أحيانا يحدث بين الأصحاب حركات غير متوقعة وتصل الأمور في النهاية لخلافات بين الطرفين ممكن تكون نهاية لعلاقتهم وصداقتهم، خصوصا لو ان هذا الصديق فعل شئ فيه انتهاك لخصوصيتك واستغلك لمصلحته الشخصية.
ما هو بتاع مصلحته ده مينفعش يتقال عليه صديق، ده صاحب طريق، ويمكن ده سر الخلاف بين إلهام شاهين وبوسي شلبي بسبب حفلة عيد الميلاد وسفرية مراسي وصور المايوه.. ايه الحكاية؟ تعالوا نشوف
لما بتكون واحد من الناس اللي بيحبوا يفرحوا وهيصوا ويحتفلوا بعيد ميلادهم طبيعي بتعزم صحابك والناس اللي حواليك عشان تتبسطوا كلكم مع بعض، ولما بتكون محبوب بقى بيجيلك ناس كتير، ولكن ممكن وسط الزحمة دي تلاقي حد يبوظلك حلاوة اليوم ويعملك مشاكل.. الحد ده هو بوسي شلبي.
الفنانة إلهام شاهين السنة اللي فاتت كانت بتحتفل بعيد ميلادها، وكل صحابها من الفنانين كانوا مجلجلين ورقص وهزار وضحك والدنيا جميلة، وتقريبا اليوم ده مكنش في تصوير في مصر، لأن كل النجوم كانوا هناك في حفلة عيد ميلادها.
المهم بقى وسط الليلة دي وهو الكينج محمد منير بيغني، ويسرا بتضحك وبترقص، وهاني شاكر بيقول مواويله، والناس كلها مبسوطة وسميرة سعيد كمان بدأت تغني، وكله بيرقص وفرحان، بوسي شلبي قررت تستفيد من القصة دي، وصورت الحفلة وطلعت بيها لايف.
الفكرة إن كل الناس في الحفلة كانت بتتعامل بطبيعتها وعلى راحتها، وكله مبسوط وفرحان، ولكن بوسي الإعلامية اللي جواها طلعة ونقحت عليها وقالت لما استفيد من وجودي مع صحابي، وطبعا أو حد شغال في الميديا أو عارف معنى كلمة انتهاك خصوصية، فاهم إنه مينفعش يروح في قعدة خاصة وينقل الكلام اللي فيها من غير ما يكون في موافقة من صاحب الكلام أو الحاجة دي، وهنا كانت غلطة بوسي شلبي.
إلهام شاهين لما طلعت في برنامج واتسألت عن الواقعة دي، قالت إن اللي عمل كدة هي خرجته من حياتها، وطبعا رفضت تقول الاسم، ولكن كلنا عارفين إنا بوسي شلبي لإن مصر كلها اتفرجت على الصور والحفلة عن طريقها هي مفيش حد تاني.
عموما بوسي شلبي في كل المناسبات بتطلع في لايفات وتحاول تستفيد من الموقف، ويمكن شوفنا حسين فهمي في مهرجان القاهرة لما راحت تتصور معاه وأحرجها، ومرضيش يتصور معاها، والكلام ده كان على الريد كاربت وقدام عدسات المصورين، ولما اتسأل عن السبب قال إن هي كانت طالعة لايف، وهو مش عايز كدة.
عموما واضح إن دي عادة عندها، يعني في حفلة عيد ميلاد نرمين الفقي باردو عملت نفس الكلام ونشرت فيديوهات وصور، بس نرمين ما اعترضتش يعني، إنما إلهام شاهين كان عندها مشكلة مع الموضوع ده، لدرجة إنها رحت وقالت: «فوجئت إن الناس بيقولوا لي بيتك كان متذاع على الهواء، وكنت هموت فيها بس مش عارفة أعمل إيه، لكن بعتبر ده خيانة عظمى»، وقالت إنها بتنتقد الناس اللي تنشر التفاهة وإن اللي عمل كدة تفهها هي كمان.
بوسي شلبي كان ليها واقعة تاني فيها إلهام شاهين باردو، لما كان عدد من النجوم في مراسي، وكانت هي معاهم ومنهم إلهام شاهين وهاني رمزي وزوجته وهالة سرحان، ونشرت صور ليهم وكان بعضهم وقتها بالمايوهات، وكانوا على راحتهم بقى بيصيفوا.
عموما بوسي شلبي معروفة باللايفات وبتحاول تشتغل صحابها الفنانين المشاهير في الموضوع ده طول الوقت عشان تقدر تركب التريند وتكون موجودة على الساحة، بغض النظر عن إن الموضوع ده بيسببلها مشاكل كتير مع الناس اللي حوليها.
