنية في السكة بشكل خاص، واستمر في مسيرته الناجحة بعد كدة.
محمد فؤاد قدم خلال مسيرته 19 ألبوم كان أولها «في السكة» سنة 83 وآخرها «بين إيديك» مع شركة روتانا سنة 2010، وكمان قدم 8 أفلام منها «أمريكا شيكا بيكا» و«رحلة حب» و«غاوي حب»، وقدم مسلسلات زي «أغلى من حياتي» والضاهر»، وبرنامج «فؤش في المعسكر».
