شهر طويل أحداثه كثيرة والناس ليس لها حديث إلا عن طول هذا الشهر وكثرة الأحداث به في كافة المجالات، تابعونا سنكشف أبرز الأحداث في حياة الفنانين خلال هذا الشهر.
أيام وبنعيشها
الناس استسلمت خلاص لأ خد أقولك استسلمت إيه ده مفيش حد متكلمش عن طول شهر مايو واللي الناس عانته فيه يعني مش كفاية مكناش عارفين نلبس فيه شتوي ولا صيفي ولا حكايته إيه معانا.. لأ ده كمان مش عاوز يمشي 31 منه غير لما يكون في حاجة حصلت فيه.. تعرفوا إن الفنان طارق عبدالعزيز قلبه تعبه ده اضطر كمان يتنقل على المستشفى ويعمل قسطرة عشان يصلح المشكلة اللي حصلت.
طيب عارفين كمان إن منة فضالي شكلها اتحسدت آه والله دور نرجس اللي عملته في رمضان في مسلسل جعفر العمدة كان وش الخير عليها بس شهر مايو قفلها معاها بقى والخساير المادية بالجملة معندهاش ولا جهاز كهربائي سليم دلوقتي بيتها كله رايح فعلاً وبقت الجملة دي اسم على مسمى.
الزعيم والأسطورة
عارفين كمان إن في شهر مايو بيجتمع عيد ميلاد اتنين من أهم النجوم على الساحة دلوقتي أيوه والله واحد عمل اسمه في 60 سنة والتاني بيطلع السلم لسه الفرق بين سن ده وده 50 سنة عادل إمام الزعيم ومحمد رمضان الأسطورة والاتنين احتفلوا بعيد ميلادهم في مايو والنجوم اللي حضروا الحفلتين فرحانين بيهم الزعيم ظهر بعد غياب من أيام فالنتينو والأسطورة أصلا محقق نجاح كبير في جعفر العمدة يعني التريند أكل وشرب عليهم ها وإيه كمان.
جواز وطلاق
الحلم الجميل والبيت الصغير اللي عاش فيه تامر حسني سابه وخلع وطلق مراته بسمة بوسيل وهي وعيالها عايشين حياتهم بعيد عنه والتاني مقضيها ما بين المكتب والشغل والحفلات والمعجبات والدنيا هايصة.. بشرى كمان اتطلقت يا جدعان بعد ما الكل كان بيحلف بجوازتها اللي اتأخرت 26 سنة بس خلاص بقى ما قلنا كله رايح.
اللي اتجوزوا بقى كانوا شباب زي الورد لسه يوسف ماجد الكدواني عمل 3 حفلات عشان يتزف على عروسته كارلا منصور وميرنا نور الدين خدت الواد الوسيم اللي الكل بيحسدها عليه وربنا يستر عليهم وأسماء أبو اليزيد الناس بتحب فنها وفرحوا أوي بخطوبتها وعاوزينها أسعد وأحلى عشان هي نجمة بجد.
مستروش
زي ما في ناس بنعمر في ناس قالبينها خناقات ومحاكم وقضايا وشغلانة مبيستروش آه والله وده اللي عمله حسن شاكوش لما اتخانق مع مراته وطردها من بيتها بعد أسبوعين بس من جوازهم ومحدش مصدق إيه اللي بيعملوه ده.. والتانية رفعت في قضايا وعمالة تتمكن والدعوات ملاحقاها وبدل ما كنا هنقول مبروك المدام حامل وربنا يقومها بالسلامة بقينا نقول ربنا ينصرهم وتاخد حقها، المواضيع مخلصتش لحد هنا.
دي زينة اللي كانت عمالة تتكلم عن الصلح مع أبو ولادها أحمد عز لسه مكملة في قضايا النفقة والتعليم وقصص.. وميار الببلاوي ضربت وفاء مكي في ضهرها وبعد ما ادتها أمل البراءة بعد 23 سنة على حبسها جابتها الأرض وواقفة قصادها وبتقول مكنتش أقصد والغلط مردود وعرفت الحقيقة من طرف تالت.. طرف تالت مين يا ختي ما كنتي تتأكدي الأول وفكك من ألاعيب التريند دي.. المهم الاتنين راحوا على المحاكم وأهو مصلحة للمحامين.
ادعولهم بالرحمة
الحزن كان ليه مكان في قلوبنا والشهر معداش كده يا جماعة إحنا اتصدمتا في أول الشهر برحيل الفنان الشاب مصطفى درويش ومحدش كان مصدق لأنه ولا اشتكى من تعب ولا قال الحقوني ولا حتى اللي حواليه عرفوا ينقذوه وربنا يكفينا شر الفجأة.
الفنان محمد الأدنداني بردوا كان من ضمن الناس اللي فارقونا والنقابة نعته عشان قيمته الفنية الكبيرة.. بره مصر في فنانين بردوا ودعونا زي المخرج السوري هشام شربتجي زي الفنان السعودي فهد الحيان زي الفنان الكويتي أحمد جوهر زي الفنان السوري أسامة الروماني.. ادعولهم بالرحمة.
أهل المغنى
أهل المغنى كان ليهم نصيب من الأحداث وبعيداً عن الحفلات اللي عملها فنانين مصريين بس اللي عملوا ضجة شيرين عبدالوهاب لما فضحت بنتها ولما غنت غلط ولما دي مش عارفين هتخلص امتى نفسنا شيرين ترجع زي الأول وأحسن.. أحمد سعد راح لبس شفاف وهاتك ياتقطيع فيه ومخلصناش ونقابة الموسيقيين اتدخلت ولسه القرارات في الطريق.
الباشا الكبير محمد فؤاد وقع في نفس غلطة أصالة والجمهور اتقلب عليه وكانت أول حفلة ليه في السعودية مش في صالحه وقال أنا ممكن أعتزل بعد الحفلة دي والناس قالتله يا أخي شوية تقدير لمصر والشعب العاطفي بتاعها مش كده يعين ده إحنا حساسين زيادة عن اللزوم متعرفش عننا كده ولا إيه؟.
أصالة التانية أنكرت فضل مصر ورجعت في كلامها وعملت حفلة عين الصيرة وابنها ننوس عينها لودي بقى منظم حفلات لولولوي افرحوا يابنات يلا وهيصوا رمضان أهو سابنا بفوانيسه.. جالنا مايو وودعنا وربنا يستر في باقي الشهور الجاية.. لحد هنا خلص الفيديو بتاعنا ادعمونا في الكومنتات بآرائكم عن أبرز الأحداث دي وإيه أكتر حدث أثر فيكم وإيه اللي اتفاجئتوا بيه؟.
