كشف مطرب المهرجانات عمر كمال، لأول مرة عن تفاصيل ارتباطه بـ ندى الكامل، طليقة الفنان أحمد الفيشاوي، وسبب انفصالهما، وذلك بعد طلاقها من الفنان أحمد الفيشاوي، حيث خرجت أنباء حينها تكشف ارتباطهما واستعدادهما للزواج.
عمر كمال يكشف لأول مرة تفاصيل ارتباطه بـ ندى الكامل
وقال عمر كمال، خلال لقائه مع أميرة بدر في برنامج خلاصة الكلام، على قناة النهار: أنا مبحبش أتعرف بموضوع عاطفي أو شخصي، وزعلت لما علاقتي اتعرفت لأن مردودها عند الناس مكنش كويس ومش عارف الناس شافت الموضوع إزاي.
وأضاف عمر كمال: أنا في الفترة دي مكنتش متزن نفسيًا ومكنتش بنام غير بأدوية ومهدئات، وسلوكي مكنش مظبوط، والأدوية كانت مأثرة عليا لدرجة أن ممكن حد ياخد مني مبلغ وأنسى خالص، وكنت باخد الأدوية دي بدون علم وناس وصفتلي ودخلت في متاهة، والموضوع قلب معايا بهلوسة، ومرة مدير أعمالي راح جابني من على الدائري وأنا خابط العربية، وتاني يوم معرفتش أني عملت كده، والسنة والنص دي أثرت على شغلي.
وواصل عمر كمال: ممكن الغلط يكون من عندي لأني عملت في نفسي كده، هي مكانتش فاتحة خير عليا والمفروض الإنسانة اللي معايا لما تلاقيني بميل ناحية الغلط متميلش معايا لأ تعدلني، تجربة مكانتش حلوة عليا السلبي فيها أكتر من الإيجابي، وأنا اللي خدت قرار الانفصال لأني كنت بقع ومش نفسي، أنا حبيتها أكيد ولكن التجربة ضرتني.
واستكمل عمر كمال: ربنا حبيبي، وفي كل موقف في حياتي كنت هقع فيه شالني، وربنا عمل ده ممكن يكون علشان أمي أو اخواتي أو خير بعمله أو علشان براعي ربنا في فرقتي، أنا دايمًا بصحي نفسي ودايمًا عندي النفس اللوامة، وطول ما أنا بدخل ربنا في طرف الميزان همشي كويس.
عصيت ربنا واداني قلم
وأوضح: ممكن أكون في علاقة وعصيت ربنا، فا ربنا يديني قلم ويكسرني علشان يسمع صوتي، وأنا فوقت وحاولت ترجعلي وأول ما أتأكدت أني مش راجع شوفت الوش التاني، وناس تانية ظهرت، طب ده أنا قرأت دراسة بتقول أن الشخص الطبيعي السوي العادي علشان يطلع من علاقة ويستشفى منها عايز 6 أشهر، وبدأ ربنا يبينلي حكمته وأن قراري صح.
واختتم عمر كمال: ده أنتي لو عندك جاكيت ولبستيه في مناسبة بيصعب عليكي تشحتيه، ولو عندي عربية بتصعب عليا وبحن لها، وتأكدت أن قراري كان صح وفوقت والدنيا بقت أحلى كتير.
يشار إلى أن ندى الكامل تزوجت العام الماضي بعد مرور عامين على طلاقها من أحمد الفيشاوي، من الممثل الشاب أحمد خالد، ولكنهما انفصلا قبل يومين، وقبل زواجها منه كانت انتشرت أنباء عن ارتباطها بـ عمر كمال واستعدادهما للزواج.
مقالات أخرى قد تهمك
عمر كمال يكشف تفاصيل لأول مرة عن أزمة شاكوش وطليقته
بعد غياب طويل.. ظهور مفاجئ لماجدة الرومي يخطف الأنظار
