قالت المطربة سمية درويش:”أرى أن الوسط الغنائي عبارة عن مافيا، لذلك أتعرض لحروب من أسماء كبيرة علشان صوتي بيشبه صوت شيرين عبد الوهاب، وكل واحد خايف وحاسس أن الكرسي مينفعش يبقى فيه منه تاني مع إننا لازم نكون كتير ومينفعش نحتكر ذوق الناس”.
وتابعت خلال لقائها ببرنامج “نص الكلام” الذي تقدمه الإعلامية راغدة شلهوب بقناة “النهار”: “أتخيل ان فيه حد ممكن يأذيني لدرجة إنه يوقعني علشان أنا شبهه”.
وعن تشبيه صوتها بشيرين أضافت:”انا صوتي مش شبه شيرين عبد الوهاب، وقلت لأحد الملحنين أكبر حاجة تبرأني من التهمة دي إني أغني دويتو مع شيرين عبد الوهاب وده عمره ما هيحصل لإنها مش هتوافق تغني معايا”.
وأكملت:”أنا بحب شيرين عبد الوهاب جدا وبسمعها لأن الناس بتطلب مني أغانيها ولكن احب اعمل دويتو مع ناس تانية غير شيرين”.
وأكدت:”شيرين عبد الوهاب عرفاني كويس بس لو اتسألت هتقول إنها متعرفنيش، ووصلتلي رسايل إني صوتي وحش جدا ومين دي اللى تشبهوني بيها، بس هي علي الهواء هتقول عني واحدة مغمورة مش معروفة”.
وتابعت:”كنت بغني في حفلة في مكان وشيرين كانت تاني يوم في نفس المكان والولد اللى بيركن العربية بتاعتي صورها وهي بتقولهم نزلوا صورة البنت دي ياما مش هاجي اغني بكرة، وانا صورتي كانت صغيرة وصورتها هي كبيرة جدا، بس صورتي بتاعت الواتس اب ضايقتها، هي لها الحرية المطلقة تغير وتخاف علي نفسها بس لو بايدك تحب الخير للناس تحبه”.
