حالة الاستفزاز بين المطربة شيرين عبد الوهاب وطليقها السابق الملحن حسام حبيب مستمرة حتى الان بعدما شغلت الجمهور خلال الفترة الماضية، لكن الجديد هو ظهور “شيرين” في فيديو مع ابنتها وهى تستفز “حسام” وغنت أغنية “أنا سبته خلاص ومحصلش حاجة”!
المطربة الكبيرة صاحبة الصوت الجميل “شيرين عبدالوهاب” رجعت تاني تشغل الجمهور بانفصالها عن حسام حبيب ونشرت مقطع فيديو جديد مع واحدة من بناتها ونشرته على تطبيق “تيك توك” وهو ما لفت انتباه الجمهور وعدد كبير.
شيرين في الفيديو وهي بتغني وبترقص على أنغام أغنية المطربة المغربية سميرة سعيد “أديني سيبته وشوفت أهو محصلش حاجة”، وظهرت شيرين بلوك جديد وملفت للإنتباه وهي بتاكل “عنب” وجنبها بنتها اللي كانت متفاعلة مع أمها ودي الرسالة اللي حبت توصلها لطليقها إنها مبسوطة بانفصالها عنه وإنها هتعيش لبناتها وشغلها بس!
عدد كبير من الجمهور بمجرد ما شاف فيديو شيرين حصل هجوم عليها كبير منهم متابع كتب وقال إن دماغها لسعت خالص، ايه اللي هي عاملاه ده؟، وكتب واحد تاني قال ما خلاص بقى هو مفيش حد انفصل غيركم صدعتونا شيرين وحسام، شوفي بناتك بقى وشغلك واسكتي، لكن متابع تالت كتب وقال “إنت صوتك حلو وليكي جمهور ليه بتحاولي تخسريه؟”.
بعدما نشرت “شيرين” الفيديو مع بنتها علقت نشرت صورة تانية لبنتها علقت عليها وقالت: “أحلى بنت في الدنيا.. بنتي حبيبتي”، انما الفنانة إيمان العاصي علّقت برمز “قلوب حمراء”، وعلقت الفنانة سوار النجار: “ما شاء الله قمرات ربنا يحفظكم، أيوه بقى، هي دي شيرين القوية الجدعة”، انما الراقصة والفنانة فيفي عبده فكتبت: “ما شاء الله، الله أكبر، يحفظكم يارب، ويخليهم لك يا شيرين، يارب يا حبيبي”.
شيرين بتعيش حالة نشاط فني كبيرة آخرها انتهائها من تسجيل أغنيتها الجديدة “المترو”، من كلمات أمير طعيمة، ألحان عمرو مصطفى، وتوزيع طارق مدكور، جاهزة للتوزيع بس ناقصها اللمسات اللي هيحطها الموزع الموسيقي طارق مدكور قبل ما يتم طرحها، وبتستعد كمان ترجع للسينما من تاني من خلال فيلم كوميدي، بعد غياب 20 سنة لما عملت فيلم “ميدو مشاكل” مع النجم أحمد حلمي، انما في الدرتما كان آخر مسلسل لها هو “طريقي” من 8 سنين بعدها انشغلت بجوازها وانفصالها عن حسام حبيب.
المطربة الكبيرة تعاقدت على تقديم أول حفل غنائي جماهيري لها في مصر يوم السبت 8 أكتوبر اللي جاي في أوبرا جامعة مصر للعلوم والتكنولوجيا، وأسعاره هتكون على 4 فئات، وهي 500، و 1000، و 1500، و 2000 جنيه، وده أول حفل لها بعد تصاعد خلافاتها مع طليقها حسام حبيب، وتبادل البلاغات بينهم بعد شهرين بس من إحيائها حفل ختام مهرجان قرطاج للثقافة والفنون.
